قر ەنەرگەتيكا مينيسترلىگى  سوڭ ۋاقتا كومىرگە قاتىستى جيەلەپ كەتكەن قاۋەسەتتەر مەن الەۋمەتتىك جەلىلەردە جانە مەسسەندجەرلەردەگى جالعان اقپاراتقا بايلانىستى مىناداي ماعلۇماتتى جاريا ەتەدى.

ەلىمىزدە حالىقتى كومىرمەن قامتاماسىز ەتۋگە قاتىستى جاعداي تۇراقتى. قازاقستاننىڭ بىردە-ءبىر وڭىرىندە قاتتى وتىنعا تاپشىلىق جوق، ەشقانداي دۇرلىكپە بايقالمايدى.

تۇيىقتارداعى ۇلكەن كەزەكتەر جانە جۇك ماشينالارىنىڭ تالاسۋى جونىندەگى تاراتىلىپ جاتقان ۆيدەولار فەيك جانە قازىرگى ۋاقىتتاعى جاعدايعا سايكەس كەلمەيدى. سونىمەن قاتار قر ەنەرگەتيكا مينيسترلىگى وبلىس اكىمدىكتەرىمەن جانە «قازاقستان تەمىر جولى» ۇك اق-مەن بىرلەسىپ وڭىرلەرگە كومىردى جەتكىزۋگە تاۋلىك سايىنعى مونيتورينگ جۇرگىزۋدە، بۇل ماسەلە تۇراقتى باقىلاۋدا.

2017 جىلى ەلىمىزدە 106,7 ملن. توننا كومىر ءوندىرىلدى، بۇل 2016 جىلعى كورسەتكىشتەن 8,2 ملن. تونناعا ارتىق، ەكسپورتقا 29,3 ملن. توننا كومىر شىعارىلدى. قالعان كومىر ىشكى قاجەتتىلىككە جۇمسالدى.

وسى ورايدا قازاقستاننىڭ ەنەرگيا ءوندىرۋشى ۇيىمدارىنا 56,3 ملن. توننا، ياعني 2016 جىلمەن سالىستىرعاندا 7,1 ملن. تونناعا ارتىق كومىر بەرىلدى.

جەدەل دەرەكتەرگە سايكەس 30 قاڭتارعا دەيىنگى مەرزىمدە وندىرىلگەن كومىر كولەمى 8,6 ملن. توننانى قۇرادى.

تۇتىنۋشىلارعا كوممۋنالدىق-تۇرمىستىق قاجەتتىلىككە 763,8 مىڭ.توننا كومىر جىبەرىلدى، ياعني الدىڭعى جىلدىڭ سايكەس كەزەڭىمەن سالىستىرعاندا 72%.

«قازاقستان تەمىر جولى» اق مالىمەتىنە سايكەس 2018 جىلدىڭ 30 قاڭتارىنا دەيىنگى مەرزىمدە تەمىر جول كولىگىمەن كوممۋنالدىق-تۇرمىستىق قاجەتتىلىككە جانە حالىققا 457,2 مىڭ توننا كومىر جونەلتىلدى. اۆتوكولىكپەن 300 مىڭ توننا كومىر ءتۇسىرىلدى.

2018 جىلعى 30 قاڭتارداعى جاعداي بويىنشا قر ەنەرگەتيكا مينيسترلىگىنىڭ جەدەل مالىمەتتەرىنە سايكەس كومىردىڭ قورى مەن جەتكىزىلۋى وبلىستار بويىنشا تومەندە بەرىلگەن:

اقمولا وبلىسى – 85,9 مىڭ توننا; استانا ق. – 17,2 مىڭ توننا; اقتوبە وبلىسى – 2,1 مىڭ توننا; الماتى وبلىسى – 77,4 مىڭ توننا; الماتى ق. – 6,8 مىڭ توننا; شىعىس قازاقستان وبلىسى – 114,7 مىڭ توننا; جامبىل وبلىسى – 8,9 مىڭ توننا; قاراعاندى وبلىسى – 53,0 مىڭ توننا; قوستاناي وبلىسى – 24,3 مىڭ توننا; پاۆلودار وبلىسى – 9,8 مىڭ توننا.

Abai.kz