كابۋلداعى Intercontinental قوناق ۇيىنە جاسالعان شابۋىلدان 1978 جىلى تۋعان قازاقستان ازاماتى مەرت بولعان. بۇل تۋرالى قازاقستان سىرتقى ىستەر مينيسترلىگىنىڭ رەسمي وكىلى ءانۋار جايناقوۆ Facebook پاراقشاسىندا حابارلادى.

"اۋعانستاننان سۋىت حابار جەتتى. كابۋلداعى Intercontinental قوناق ۇيىنە جاسالعان شابۋىلدان 1978 جىلى تۋعان قازاقستان ازاماتى قازا تاپتى. جاقىندارىنا قايعىرىپ كوڭىل ايتامىز. قازاقستان سىرتقى ىستەر مينيسترلىگى مارقۇمنىڭ دەنەسىن ەلگە اكەلۋ جاعىن ۇيىمداستىرادى" دەپ جازىلعان حابارلامادا.

كابۋل پوليتسيياسىنىڭ حابارلاۋىنشا، شابۋىلدان كەم دەگەندە 18 ادام مەرت بولعان. ولاردىڭ اراسىندا توعىز ۋكراينا ازاماتى، ءبىر گەرمانيا، ءبىر گرەكيا ازاماتى دا بار. مەرت بولعانداردىڭ سانى ارتۋى مۇمكىن.

اۋعانستان ىشكى ىستەر مينيسترلىگى 21 قاڭتاردا كابۋلداعى Intercontinental قوناق ۇيىندەگى اسكەري وپەراتسيا اياقتالىپ، ءۇش سودىردىڭ كوزى جويىلعانىن حابارلاعان. 12 ساعاتتىق وپەراتسيا كەزىندە قوناق ۇيدەن 150 استام ادام قۇتقارىلعان. ولاردىڭ قىرىققا جۋىعى - شەتەلدىكتەر.

20 قاڭتاردا كابۋلداعى ەڭ ءىرى قوناق ءۇيدى بىرنەشە قارۋلى ادام باسىپ العانى حابارلانعان. ال "تاليبان" ۇيىمى شابۋىلدى بەس ادام ۇيىمداستىرعانىن ايتتى.

Abai.kz