جۇما, 21 ماۋسىم 2024
جاڭالىقتار 1147 12 پىكىر 18 مامىر, 2024 ساعات 14:34

پرەزيدەنت توقاەۆ: قازاقستاننىڭ دامۋ جولى جانە ۇلتتىق قۇرىلتايدىڭ ماڭىزى (ناتيجەلەرگە شولۋ)

ءاربىر حالىقتىڭ تاريحىندا جەكە باسى مەن قىزمەتى ءداۋىردىڭ سيمۆولىنا اينالاتىن كوشباسشىلار بولادى. بەس جىل بويىقازاقستان رەسپۋبليكاسىنىڭ پرەزيدەنتى قىزمەتىن اتقارىپ كەلە جاتقان قاسىم-جومارت توقاەۆ قازاقستاننىڭ جارقىن بولاشاعىنا ۇمتىلىسى ەل دامۋىنىڭ جاڭا كەزەڭىنە باستاۋ بولا الدى دەپ ايتۋعا بولادى. دەگەنىمەن، پرەزيدەنتتىڭ بەس جىلدا اتقارعان جۇمىستارىنىڭ ىشىندە مەملەكەتتىڭ ساياسي باعدارى، ماقساتى وزگەردى، مەملەكەت بارلىق ىستەرىن حالىقتىڭ جاعدايىن جاساۋعا بۇردى. بۇل مەملەكەتتىك ساياسات تەك ەكونوميكالىق جاعدايدى جاقسارتۋعا عانا ەمەس، مەملەكەتتەگى حالىقتىڭ مەملەكەتتىك ساياساتقا قاتىسۋىن، مەملەكەتتىڭ حالقىنىڭ الەۋمەتتىك جاعدايىن جاساۋعا باعىتتالعاندىعىن دا كورۋىمىزگە بولادى.

پرەزيدەنتتىڭ بەس جىلدا اتقارعان جۇمىستارىنىڭ ناتيجەلەرىن، قازاقستاننىڭ حالىقارالىق رەيتينگىلەردەگى العان ورنى مەن ۇپايىن، ۇلتتىق قۇرىلتاي قۇرۋ باستاماسى مەن وندا قارالعان ماسەلەلەر تۋرالى وسى ماقالادا شولۋ جاسايتىن بولامىز، دەگەنىمەن وسى كەزدە قاسىم-جومارت توقاەۆتىڭ ارەكەتتەرىنەن كورىنگەن جەكە دە قاسيەتتەرىنە توقتالۋ دا ماڭىزدى دەگەن ويدامىن. ونىڭ بىرەگەي جەكە قاسيەتتەرىنە تەرەڭ اقىل، ماقساتقا ۇمتىلۋىن جانە قازاقستاندىقتاردىڭ رۋحاني جان دۇنيەسىن وزگەرتۋگە، جاعدايىن جاقسى جاققا وزگەرتۋگە دەگەن شىنايى ۇمتىلىس كورۋگە بولادى. بۇل قاسيەتتەر كوپتەگەن ماڭىزدى وزگەرىستەر مەن رەفورمالاردى جۇزەگە اسىرۋعا، ولاردىڭ ورىندالۋىنا جانە حالىق اراسىندا قازاقستاننىڭ جارقىن بولاشاعىنا دەگەن ءۇمىتى مەن سەنىمىنىڭ تۋىنداۋىنا الىپ كەلدى. كەلەسى ماڭىزدى قاسيەتتىڭ ءبىرى، ول توقاەۆتىڭ كوشباسشىلىق فيلوسوفياسىنىڭ قوعامنىڭ ۇيلەسىمدى دامۋىنا ۇمتىلۋىندا، ياعني ءداستۇرلى قۇندىلىقتاردى قايتا قالىپتاستىرۋداعى زاماناۋي قۇندىلىقتارمەن ۇيلەسىمدىلىكتى تابۋىندا،  سونىمەن قوسا زاماناۋي سىن-قاتەرلەردى شەشۋدەگى جۇيەلى شەشىمدەردى ورىنداۋدىڭ ءتيىمدى تەتىكتەرىن تابا بىلۋىندە دەگەن ويدامىن. وسى ۋاقىتقا دەيىن بولعان سىن-قاتەرلەردى, جينالىپ قالعان ماسەلەلەردى شەشۋگە باعىتتالعان ارەكەتتەرى ساياسي كورەگەندىكتى عانا ەمەس، سونىمەن قاتار ءار ازاماتتىڭ قاجەتتىلىكتەرى مەن ۇمتىلىستارىن تەرەڭ تۇسىنەتىندىگىن كورسەتتى.

