جۇما, 21 ماۋسىم 2024
بيلىك 1908 26 پىكىر 20 مامىر, 2024 ساعات 12:54

ۋزۋرپاتسيا جانە پرەزيدەنتتىڭ تاريحي ورنى

كوللاج: Abai.kz

قازاقستاننىڭ ۋزۋرپاتسيالانعان مەملەكەت ەكەنىن تۇراقتاندىرۋ – ءبىر جاعىنان قازىرگى پرەزيدەنتتىڭ تاريحي ورنىن ايقىنداۋ ءۇشىن دە كەرەك

قازاقستان رەسپۋبليكاسى
پارلامەنتى سەناتىنىڭ
توراعاسى م.س. اشىمباەۆقا!

قۇرمەتتى ماۋلەن ساعاتحانۇلى!

بۇگىن (16 مامىر) ماعان سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنەن قادىربەك مۇرات بولاتۇلى تەلەفون سوعىپ، ءسىزدىڭ اتىڭىزعا جىبەرگەن حاتىممەن، «قازاقستان – ۋزۋرپاتسيالانعان مەملەكەت» اتتى كولەمدى ماقالاممەن، وعان قوسا تىركەلگەن ەكى حاتپەن ءسىزدىڭ تانىسقانىڭىزدى، ارى قاراي ول ماقالا مەن حاتتاردى اتالعان كوميتەتتىڭ توراعاسىنا جىبەرگەنىڭىزدى حابارلادى.    

شىنى كەرەك، قاتتى قۋاندىم.

ءيا، بۇل ناعىز ءسىز وقيتىن ماقالا جانە سىزدەر ويلاناتىن ماسەلە!

جۇما كۇنى سەناتور مۇرات قادىربەك ىنىمىزبەن كەزدەسىپ، «قازاقستان – ۋزۋرپاتسيالانعان مەملەكەت» اتتى ماقالانىڭ توڭىرەگىندە پىكىرلەستىك.

كەشە (15 مامىر) اتالعان ماقالام مەن حاتتارىمنىڭ پرەمەر-ءمينيسترىمىز ولجاس بەكتەنوۆ مىرزاعا جەتكەنى تۋرالى دا، «قۇرمەتتى مۇقيبەك اۋىت! قازاقستان رەسپۋبليكاسى ۇكىمەتىنىڭ اپپاراتى ءسىزدىڭ كوتەرىپ وتىرعان ۋزۋرپاتسيا ماسەلەسى بويىنشا اعىمداعى جىلدىڭ 11 مامىرداعى №جت-2024-03991543 سۇراۋىڭىزدى قاراستىرىپ، پرەمەر-مينيستر و.ا. بەكتەنوۆتىڭ حاتشىلىعىنا جەتكىزىلگەنىن حابارلايدى…» دەگەن، جاۋاپ حات كەلگەن بولاتىن.

پرەزيدەنتتىڭ وزىنە جىبەرگەن حاتىم مەن ماقالامنىڭ ايبەك دادەباەۆ مىرزانىڭ اتىنا تىركەلگەنىن «ە-وتىنىشتەن» كورىپ وتىرمىن...

قۇرمەتتى ماۋلەن ساعاتحانۇلى!

ومىربايانىڭىزعا قاراپ وتىرسام، قازاقستاندى تولىعىمەن ۋزۋرپاتسياعا الۋ ءۇشىن كارىم ءماسىموۆ پەن تيمۋر قۇلىباەۆتىڭ ىقپالىمەن «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭ قابىلدانعان كەزدە، ءسىز بەسىنشى جانە التىنشى شاقىرىلىمداعى قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ توراعاسى ەكەنسىز.

دەمەك، قازاقستاندى ۋزۋرپاتسيالاۋعا تىكەلەي قاتىستى زاڭدى قابىلداعان ىرىقتى جانە ىرىقسىز كۇيدەگى توپتىڭ جۋان ورتاسىندا ءسىز دە بولىپسىز!

قۇرمەتتى ماۋلەن ساعاتحانۇلى!

قازاقستان رەسپۋبليكاسىنىڭ كونستيتۋتسياسىنىڭ 48-بابىنا ساي، قازىر ءسىز مەملەكەتىمىزدەگى ەكىنشى ادامسىز.

دەمەك، ءسىزدىڭ اتالعان «قازاقستان – ۋزۋرپاتسيالانعان مەملەكەت» اتتى كولەمدى ماقالاممەن، وعان قوسا تىركەلگەن ەكى حاتپەن ءسىزدىڭ تانىسقانىڭىز، وقىعانىڭىز مەن ءۇشىن وتە ماڭىزدى.

