پرەزيدەنت مەملەكەتتىك ناگرادالار، جوعارى اسكەري جانە ارناۋلى اتاقتار، سىنىپتىق شەندەر تاپسىرۋ راسىمىنە قاتىستى. بۇل تۋرالى اقوردا ءباسپاسوزى حابارلادى.

مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ جيىنعا قاتىسۋشىلاردى وتان قورعاۋشى كۇنىمەن جانە الدا كەلە جاتقان جەڭىس كۇنى مەرەكەسىمەن قۇتتىقتاپ، وسى ەكى مەيرام جاۋىنگەرلىك ءداستۇردىڭ ساباقتاستىعىن پاش ەتەتىنىن، باتىر بابالارىمىزدىڭ داڭقتى جولىن قازىر وسكەلەڭ ۇرپاق جالعاستىرىپ كەلە جاتقانىن اتاپ ءوتتى.

ەرلىك مايداندا عانا جاسالمايدى!

«بۇگىندە ايبىندى ارميامىز – ەلدەگى تۇتاستىق پەن تىنىشتىقتىڭ مىقتى قالقانى. قۋاتتى اسكەرىمىز بەيبىتشىلىك پەن بەرەكەلى ءومىردى قاس قاقپاي كۇزەتىپ تۇر. ولار قاي كەزدە دە قاستەرلى وتانىمىزدى قورعاۋعا دايىن. ەرلىك مايداندا عانا جاسالمايدى. ەرلىككە بەيبىت زاماندا دا ورىن بار.

بيىل ءبىز سوڭعى 80 جىلداعى ەڭ جويقىن تاسقىنعا تاپ بولدىق. ەلگە قاتەر تونگەن ساتتە ساربازدارىمىز الدىڭعى شەپتەن تابىلدى. ۇلتتىق ۇلان، ىشكى ىستەر مينيسترلىگى، ۇلتتىق قاۋىپسىزدىك كوميتەتى، توتەنشە جاعدايلار مينيسترلىگى جانە مەملەكەتتىك كۇزەت قىزمەتىنىڭ جەكە قۇرامى انتقا ادال بولۋدىڭ ۇلگىسىن كورسەتتى. الاپات تاسقىنعا توتەپ بەرۋ ءۇشىن 9 مىڭنان استام اسكەري قىزمەتشى جۇمىلا ەڭبەك ەتتى. مىڭنان استام تەحنيكا جەتكىزىلدى. سىن ساعاتتا حالقىمىزدىڭ اسىل قۇندىلىقتارى انىق بايقالادى.

وسى ورايدا سولتۇستىك قازاقستان وبلىسىندا اپاتقا قارسى كۇرەسكەن 300 ساربازدىڭ ەڭبەگىن ەرەكشە اتاپ وتكىم كەلەدى. ولار كۇنى-ءتۇنى بوگەن سالىپ، قالانى قارعىن سۋدان قۇتقارۋعا اتسالىستى. جەرگىلىكتى تۇرعىندار بۇل ساربازدارعا ايرىقشا ريزا بولدى، ولاردى زور قۇرمەتپەن شىعارىپ سالدى. مىنە، حالىق پەن ارميانىڭ مىزعىماس تۇتاستىعى دەگەنىمىز – وسى. مۇنداي مىسالدار از ەمەس»، – دەدى پرەزيدەنت.

قاسىم-جومارت توقاەۆ جەڭىس كۇنىن جاقىنداتۋعا اتسالىسقان مايدانگەرلەر مەن تىل ەڭبەككەرلەرىنە ارقاشان قۇرمەت كورسەتىلەتىنىن ايتتى.

«ايبىن» وردەنىنىڭ ءۇش دارەجەسىنە داڭقتى ءۇش باتىردىڭ اتى بەرىلدى!