پرەزيدەنت توقاەۆ حالقىمەن كەزدەسۋى كەزىندە ءاردايىم بايقالاتىنى، ونىڭ قاراپايىمدىلىعى مەن ادامگەرشىلىگىنىڭ، تاربيەلىگىنىڭ كورىنۋىندە. حالقىنىڭ ونىڭ تۇلعالىعىن كوتەرۋ ءۇشىن جاسالىنعان ارەكەتتەرگە قارسىلىعى دا، ونىڭ باعالانۋى كەرەك قاسيەتتەرىنىڭ ءبىرى دەگەن ويدامىز. وسىلايشا، بۇل ماقالادا قاسىم-جومارت توقاەۆتىڭ قازاقستان پرەزيدەنتى وكىلەتتىلىگىن اتقارۋ تۇسىندا جاساعان ماڭىزدى شارالارىن جانە قازاقستاندىقتاردىڭ ادامي قۇندىلىقتارىن ادىلەتتىلىككە باعىتتاۋدا اتقارعان شارالارى، ياعني ونىڭ ىشىندە ۇلتتىق قۇرىلتايدا كوتەرگەن ماسەلەلەرى مەن ونى شەشۋدەگى جۇمىستارى ارقىلى حالىقتىڭ قۇندىلىقتارىن قالىپتاستىرۋداعى ارەكەتتەرىنە شولۋ جاسالاتىن بولادى.

1. توقاەۆتىڭ پرەزيدەنتتىك وكىلەتتىلىكتى اتقارۋى كەزىندەگى قازاقستاننىڭ حالىقارالىق رەيتينگتەردە كورسەتكەن جەتىستىكتەرى

بيىل قازاقستاننىڭ تاۋەلسىز مەملەكەت اتانعانىنا 33 جىل بولادى، وسى جىلداردىڭ ىشىندە كوپتەگەن وزگەرىستەر مەن دامۋ ورىن الدى. دەگەنىمەن الىدە بولسا «ءبىزدىڭ مەملەكەتىمىزدى دامىتۋعا، جارقىن بولاشاعىن قالىپتاستىرۋ ءۇشىن نە ىستەۋىمىزگە بولادى؟» دەگەن سۇراقتى ارقايسىمىز وزىمىزگە قويىپ، مەملەكەتتىڭ دامۋىنا ۇلەس قوسۋىمىز كەرەك. بۇل سۇراق ءاردايىم ءبىزدىڭ نازارىمىزدا بولۋ مىندەتتى، ال وسى مىندەتكە جەتۋ كەزىمىزدە ءبىزدىڭ مەملەكەتىمىز جەتكەن جەتىستىكتەردى، ناقتى ناتيجەلەردى دە ۇمىتپاۋىمىز كەرەك.

قاسىم-جومارت توقاەۆتىڭ پرەزيدەنتتىگىنىڭ بەس جىلىندا قازاقستان ءتۇرلى حالىقارالىق رەيتينگتەردە ايتارلىقتاي جەتىستىكتەرگە جەتتى. دەگەنىمەن، قاسىم-جومارت توقاەۆتىڭ پرەزيدەنتتىك قىزمەتكە دەيىنگى كەزدە قازاقستان ءۇشىن اتقارعان جۇمىستارىن، ەلىمىزدىڭ سىرتقى ىستەر ساياساتىن جۇرگىزۋ كەزىندەگى ەڭبەگىن دە ۇمىتپاۋ ماڭىزدى. بۇل جەتىستىكتەر پروگرەسس پەن تۇراقتى دامۋعا ۇمتىلعان ۇكىمەت پەن حالىقتىڭ بىرلەسكەن كۇش-جىگەرىنىڭ ارقاسىندا مۇمكىن بولدى. بۇل شولۋدا ءبىز قازاقستاننىڭ سوڭعى جىلدارداعى نەگىزگى حالىقارالىق رەيتينگتەردەگى پوزيتسياسى قالاي وزگەرگەنىن جانە ەلدە قانداي ماڭىزدى وزگەرىستەر بولعانىن قاراستىرامىز.

