رەسەيدىڭ ءبىر تەلەارناسى بەرگەن تاپسىرىس بويىنشا ۋكراينالىق پروداكشن ستۋديا تۇسىرگەن «ودينوكيە سەردتسا» فيلمىندە تاجىك وتباسى دەپ كورسەتىلگەن سۋرەت تۋرالى كەشەلى بەرى اڭگىمە بولىپ جاتىر. اتالعان فيلمدە «تاجىك وتباسى» دەپ نازارباەۆتار وتباسى كورسەتىلگەن. كەشە وسى جاڭساقتىققا بايلانىستى قر پرەزيدەنتى ءباسپاسوز قىزمەتىنىڭ جەتەكشىسى، ءارى پرەزيدەنت كەڭەسشىسى داۋرەن اباەۆ ءفيلمدى تۇسىرۋشىلەردىڭ تىرلىگىن سىنعا الا وتىرىپ، ولارعا ارتىق جارناما جاساۋدىڭ قاجەتى جوق دەگەن-ءدى. اقوردانىڭ رەسمي وكىلىنىڭ ءسوزى ۋكراينالىقتارعا جەتىپ ۇلگەرسە كەرەك، بۇگىن اتالعان سەريالدىڭ باس پروديۋسەرى يرينا زاريا بارىن ايتىپ اقتالىپ جاتىر.

زاريانىڭ سوزىنە قاراعاندا، فيلمگە كەرەكتى ماتەريالدار ءتۇسىرۋ الاڭىنا دەر كەزىندە جەتپەگەندىكتەن الگى سۋرەت عالامتوردان كوشىرىلىپ الىنا سالعان. سويتكەندە، نازارباەۆتار وتباسى «تاجىك وتباسى» بولىپ كەتە بەرگەن.

- ءبىز مىنانداي سوراقى ءىسىمىز ءۇشىن قاتتى ايىپتىمىز. سۋرەتتى عالامتوردان شىعارىپ الىپ پايدالانۋعا بەرگەن ادامدار جازاسىن الاتىن بولادى. ءبىزدىڭ بوتەن-بوگدە ويىمىز بولعان جوق. الەمگە تانىمال تۇلعانىڭ بەت-بەدەلىنە دە نۇقسان كەلتىرۋدى ويىمىزعا العان ەمەسپىز. قازاق حالقى بىزگە دوس، باۋىر، تۋىس حالىق، - دەيدى كوپ سەريالى ءفيلمنىڭ باس پروديۋسەرى يرينا زاريا حانىم.

ەلىمىزدەگى تانىمال ادامدارعا قاتىستى قاتەلىك ءبىر بۇل ەمەس. بۇنىڭ الدىندا سەنات توراعاسى قاسىم-جومارت توقاەۆ پەن مادەنيەت جانە سپروت ءمينيسترى ارىستانبەك مۇحامەديۇلىنىڭ سۋرەتتەرى دە الدەبىرەۋلەرمەن شاتاستىرىلعان بولاتىن.

ەستەرىڭىزگە سالا كەتەيىك، الگى فيلمدە تاسپاعا تارتىلعان سۋرەت رەسەيگە جۇمىس ىزدەپ كەلگەن گاستاربايتەر تاجىك وتباسى دەپ كورسەتىلگەن. 

اباي-اقپارات