وسى رەتتە ارداگەرلەرگە مەرەكەگە وراي جىل سايىن قوسىمشا تولەماقى بەرىلەتىنىن، ال بيىل ونىڭ كولەمى ءۇش ميلليون تەڭگەگە دەيىن وسكەنىن جەتكىزدى. سونىمەن قاتار ءوزىنىڭ باستاماسىمەن بيىلدان باستاپ «ايبىن» وردەنىنىڭ ءۇش دارەجەسى داڭقتى باتىرلارىمىز – ساعادات نۇرماعامبەتوۆتىڭ، باۋىرجان مومىشۇلىنىڭ جانە راقىمجان قوشقارباەۆتىڭ اتىمەن اتالاتىنىن ەسكە سالىپ, ۇلت پەرزەنتتەرىنىڭ باتىلدىعى مەن باتىرلىعى بۇگىنگى جانە بولاشاق ۇرپاق ءۇشىن ۇلگى-ونەگە بولاتىنىنا نازار اۋداردى.

مەملەكەت باسشىسىنىڭ ايتۋىنشا، گەووساياسي تۇراقسىزدىق بەلەڭ العان قازىرگى جاعدايدا مىقتى ءارى دايىندىعى ساقاداي ساي اسكەردىڭ ماڭىزى ايتارلىقتاي ارتا ءتۇستى.

«ءبىزدىڭ اسكەري قىزمەتشىلەرىمىز بۇۇ اياسىنداعى ءتۇرلى بىتىمگەرلىك وپەراتسيالارعا قاتىسىپ، وزدەرىنىڭ كاسىبيلىگى مەن جوعارى دەڭگەيدەگى جاۋىنگەرلىك ماشىعىن كورسەتىپ كەلەدى. جۋىردا قازاقستان گولان جوتالارىنداعى ميسسياسىن دەربەس ورىنداۋ جونىندەگى بىرىككەن ۇلتتار ۇيىمىنىڭ مانداتىنا العاش رەت يە بولدى.

سوڭعى جىلدارى الەم ەلدەرىنىڭ اسكەري قۋاتى تۋرالى رەيتينگتەگى ورنىمىز ەداۋىر جاقساردى. بۇل اسكەرىمىزدىڭ دايىندىعى جوعارى ەكەنىن ءارى ۇيلەسىمدى ارەكەت ەتەتىنىن بىلدىرەدى. قازاقستان جەر-جاھانعا ءوزىن بەيبىت ەل رەتىندە تانىتتى.

ءبىز بارلىق مەملەكەتپەن دوستىق قاتىناس ورناتتىق. كەز كەلگەن شيەلەنىستى سىندارلى ديالوگ ارقىلى شەشۋ كەرەك دەپ ەسەپتەيمىز. بىراق ارقانى كەڭگە سالىپ، قامسىز وتىرۋعا بولمايدى. قۋاتتى اسكەرىمىز ءتۇرلى قاتەرگە ساقاداي ساي تۇرۋعا ءتيىس. مىقتى اسكەر – ەلدىكتىڭ تىرەگى»، – دەدى پرەزيدەنت.

ەلىمىزدە جاڭا اۆياتسيا بازاسى اشىلدى

قاسىم-جومارت توقاەۆ قازاقستاننىڭ ايبىندى ارمياسى كاسىبي تۇرعىدان بىلىكتى ءارى زامانعا ساي وزىق بولۋى ءۇشىن قارۋلى كۇشتەرىمىزدى ودان ءارى نىعايتۋ جۇمىستارى جالعاساتىنىن جەتكىزدى.