توقاەۆتىڭ بەس جىلدىق پرەزيدەنتتىگى بارىسىندا قازاقستاننىڭ حالىقارالىق رەيتينگتەردەگى ۇستانىمدارى ماڭىزدى وزگەرىستەردى كورسەتۋدە. قازاقستاننىڭ ءجىو ءوسىمى ماڭىزدى ەكونوميكالىق كورسەتكىش بولىپ تابىلادى, بۇل كورسەتكىش 2019 جىلعى 182 ميلليارد دوللاردان 2023 جىلى 259 ميلليارد دوللارعا دەيىن وسكەندىگى انىقتالىپ وتىر.

قازاقستانداعى ەكونوميكالىق وزگەرىستەردى 2023 جىلدىڭ توعىز ايىندا ەكونوميكاعا 19,7 ميلليارد دوللار تىكەلەي شەتەلدىك ينۆەستيتسيا ءتۇسكەنىنەن كورۋگە بولادى. بۇل ساندار قازاقستان ەكونوميكاسى كوروناۆيرۋستىق پاندەميا مەن گەوساياسي تۇراقسىزدىقتان تۋىنداعان كۇردەلى سىرتقى جاعدايلارعا ءساتتى بەيىمدەلگەنىن كورسەتەدى. ينۆەستيتسيالار نەگىزىنەن ونەركاسىپ سەكتورىنا باعىتتالعان, بۇل پرەزيدەنت توقاەۆتىڭ 7 اقپانداعى ۇكىمەتتىڭ كەڭەيتىلگەن وتىرىسىنداعى تاپسىرمالارى اياسىندا ەرەكشە وزەكتى بولىپ وتىر. ول ەكونوميكانىڭ قۇرىلىمىن وزگەرتۋگە جانە ورنىقتى ونەركاسىپتىك بازانى قۇرۋعا قابىلەتتى «سەرپىندى»جوبالاردى ىسكە قوسۋ ارقىلى «ەلدىڭ ونەركاسىپتىك دامۋىنا جاڭا سەرپىن بەرۋ» قاجەتتىگىن اتاپ ءوتتى. ونىڭ ايتۋىنشا، ءىرى مۇناي-گاز جانە تاۋ-كەن مەتاللۋرگيا كومپانيالارى ۇلتتىق ەكونوميكانى وزگەرتۋ ءۇشىن تەحنولوگيالىق جاڭالىقتار ەنگىزۋى كەرەك. قازاقستاندىق اۆتوموبيل جاساۋدا بەلگىلى ءبىر جەتىستىكتەرگە قول جەتكىزىلدى جانە وسىعان ۇقساس كۇش-جىگەر وڭدەۋ ونەركاسىبىنىڭ باسقا دا پەرسپەكتيۆالى سالالارىن نىعايتۋ ءۇشىن قاجەت. ونەركاسىپتىڭ قارقىندى ءوسۋىنىڭ نەگىزگى شارتى ناقتى سەكتوردى ۇزاق مەرزىمدى وتىمدىلىكپەن قامتاماسىز ەتۋ بولىپ تابىلادى.

ونەركاسىپتىڭ دامۋى ايتارلىقتاي ينۆەستيتسيالاردى قاجەت ەتەدى جانە ناتيجەلەر قازىردىڭ وزىندە بار. 2022 جىلى ەكونوميكاعا 28 ميلليارد دوللار تارتىلدى، بۇل سوڭعى ونجىلدىقتاعى رەكورد. وتكەن جىلدىڭ قورىتىندىسى بويىنشا 27 ميلليارد دەڭگەي كۇتىلۋدە. ينۆەستيتسيالار شەتەلدەن دە، ىشكى جاعىنان دا كەلەدى. ۇلتتىق بانكتىڭ مالىمەتتەرى بويىنشا، 19,7 ميلليارد دوللارلىق ينۆەستيتسيانىڭ العاشقى ءۇش توقسانىندا ونىڭ كوپ بولىگى – 43% – تاۋ- كەن ونەركاسىبىنە، ال وڭدەۋ ونەركاسىبىنە - 20% باعىتتالدى.