بۇل جەردە، ەرلان قارين مەن بەرىك ءۋاليدىڭ اتىنا جازعان حاتتارىمدى قوسا جىبەرگەنىمنىڭ ءسىز ەسكەرەتىن جانە ءبىر سەبەبى بار، ول – اتالعان ەكى حاتتىڭ، تاعى ءبىر جاعىنان، «قازاقستان – ۋزۋرپاتسيالانعان مەملەكەت» اتتى ماقالاما قوسىمشا تولىقتىرۋلار رەتىندە جازىلعانى.

ارينە، «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭى قابىلدانعان كەزدە، ونى قولداپ داۋىس بەرگەنىڭىز ءۇشىن ءسىز زاڭدىق جاۋاپقا تارتىلمايسىز.

بىراق، اتالعان زاڭ ارقىلى قازاقستاننىڭ ۋزۋرپاتسيالانعانى شىندىق.

وسى جاعىنان العاندا، ءسىز دە بەلگىلى دارەجەدە مورالدىق جاۋاپكەرشىلىك ارقالاۋعا ءتيىسسىز!

ال، قازاقستاننىڭ ۋزۋرپاتسيالانعانى تۋرالى ماسەلە كوتەرىلىپ، ول ماسەلە ءوزىڭىزدىڭ الدىڭىزعا بارعان سوڭ، باتىل قادامدار جاساپ، بەلگىلى دارەجەدە ودان قورتىندى شىعارۋعا ىقپال ەتپەسەڭىز، وندا ءسىزدىڭ موينىڭىزداعى ماناعى مورالدىق جاۋاپكەرشىلىكتىڭ سالماعى باتپانداپ اۋىرلاي تۇسەرى حاق.

وسى ورايدا پرەزيدەنتتىڭ تاريحي ورنى جونىندە دە باسا ايتا كەتۋگە تۋرا كەلىپ تۇر.

ءوزىڭىز جاقسى بىلەسىز، 1975 جىلعى كسرو-نىڭ سىرتقى ىستەر مينيسترلىگىندە باستالعان ديپلوماتيالىق قىزمەتتەن باستاپ ەسەپتەسەك، قاسىم-جومارت كەمەلۇلىنىڭ قىزمەتتىك ءوتىلى 49 جىلدى قۇرايدى ەكەن.

وسىناۋ جارتى عاسىرلىق اسا جاۋاپتى قىزمەتتەردە ءجۇرىپ، ءوزىن ساف التىنداي تاپ-تازا ۇستاعان قاسەكەڭنىڭ ەرتەڭگى تاريحي ورنى جونىندە ونىڭ اينالاسىندا جۇرگەن، سەنىم ارتقان ىنىلەرى مەن قارىنداستارى بۇگىننەن باستاپ ويلانۋى، بۇگىننەن باستاپ باتىل شەشىمدەر جاساۋعا ىقپال ەتۋلەرى كەرەك!

قاسىم-جومارت كەمەلۇلى 2011 جىلعى ناۋرىزدا بۇۇ باس حاتشىسىنىڭ ورىنباسارى، بۇۇ-نىڭ جەنەۆاداعى بولىمشەسىنىڭ باس ديرەكتورى، سونداي-اق قارۋسىزدانۋ جونىندەگى كونفەرەنتسيادا بۇۇ باس حاتشىسىنىڭ جەكە وكىلى بولىپ تاعايىندالدى. سونىمەن قاتار قارۋسىزدانۋ جونىندەگى كونفەرەنتسيانىڭ باس حاتشىسى لاۋازىمىن اتقاردى. تمد-نىڭ جانە شانحاي ىنتىماقتاستىق ۇيىمىنىڭ سىرتقى ىستەر مينيسترلەرى كەڭەسىنىڭ توراعاسى بولىپ سايلاندى.

ال، 2013 جىلعى 16 قازاندا قاسەكەڭ قازاقستان رەسپۋبليكاسى پارلامەنت سەناتىنىڭ توراعاسى بولىپ قايتا سايلانعاندا، «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» زاڭى الدەقاشان قابىلدانىپ كەتكەن بولاتىن.

ءوزىڭ سايلاعان، ءوزىڭ قول استىندا اسا جاۋاپتى جانە جوعارى لاۋازىمدى ورىندا قىزمەت ەتكەن پرەزيدەنتتىڭ ەرتەڭگى تاريحي ورنى تۋرالى بۇگىننەن باستاپ ويلانۋ، ارەكەتتەر جاساۋ كەرەكتىگىن تۇڭعىش پرەزيدەنتتىڭ تاعدىرى انىق كورسەتكەن جوق پا؟!

