بۇگىن استاناداعى Hilton Garden Inn Astana» قوناق ۇيىندە ەكسپو-2017 كورمەسى اياسىندا وتەتىن حالىقارالىق مارافونعا ارنالعان ءباسپاسوز ءماجىلىسى ءوتتى.

وسى جىلدىڭ 4 ساۋىرىندە قر مادەنيەت جانە سپورت مينيسترلىگى مەن شانحاي ىنتىماقتاستىق ۇيىمى (شىۇ)  جەڭىل اتلەتيكادان استانادا حالىقارالىق مارافون وتكىزۋ تۋرالى كەلسىمگە كەلگەن ەدى. بۇل مارافوندى قۇرىلعانىنا بيىلعى جىلى 25 جىل تولاتىن «ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ» (اوسشك) فورۋمىمەن بىرگە وتكىزۋ جوسپارلانعان.

استانادا وتكەن ءباسپاسوز ماجىلىسىنە قر مادەنيەت جانە سپورت مينيسترلىگىنىڭ  سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ، قر جەڭىل اتلەتيكا فەدەراتسياسىنىڭ ءبىرىنشى ۆيتسە-پرەزيدەنتى ەلدار تابانوۆ، «شانحە» مادەنيەت جانە سپورت كومپانياسىنىڭ توراعاسى چجان تسين قاتىستى.

– بيىلعى جىلدىڭ 27 تامىزىندا استانادا «ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ» فورۋمىمەن بىرگە مارافون وتكىزۋ تۋرالى شەشىم قابىلداندى. وزدەرىڭىز بىلەسىزدەر، ەكسپو-2017 كورمەسى اياسىندا كوپتەگەن حالىقارالىق سپورتتىق جارىستار ۇيىمداستىرىلادى. سونداي ماڭىزدى شارالاردىڭ ءبىرى استانا حالىقارالىق مارافونى دەپ وتىرمىز. مارافون – شانحاي ىنتىماقتاستىق ۇيىمىنىڭ قولداۋىمەن وتكىزگەلى وتىر. باس حاتشىسى راشيد اليموۆ مىرزامەن كەزدەسىپ، وسىنداي كەلىسىمگە كەلدىك. قىتاي تاراپى بەينەروليگىنەن باستاپ بارلىعىن ءتۇسىرىپ، حالىقارالىق ارەناعا تاراتاتىن بولادى. ول ەلدە بۇعان دەيىن مۇنداي ءىرى ماسشتابتاعى مارافون وتكەن. سوندىقتان كورشى ەلدىڭ مارافون ۇيىمداستىرۋداعى تاجىريبەسى مول. ەندى سول تاجىريبەسىن بىزبەن دە بولىسپەكشى، – دەيدى ە.قاناعاتوۆ.

ونىڭ ايتۋىنشا، مارافون ءۇش قاشىقتىق بويىنشا وتكىزىلەدى. قاتىسۋشىلار 10, 42 جانە ەكسپو-2017 كورمەسىنىڭ قۇرمەتىنە سايكەس 2017 شاقىرىمعا جۇگىرەدى. شەتەلدەن 700-1000 مىڭداي قاتىسۋشى كەلسە، وزىمىزدەن 4000 مارافونشى باق سىنايدى دەپ كۇتىلۋدە.

– جەڭىل اتلەتيكا فەدەراتسياسىنىڭ ماڭىزدى باعىتتارىنىڭ ءبىرى – سالاۋاتتى ءومىر سالتىن ناسيحاتتاۋ. سوندىقتان ەلىمىزدىڭ ءار قالالارىندا وسىنداي مارافوندار وتكىزۋدى قولعا الدىق. بۇعان دەيىن 6 مامىردا اتىراۋدا جارتىلاي مارافون وتسە، الداعى كۇندەرى قاراعاندى قالاسىندا تاعى ءبىر مارافون ۇيىمداستىرىلادى. سونداي-اق تاراز جانە وسكەمەن قالاسىندا وتكىزەمىز دەپ جوسپارلاپ وتىرمىز.  ال استاناداعى حالىقارالىق مارافون ەكسپو-2017 كورمەسى اياسىندا شانحاي ىنتىماقتاستىق ۇيىمىنىڭ قولداۋىمەن قولعا الىنىپ وتىر. ءبىز ءوز تاراپىمىزدان بۇل مارافننىڭ جوعارى دەڭگەيدە وتكىزىلۋى ءۇشىن ايانىپ قالمايمىز. سوندىقتان بارلىق قاتىسۋشىلارعا ساتتىلىك تىلەيمىن!، – دەدى ەلدار تابانوۆ.

ءباسپاسوز ءماجىلىسىنىڭ سوڭىندا قر مادەنيەت جانە سپورت ءمينيسترلى، قر جەڭىل اتلەتيكا فەدەراتسياسى جانە «شانحە» مادەنيەت جانە سپورت كومپانياسى اراسىندا استانا حالىقارالىق مارافونىن وتكىزۋگە ارنالعان ءۇش جاقتى مەموراندۋمعا قول قويىلدى.

وتكەن جىلى شانحاي ىنتىماقتاستىق ۇيىمى العاش رەت وسىنداي حالىقارالىق مارافون ۇيىمداستىرعان بولاتىن. وعان ۇيىمعا مۇشە 4 ەلدەن 15,6 مىڭ ادام قاتىسقان. مارافون ۇيىمنىڭ 15 جىلدىعىنا بايلانىستى وتكىزىلگەن ەدى.

– شانحاي ىنتىماقتاستىق ۇيىمى اياسىنداعى بۇل كەلىسىم ءبارىمىز ءۇشىن جەمىستى بولدى. بىلتىرعى جىلى وسى ۇيىمعا مۇشە قازاقستان، قىتاي، وزبەكستان، قىرعىزستان مەملەكەتىنەن 15 مىڭنان استام مارافونشى قاتىستى. بيىلعى جىلى استاناداعى مارافونعا 5 مىڭ ادام قاتىسادى دەپ كۇتىلۋدە. بۇل مارافون ەكسپو-2017 كورمەسى اياسىندا وتەدى، – دەيدى«شانحە» مادەنيەت جانە سپورت كومپانياسىنىڭ توراعاسى چجان تسين. 

Abai.kz