ال قازاقستاننىڭ دامۋىنداعى وزگەرىستەر تۋرالى باسقا دا اقپاراتتاردى، كەلەسى حالىقارالىق رەيتينگتەردەگى ناتيجەلەردەن كورسەتەمىز. 2019 جىلى قازاقستان باقىت يندەكسىندە 5,8 ۇپايمەن 60- ورىنعا يە بولدى، ال 2023 جىلى 6,1 ۇپايدان 44- ورىنعا كوتەرىلىپ، ءوز پوزيتسياسىن 16 ورىنعا جاقسارتتى. سالىستىرۋ ءۇشىن وزبەكستان 54- ءشى، قىرعىزستان 62- ءشى، مولدوۆا رەسپۋبليكاسى 63- ءشى، رەسەي 70- ءشى، ارمەنيا 79- شى، تاجىكستان 80- ءشى، ۋكراينا 92- ءشى ورىنعا يە بولدى.

سىبايلاس جەمقورلىقتى قابىلداۋ يندەكسىندە قازاقستان 2019 جىلى 113-ورىننان (34 ۇپاي) 2023 جىلى 93-ورىنعا (39 ۇپاي) كوتەرىلىپ، ءوز پوزيتسياسىن 20 ورىنعا جاقسارتتى. بۇل ءوسىم 2022 جىلعى قاڭتارداعى وقيعالاردان كەيىن ازاماتتىق قوعامنىڭ جاندانۋىنا بايلانىستى بولدى، سونىمەن قوسا بۇل مەملەكەتتىك ورگانداردى سىبايلاس جەمقورلىققا قارسى رەفورمالار جۇرگىزۋءدىڭ, اكتيۆتەردى قايتارۋعا جانە جوعارى لاۋازىمدى شەنەۋنىكتەر مەن ولاردىڭ تۋىستارىن جەمقورلىق ىستەرى بويىنشا تەكسەرۋ، باقىلاۋ مەن جاۋاپقا الۋ شارالارىنىڭ قابىلداۋىنان ورىن العان ناتيجە.

جاھاندىق باسەكەگە قابىلەتتىلىك يندەكسىندە قازاقستان 2019 جىلى 55-ورىننان (62,9 ۇپاي) 2023 جىلى 37-ورىنعا (66,1 ۇپاي) كوتەرىلىپ، ءوز پوزيتسياسىن 18 ورىنعا جاقسارتتى. «ەكونوميكالىق قىزمەت» فاكتورى بويىنشا ايتارلىقتاي جاقسارۋ بايقالادى، وندا قازاقستان كەلەسى سۋبفاكتورلارداعى ءوسىمنىڭ ارقاسىندا 57-ءشى ورىنعا يە بولدى: ءبىرىنشى ول، حالىقارالىق ساۋدا 46-شى ورىن (15 پۋنكتكە ءوسۋ), بۇل تولەم بالانسىنىڭ اعىمداعى شوتىنىڭ پروفيتسيتىمەن تۇسىندىرىلەدى (2023 جىلى ءجىو 3,7%, ال 2019 جىلى بۇل تەك 2,97% كورسەتكەن) جانە ساۋدا شارتتارىنىڭ يندەكسىن جاقسارتۋ (58-دەن 6-ورىنعا دەيىن). ەكىنشىدەن، سىرتقى ينۆەستيتسيالار بويىنشا ينۆەستيتسيالىق اكتيۆتەر پورتفەلىنىڭ (2022 جىلى6,71 ميلليارد دوللاردان 2023 جىلى 1,2 ميلليارد دوللارعا دەيىن) جانە ينۆەستيتسيالىق مىندەتتەمەلەر پورتفەلىنىڭ (2022 جىلى 1,42 ميلليارد دوللاردان 2023 جىلى 2,38 ميلليارد دوللارعا دەيىن) وڭ ديناميكاسىنىڭ ارقاسىندا 43- ءشى ورىندا (11 پۋنكتكە ءوستى).