«ۋرااااا!!!»-لاپ ءجۇرىپ ورناتقان ەسكەرتكىشتەر ەش ەس قاتپايدى ەكەن. ءبىر جىل وتپەي جاتىپ، قۇلاپ قالدى.

«ۋرااااا!!!»-لاپ ءجۇرىپ بەرگەن قالا مەن باسقا دا نىسان اتاۋلارى دا سەپ بولمايدى ەكەن. ءوز قولدارىڭىزبەن بەرىپ، كەلەسى جىلى ءوز قولدارىڭىزبەن قايتارىپ الدىڭىزدار.

ءسويتىپ، «ۋرااااا!!!»-لاعان توپ تۇڭعىش پرەزيدەنتتىڭ ابىرويىن ودان ارى توكتى...

داۋ جوق، قازاقستاندى تۇرالاتىپ كەلگەن جانە قازىر دە تۇرالاتىپ تۇرعان – وسى ۋزۋرپاتسيا!

ەرلان قارين باس بولىپ جوباسىن جاساعان 2022 جىلعى ساياسي رەفورما قاسىم-جومارت كەمەلۇلىنىڭ تاريحي ورنىن ساقتاي المايتىنى انىق بەلگىلى بولدى.

ەگەر، مەملەكەتىمىزدەگى ەكىنشى ادام – ءسىز باستاپ، ەرلان قوشانوۆ پەن ولجاس بەكتەنوۆ قوشتاپ، قازاقستاننىڭ ۋزۋرپاتسيالانعان مەملەكەت ەكەنىن تۇراقتاندىرۋ جونىندە باستاما كوتەرىپ، ول باستامالارىڭىز وڭ شەشىمىن تاۋىپ جاتسا، وندا بۇل تاريحي شەشىم تاعى ءبىر جاعىنان قازىرگى پرەزيدەنتتىڭ تاريحي ورىن تۇراقتاندىرۋ ءۇشىن دە ماڭىزدى رول اتقاراتىن دا ەسكەرگەن ءجون.

ەگەر، قازاقستاننىڭ ۋزۋرپاتسيالانعان مەملەكەت ەكەنى مويىندالسا، وندا قازاقستاننىڭ شىن مانىندەگى جاڭا ءداۋىرى باستالادى. پرەزيدەنت قاسىم-جومارت توقاەۆتىڭ دا تاريحي ورنى وزدىگىنەن ايقىندالا باستايدى...

قۇرمەتتى ماۋلەن ساعاتحانۇلى!

ءوزىڭىز جاقسى بىلەسىز، قازاقتا «قولىڭمەن ىستەگەڭدى، موينىڭمەن كوتەر!» جانە «تۇيەنىڭ ۇلكەنى كوپىردە تاياق جەيدى!» دەگەن كيەلى سوزدەر بار.

ارينە، مەن بۇل ماقالداردى سىزگە ءبىر جاعى ءازىل رەتىندە ايتىپ جاتىرمىن. ويتكەنى، مەن ءسىزدىڭ زامانداسىڭىزبىن عوي...

بىراق، قالاي دەسەك تە، بۇل جەردە ءسوزسىز ءسىزدىڭ باستاماڭىزدىڭ كەرەك ەكەنى بەلگىلى. ەندى شەگىنەرگە جول جوق، مەملەكەتتىڭ تىعىرىققا تىرەلىپ تۇرعانىن ءوزىڭىز دە ىشتەي سەزىپ، ءبىلىپ وتىرسىز دەپ ويلايمىن.

ونىڭ ۇستىنە، ەكى پرەزيدەنتتى ءبىر شىبىقپەن ايداۋ — بارىپ تۇرعان، ادىلەتسىزدىك بولادى!

سول ءۇشىن، سىزدەن مەنىڭ «قازاقستان – ۋزۋرپاتسيالانعان مەملەكەت» اتتى ماقالام مەن وعان قوسا تىركەلگەن ەكى حاتتا كوتەرىلگەن ۋزۋرپاتسيا ماسەلەسىن العاشقى ادىمدا سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىندە تالقىلاۋعا ىقپال ەتۋىڭىزدى وتىنەمىن.

قۇرمەتپەن،

اۋىت مۇقيبەك،

«قۇرمەت» وردەنىنىڭ يەگەرى    

Abai.kz

26 پىكىر