«كۇنى كەشە عانا ەلىمىزدە جاڭا اۆياتسيا بازاسى اشىلدى. بۇل – ۇلتتىق قورعانىس جۇيەسىنىڭ الەۋەتى ارتا ءتۇستى دەگەن ءسوز. ءبىز ارميانىڭ بەدەلىن كوتەرۋگە ايرىقشا ءمان بەرەمىز. وتان قورعاۋ – بارشامىزعا ورتاق پارىز. مۇنى، اسىرەسە، وسكەلەڭ ۇرپاق تەرەڭ تۇسىنگەنى ابزال. مەملەكەت جاس ساربازدارعا جان-جاقتى قولداۋ كورسەتىپ جاتىر. ولارعا ارنايى ءبىلىم گرانتتارى بولىنە باستادى. نەسيەنى وتەۋ مەرزىمى كەيىنگە شەگەرىلدى.

ەندى ارميادا ءجۇرىپ، ناقتى ماماندىق الۋعا بولادى. «ەر جىگىتكە جاراسار، قولىنداعى نايزاسى» دەپ ايگىلى بۇقار جىراۋ باتىرلىق پەن ەرلىكتى ەرەكشە دارىپتەگەن. شىن مانىندە، اسكەر – مەملەكەتتىڭ اسا ماڭىزدى سيمۆولى. مەن ساربازدارىمىزدىڭ جاۋىنگەرلىك رۋحى جوعارى بولعانىن ماقتان ەتەمىن»، – دەدى مەملەكەت باسشىسى.

ءۇش باتىر اتىنداعى وردەندەردى كىمدەر الدى؟

مەملەكەت باسشىسىنىڭ جارلىعىمەن اسكەري جانە قىزمەتتىك بورىشىن اتقارۋدا كورسەتكەن ەرلىگى مەن جانقيارلىعى، ەلدىڭ ۇلتتىق قاۋىپسىزدىگى مەن قورعانىس قابىلەتىن قامتاماسىز ەتۋگە، زاڭدىلىق پەن قۇقىقتىق ءتارتىپتى نىعايتۋعا قوسقان ۇلەسى ءۇشىن ەلىمىزدىڭ ءبىر توپ ازاماتى ناگرادتالدى:

ءى دارەجەلى «داڭق» وردەنى:

1) قامالەتدينوۆ سۇلتان بۇركىتبايۇلى – قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى;
2) داۋەشوۆ حاليدۋللا زينوللاۇلى – اقتوبە وبلىسىنىڭ پروكۋرورى.

ءىى دارەجەلى «داڭق» وردەنى:

1) رايسوۆ ۇلان ەرمۇحانۇلى – قارجىلىق مونيتورينگ اگەنتتىگى توراعاسىنىڭ ءبىرىنشى ورىنباسارى;
2) دالماتوۆ قاناتاي جورابەكۇلى – قورعانىس مينيسترلىگى
اسكەري ءبولىمىنىڭ كومانديرى;
3) ءابدىروۆ نۇرعالىم ءماجيتۇلى – جامبىل وبلىسىنىڭ پروكۋرورى.

باۋىرجان مومىشۇلى اتىنداعى ءىى دارەجەلى «ايبىن» وردەنى:

1) گولوۆين ولەگ پاۆلوۆيچ – پەتروپاۆل قالاسىنىڭ
پوليتسيا باسقارماسىنىڭ ينسپەكتورى;
2) تاڭاتاروۆ باۋىرجان ومارۇلى – مەملەكەتتىك كۇزەت قىزمەتىنىڭ ايرىقشا ماقساتتاعى كۇشتەرى شتاب باستىعىنىڭ ورىنباسارى;
3) دوسكەنوۆ امانگەلدى سەرىكۇلى – اقمولا وبلىسىنىڭ ەرەيمەنتاۋ اۋدانى توتەنشە جاعدايلار ءبولىمىنىڭ باستىعى;
4) ساق ۇلىقبەك مۇراتۇلى – قورعانىس مينيسترلىگىنىڭ
اسكەري ءبولىمى كومانديرىنىڭ ءبىرىنشى ورىنباسارى;
5) عالىموۆ جاندوس جاناتۇلى – ۇلتتىق قاۋىپسىزدىك كوميتەتىنىڭ اعا جەدەل ۋاكىلى;
6) ناسيحان رومان سەرىكۇلى – اتىراۋ وبلىسىنىڭ قۇرمانعازى اۋدانى پوليتسيا ءبولىمىنىڭ ينسپەكتورى;
7) ورازوۆ دىنمۇحامەد عابيتۇلى – ۇلتتىق قاۋىپسىزدىك كوميتەتى تۇركىستان وبلىسى بويىنشا دەپارتامەنتىنىڭ اعا جەدەل ۋاكىلى;
8) وماروۆ دياس كاكىمۇلى – جەتىسۋ وبلىسىنىڭ تالدىقورعان قالاسى پوليتسيا باسقارماسىنىڭ ينسپەكتورى.

راقىمجان قوشقارباەۆ اتىنداعى ءىىى دارەجەلى «ايبىن» وردەنى:

1) تاجىعۇلوۆ نۇربولات تاستەمىرۇلى – اقتوبە وبلىسىنىڭ توتەنشە جاعدايلار دەپارتامەنتى ءورت ءسوندىرۋ ءبولىمىنىڭ بولىمشە كومانديرى.

«قۇرمەت» وردەنى:

1) كۋبەكوۆا اينا جادىراقىزى – سىبايلاس جەمقورلىققا قارسى قىزمەتىنىڭ دەپارتامەنت باسشىسى.

«ەرلىگى ءۇشىن» مەدالى:

1) توپالوۆ ءامىرجان مەرەكەۇلى – قوستاناي وبلىسىنىڭ
قارابالىق اۋدانى پوليتسيا ءبولىمىنىڭ جەدەل ۋاكىلى;
2) قۇسمان ءادىل دۋمانۇلى – اباي وبلىسىنىڭ پوليتسيا دەپارتامەنتى جىلدام قيمىلدايتىن ارنايى جاساعىنىڭ ينسپەكتورى.

«جاۋىنگەرلىك ەرلىگى ءۇشىن» مەدالى:

1) وتەۋوۆ ەرلان وتەۋۇلى – باس پروكۋراتۋرا قىزمەت باستىعىنىڭ ورىنباسارى;
2) سترەلكوۆ فەدور نيكولاەۆيچ – اۋە قورعانىسى كۇشتەرىنىڭ اسكەري ينستيتۋتى باستىعىنىڭ ورىنباسارى;
3) ءىلياس سەرىك امانكەلدىۇلى – مەملەكەتتىك كۇزەت قىزمەتىنىڭ باسقارما باستىعىنىڭ ورىنباسارى;
4) اقاربەكوۆ مەيىرحان ساپارحانۇلى – قورعانىس مينيسترلىگى اسكەري ءبولىمىنىڭ روتا كومانديرى;
5) وتەنوۆ ساكەن سەكسەمبايۇلى – ۇلتتىق قاۋىپسىزدىك كوميتەتى اقتوبە وبلىسى بويىنشا دەپارتامەنتىنىڭ اعا جەدەل ۋاكىلى;
6) يرۋباەۆ رەنات ماراتۇلى – مەملەكەتتىك كۇزەت قىزمەتىنىڭ اعا وفيتسەرى;
7) مۇراتبەكوۆ دۋلات تىلەمىسۇلى – قارجىلىق مونيتورينگ اگەنتتىگى قوستاناي وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ جەدەل ۋاكىلى;
8) سەرىكوۆ ادىلەت الماسبەكۇلى – ۇلتتىق قاۋىپسىزدىك كوميتەتى
شەكارا قىزمەتىنىڭ ماڭعىستاۋ وبلىسى بويىنشا دەپارتامەنتىنىڭ اعا جەدەل ۋاكىلى;
9) ابدىكارىموۆ تىلەك دۋمانۇلى – سىبايلاس جەمقورلىققا قارسى قىزمەتتىڭ اسا ماڭىزدى ىستەر جونىندەگى تەرگەۋشىسى.

Abai.kz