قازاقستاننىڭ الەۋمەتتىك پروگرەسس يندەكسى دە جاقساردى، 2019 جىلى 69-ورىننان (68,2 ۇپاي) 2023 جىلى 63-ورىنعا (69,7 ۇپاي) دەيىن، 6 ورىنعا جاقساردى. ساراپشىلار كەلەسى ارتىقشىلىقتار مەن قىزمەتتەردىڭ بولۋىنا بايلانىستى بۇل رەيتينگىدەگى ورنىمىزدىڭ جوعارىلاعانىن اتاپ وتۋدە، ياعني، ورتا مەكتەپتەگى بالالاردىڭ ۇلگەرىمى (99,9 ۇپايمەن الەمدە 6-ورىن) جانە ونلاين- ۇكىمەتكە قولجەتىمدىلىك (15-ورىن جانە 80,7 ۇپاي) سياقتى قازاقستاننىڭ باسەكەلەستىك ارتىقشىلىقتارىن اتاپ وتەدى. ءالسىز جاقتارى اراسىندا مەكتەپ ءبىلىمى جوق حالىق (26- شى جانە 99,4 ۇپاي), عالامتور قولدانۋشىلار سانى (26-شى جانە 92,3 ۇپاي), ماتەريالداردى قايتا وڭدەۋ (164-ءشى جانە 3,8 ۇپاي), بەيبىت جينالىس بوستاندىعى (144-ءشى جانە 31,3 ۇپاي), جانە ءومىر ءسۇرۋ ۇزاقتىعى 60 جىل (130-شى جانە 19,5 ۇپاي)كورسەتكىشتەرى بويىنشا ماسەلەلەردىڭ بار ەكەندىگىن ايتۋعا بولادى.

قاسىم-جومارت توقاەۆتىڭ پرەزيدەنتتىگىنىڭ بەس جىلىندا قازاقستان ءتۇرلى حالىقارالىق رەيتينگتەردە ايتارلىقتاي جەتىستىكتەرگە جەتتى. بۇل جەتىستىكتەر پروگرەسس پەن تۇراقتى دامۋعا ۇمتىلعان ۇكىمەت پەن حالىقتىڭ بىرلەسكەن كۇش-جىگەرىنىڭ ارقاسىندا مۇمكىن بولدى.

2. ۇلتتىق قۇرىلتايدىڭ قازاقستان ءۇشىن ماڭىزى

2022 جىلى قازاقستان پرەزيدەنتى قاسىم- جومارت توقاەۆ حالقىنا جولداۋىندا جاڭا قوعامدىق ينستيتۋت ۇلتتىق قۇرىلتاي قۇرۋ تۋرالى باستاما كوتەردى. بۇل ماڭىزدى قادام القالى شەشىم قابىلداۋدىڭ تاريحي داستۇرلەرى اياسىندا جانە قوعامنىڭ مەملەكەت ىستەرىنە بەلسەندى قاتىسۋ تۋرالى وتىنىشىنە جاۋاپ رەتىندە قابىلداندى. ۇلتتىق قۇرىلتاي مۇددەلەر مەن پىكىرلەردىڭ ارتۇرلىلىگىن كورسەتەتىن قوعامنىڭ ءارتۇرلى توپتارى اراسىنداعى تىكەلەي ديالوگ الاڭى رەتىندە ويلاستىرىلعان. ونىڭ ماقساتى قولدانىستاعى قوعامدىق ينستيتۋتتاردىڭ فۋنكتسيالارىن تولىقتىرۋ عانا ەمەس، سونىمەن قاتار ەل دامۋىنىڭ ستراتەگيالىق باعىتتارىن قالىپتاستىرۋعا جانە قوعامدىق قۇندىلىقتاردى جانداندىرۋعا بەلسەندى قاتىسۋ بولدى. ناتيجەسىندە ۇلتتىق قۇرىلتاي ازاماتتىق قوعامدى نىعايتۋعا جانە قازىرگى زاماننىڭ سىن-قاتەرلەرىن ويداعىداي ەڭسەرۋ جانە ۇلتتىق ماقساتتارعا قول جەتكىزۋ ءۇشىن بىرىڭعاي جالپىۇلتتىق كەلىسىمدى قالىپتاستىرۋعا باعىتتالعان قازاقستاننىڭ ساياسي ەۆوليۋتسياسىنداعى ماڭىزدى كەزەڭ بولىپ تۇر.

