جۇما, 21 ماۋسىم 2024
الاساپىران 1565 6 پىكىر 15 مامىر, 2024 ساعات 15:48

گرۋزيا «رەسەيلىك زاڭدى» تاڭداپ، رەسەيگە بەت بۇرا ما؟

كوللاج: Abai.kz

كەشە گرