بۇگىن تاڭنىڭ اتىسىمەن – قوعامدىق كولىكتەر جۇمىسىن باستاعان ۋاقىتتا «وڭاي» جۇيەسىنىڭ باقىلاۋشىلارى تيميريازەۆ كوشەسىندەگى ايالدامالاردا جولاۋشىلارمەن كەزدەسىپ، ولارعا جاڭادان ىسكە قوسىلعان BRT جەلىسىنىڭ ەرەكشەلىكتەرى مەن ايالدامالاردىڭ ورنالاسۋ تارتىپتەرىن ءتۇسىندىردى. ال، اۆتوبۋس جۇرگىزۋشىلەرى بولسا العاش كەلگەن جولاۋشىلارعا قولشاتىر، ريۋكزاك جانە فلەشكا تاراتىپ، توسىن سىي جاسادى.

جول قۇرىلىسشىلارىنىڭ ايتۋىنشا، جاياۋ جۇرگىنشىلەرگە ارنالعان جولدار ءالى دە بولسا جوندەۋدەن ءوتىپ جاتىر ەكەن. ال، كولىكتەرگە ارنالعان جول تولىقتاي اياقتالىپ، پايدالانۋعا بەرىلگەن. قىركۇيەك-قازان ايلارىندا ءدال وسى تيميريازەۆ كوشەسىنىڭ بويىنا اعاش كوشەتتەرى وتىرعىزىلاتىن بولادى.

سادير حامراەۆ, كولىكتىڭ حولدينگتىڭ باسشىسى:

«قوعامدىق كولىكتەرگە ارنالعان BRT جەلىسى – قالا ءۇشىن وتە قاجەتتى جوبا. تيميريازەۆ كوشەسى بولسا ەڭ اۆتوبۋسى كوپ جۇرەتىن كوشە، قوعامدىق كولىكتەردىڭ ارتەرياسى دەپ ايتۋعا بولادى. بۇرىندارى بۇل كوشەدەن اۆتوبۋسقا وتىرعان جولاۋشىلار ۋاقىتىنىڭ ءبارىن كەپتەلىستە تۇرىپ جوعالتاتىن. ال، قازىر جولداعى ۋاقىت 32%-عا قىسقارىپ وتىر. ماسەلەن، بۇرىن ءبىر ادام وربيتا ايالداماسىنان قالانىڭ ورتالىعىنا جەتۋ ءۇشىن كەمى 45 مينۋت ۋاقىتىن جوعالتاتىن. ال، قازىر 25-30 مينۋتتا جەتىپ بارادى. ەندى جولاۋشىلاردىڭ سانى دا ارتادى دەپ ۇمىتتەنىپ وتىرمىز، ويتكەنى اركىم قالاعان جەرىنە ۋاقىتىلى بارا الادى».

باۋىرجان كۋليشەۆ, «Green Bus» اۆتوپاركىنىڭ باسشىسى:

«كۇن سايىن ءبىزدىڭ قىزمەتكەرلەر اۆتوبۋس جۇرگىزۋشىلەرىمەن جۇمىس ىستەيدىڭ. ولار ءار ايالدامادا تۇرىپ، جۇرگىزۋشىلەرگە جاڭا جەلىدە قالاي قوزعالۋ كەرەكتىگىن ءتۇسىندىرىپ جاتىر. BRT جەلىسى ەڭ الدىمەن جولاۋشىلارعا، سودان كەيىن اۆتوبۋس جۇرگىزۋشىلەرىنە قولايلى. العاشقىلارى دىتتەگەن جەرىنە دەر كەزىندە جەتسە، ەكىنشىلەرى كەستەدەن كەشىكپەي، جۇمىس ۋاقىتىن ۋاقىتىلى اياقتايدى. ءيا، تروللەيبۋستارمەن پروبلەمالار بولدى، بىراق الداعى 2-3 كۇندە بۇل پروبلەما شەشىلەدى».

تالگات حوسچانوۆ، الماتى قالالىق جولاۋشىلار كولىگى باسقارماسىنىڭ باسشىسى:

«BRT جەلىسى قوسىلعاننان كەيىن جولاۋشىلاردىڭ جولدا وتكىزەتىن ۋاقىتى 32 پايىزعا قىسقاراتىن بولادى. ال، جالپى جولاۋشىلاردىڭ سانى 40 پايىزعا كوبەيەدى دەپ بولجاپ وتىرمىز. قىسقاسى، ءبىز جولاۋشىلاردىڭ كەدەرگىسىز قوزعالۋىنا جاعداي جاساپ وتىرمىز.

سونداي-اق، قىركۇيەك ايىنان باستاپ ءبىز بۇل جولدارمەن 18 مەترلىك ۇزىن اۆتوبۋستاردى جۇرگىزەمىز. ولار سىيىمدى، كونديتسيونەرلەرى جانە بەينەباقىلاۋ كامەرالارى بار. بۇل ءوز كەزەگىندە كەشكى ۋاقىتتا كەپتەلىستىڭ ازايۋىنا سەپتىگىن تيگىزەدى.

جولدىڭ ورتاسىندا ورنالاسقان ايالدامالاردى كورىپ، شوشىماۋلارىڭىزدى دا سۇرايمىن. ولاردىڭ ەكى مىندەتى بار: نەگىزگىسى – ايالدامالىق تۇراق بولسا، ەكىنشىسى جول اپاتىن ازايتۋعا باعىتتالعان قۇرال. جول كولىك وقيعالارى مۇنان كەيىن 50 پايىزعا دەيىن تومەندەۋى ءتيىس.

جەڭىل اۆتوكولىكتەرگە دە قيىندىق تۋمايدى. دەسە دە، تيميريازەۆ كوشەسىمەن جۇرەتىن اۆتوموبيلدەر ازايادى. بۇعان دەيىن تاۋلىگىنە 55 مىڭ كولىك ءجۇرىپ وتسە، قازىر بۇل كورسەتكىش 50 مىڭعا ازايادى. جالپى، وسى جولدىڭ بويىندا بارلىعى 5 مىڭ ورىنعا شاقتالعان كولىك تۇراقتارىنىڭ بار ەكەنىن دە ايتا كەتۋ كەرەك».

Abai.kz