قازىرگە دەيىن ءۇش رەت ۇلتتىق قۇرىلتاي وتكىزىلدى، جيىننىڭ ەكىنشى وتىرىسى كەزىندە قاسىم-جومارت توقاەۆتىڭ جاساعان بايانداماسىنا شولۋ جاسايتىن بولساق، كەلەسى ماڭىزدى ساتتەردى اتاپ وتۋىمىزگە بولادى:

ءبىرىنشى ۇلتتىق قۇرىلتاي

ءبىرىنشى قۇرىلتاي ۇلىتاۋدا 2022 جىلدىڭ ماۋسىم ايىندا ءوتتى. وسى وتىرىستا توقاەۆ ەل ءۇشىن نەگىزگى باسىمدىقتاردى اتاپ ءوتتى، ولاردىڭ اراسىندا الەۋمەتتىك بىرلىكتى نىعايتۋ جانە سىبايلاس جەمقورلىققا قارسى كۇرەستى كۇشەيتۋ بولدى. پرەزيدەنت سونىمەن قاتار مادەني مۇرا مەن ۇلتتىق بىرەگەيلىكتى ساقتاۋ مەن دامىتۋدىڭ ماڭىزدىلىعىن اتاپ ءوتتى. ءبىلىم بەرۋ جۇيەسىن رەفورمالاۋ جانە جاس ۇرپاققا جاعداي جاساۋ ماسەلەلەرىنە ەرەكشە نازار اۋدارىلدى.

ەكىنشى ۇلتتىق قۇرىلتاي

2023 جىلدىڭ ماۋسىم ايىندا تۇركىستاندا وتكەن ەكىنشى قۇرىلتاي «ءاءدىلەتتى قازاقستاندى» قۇرۋ جانە جاۋاپتى ازاماتتاردى تاربيەلەۋ ماسەلەلەرىنە ارنالدى. توقاەۆ ناقتى وزگەرىستەرگە قول جەتكىزۋ ءۇشىن قوعامنىڭ قۇندىلىقتارى مەن مىنەز-قۇلقىن جاڭعىرتۋدىڭ ماڭىزدىلىعىن اتاپ ءوتتى. الەۋمەتتىك ەتيكا، قۇقىقتىق ءتارتىپ جانە جاۋاپكەرشىلىك ماسەلەلەرى تالقىلاندى. پرەزيدەنت سونىمەن قاتار مەملەكەتتىك رامىزدەردى جاقسارتۋ جانە مەملەكەتتىك ناگرادالار جۇيەسىن نىعايتۋ قاجەتتىگىنە نازار اۋداردى.

ءۇشىنشى ۇلتتىق قۇرىلتاي

2024 جىلدىڭ ناۋرىز ايىندا اتىراۋدا وتكەن ءۇشىنشى قۇرىلتاي قازاقستاننىڭ ۇلتتىق مۇددەلەرى مەن ەگەمەندىگىنە نازار اۋداردى. توقاەۆ جاھاندىق وقيعالاردى جانە ولاردىڭ ەلدىڭ ۇلتتىق مۇددەلەرىنە اسەرىن تالداۋدىڭ ماڭىزدىلىعىن اتاپ ءوتتى. نەگىزگى تاقىرىپتار ستراتەگيالىق تۇراقتىلىق، ساياسي جۇيەنىڭ تيىمدىلىگى جانە حالىقارالىق ىنتىماقتاستىقتى كۇشەيتۋ ماسەلەلەرى بولدى. سونداي-اق، پرەزيدەنت ازاماتتىق قوعامدى جانداندىرۋ جانە بەرىك ونەركاسىپتىك نەگىز مەن تەحنولوگيالىق ءوسۋدىڭ جاڭا نۇكتەلەرىن قۇرۋعا باعىتتالعان ەكونوميكالىق رەفورمالاردى جالعاستىرۋ قاجەتتىگىن ايتقان بولاتىن.

