يساتاي اۋدانىندا اتىراۋ وبلىسىنىڭ اكىمى نۇرلان نوعاەۆتىڭ توراعالىعىمەن وتكەن كوشپەلى جيىندا جەرگىلىكتى ءونىم ساپاسىنىڭ ماسەلەسى تالقىلاندى، دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.

جيىن بارىسىندا نۇرلان نوعاەۆ اۋىلداعى كاسىپكەرلىكتى دامىتۋدا وندىرۋشىلەردى كولەمدى ەمەس، وندىرىلگەن تاۋارلار مەن قىزمەتتەردىڭ ساپاسىن قاداعالاۋعا شاقىردى، ويتكەنى وسى جاعدايدا عانا سۇرانىس پەن باسەكەلەستىك جوعارى بولادى.

- تۇتىنۋشىلار سىزدەردەن ساپالى ءونىم كۇتەدى.ولاردى ونىمدەگى ەكى نارسە قىزىقتىرادى – بۇل ءتيىمدى باعا جانە جاقسى ساپا. مەيلى، وندىرىلگەن تاۋار كولەمى از بولسىن، بىراق ساپاسى جوعارى بولعانى ابزال. مىنە، ناقتى ماقسات. جاقسى ءونىم بولسا، وعان سۇرانىس تا جوعارى بولادى. سول ءونىمدى عانا دۇكەندەردەن ىزدەيدى. بارلىعى ەستيتىندەي برەند جاساپ شىعارۋ كەرەك. ساپا ماسەلەسى بۇگىندە باستى ورىندا،- دەپ اتىراۋ وبلىسىنىڭ اكىمى جەرگىلىكتى كاسىپكەرلەردى ساپا ماسەلەسىن باقىلاۋعا شاقىردى.

جيىن قورىتىندىسى بويىنشا ءتيىستى اتقارۋشى ورگاندار باسشىلارىنا وڭىردەگى شاعىن جانە ورتا بيزنەستى دامىتۋ بارىسىندا تاپسىرمالار جۇكتەلدى.

ايتا كەتۋ كەرەك، بۇگىنگى كۇنى اتىراۋ وبلىسى شاعىن جانە ورتا كاسىپكەرلىك سالاسىندا ءوندىرىستىڭ ءوسۋ قارقىنى بويىنشا رەسپۋبليكادا كوش باستاپ تۇر. 2017 جىلى وڭىردە شاعىن جانە ورتا كاسىپكەرلىك سۋبەكتىلەرىنىڭ ونىمدەرى مەن قىزمەتتەرىنىڭ كولەمى 1 تريلليون 100 ميلليارد تەڭگەنى قۇرادى. بۇل 2016 جىلعا قاراعاندا ءبىر جارىم ەسەگە ارتىق.

Abai.kz