پرەزيدەنت توقاەۆتىڭ باسشىلىعىمەن ۇلتتىق قۇرىلتايوتىرىستارى وزەكتى ماسەلەلەردى تالقىلاۋ جانە ەل دامۋىنىڭ ستراتەگيالىق باعىتتارىن ازىرلەۋ ءۇشىن ماڭىزدى تۇعىرناماعا اينالدى. ولار ۇلتتىق بىرەگەيلىكتى نىعايتۋعا، جاستار الەۋەتىن دامىتۋعا جانە ءادىل قوعامدى قالىپتاستىرۋعا ىقپال ەتەدى. بۇل جەتىستىكتەر مەملەكەت پەن حالىقتىڭ بىرلەسكەن كۇش-جىگەرىنىڭ ارقاسىندا مۇمكىن بولدى، بۇل قازاقستاننىڭ وركەندەۋى ءۇشىن قوعامدىق ديالوگ پەن ۇجىمدىق جۇمىستىڭ ماڭىزدىلىعىن كورسەتەدى.

قورىتىندىلاي كەلە, بۇل ماقالادا قاسىم-جومارت توقاەۆتىڭ قازاقستان پرەزيدەنتى وكىلەتتىلىگىن اتقارۋ كەزىندە اتقارعان جۇمىستارىنىڭ ناتيجەلەرىن كورسەتەتىن حالىقارالىق رەيتينگىلەردىڭ ناتيجەلەرى كورسەتىلدى. بۇل ورىندالعان جۇمىستىڭ ناتيجەسىن كورسەتىپ، سونىمەن قوسا قازاقستاننىڭ الداعى ۋاقىتتاردا جەتۋى كەرەك ماقساتتاردى ايقىنداپ، ءالسىز تۇستارىمىزدى دا ءبىر رەت كورسەتتى. بۇل رەيتينگىلەردەن باسقا، مەملەكەتتە ورىن العان وڭ وزگەرىستەردى حالىق تا ايتادى دەگەن ويدامىن. ال مەنىڭ ايتارىم مەملەكەتتءىڭ دامىپ كەلە جاتقاندىعىن كورسەتەتىن ماڭىزدى ناتيجەلەر مەن وزگەرىستەر بار، دەگەنىمەن قايتا قاراۋ كەرەك ماقساتتارىمىز دا بار، سوعان جوسپار قۇرۋىمىز كەرەك. ەكىنشىدەن، ماقالادا ۇلتتىق قۇرىلتايدى قۇرۋ كەرەك دەگەن باستامامەن, ونداعى پرەزيدەنت ايتقان ماقساتتاردىڭ دا ورىندالعاندىعى ايتىلدى. مەنىڭ ويىمشا، پرەزيدەنتتىڭ بۇل باستاماسى نەگىزىندە حالىقتىڭ رۋحاني دۇنيەسىن، قۇندىلىقتارىن قايتا قاراستىرۋ كەرەكتىگىمىزدى، سونىمەن قوسا قازاقستاننىڭ جارقىن بولاشاعىن قۇرۋدى وزىمىزدەن باستاۋىمىز كەرەكتىگىن، حالىقتىڭ مەملەكەتتىڭ دامۋىنا ۇلەس قوسۋى كەرەكتىگىن دە كورسەتەتىندىگى دە بار. ۇلتتىق قۇرىلتاي ايعا قاراپ، شىعىن شىعارىپ، جيىن جاسالاتىن الاڭ ەمەس ەكەندىگىن ءۇشىنشى رەت كورسەتتى. ياعني، حالىق ءۇشىن ماڭىزى بار ماسەلەلەر قاراستىرىلىپ كەلە جاتىر.

ءبىز, پرەزيدەنت قاسىم-جومارت توقاەۆ جۇزەگە اسىراتىن كەلەسى جوبالار، باستامالار مەن اتقارىلاتىن ىستەر، پرەزيدەنتءتىڭ مەملەكەتىمىزدىڭ دامۋىنا باستايتىن كەلەسى قادامى، ادىلەتتى قازاقستان قۇرۋداعى ناقتى باستامالارى دا قازاقستان ءۇشىن ءتيىمدى بولىپ، وڭ ناتيجە بەرەدى دەگەن ۇمىتتەمىز.

سۋرەت: akorda.kz

اينۇر باقىتجانوۆا

Abai.kz

12 پىكىر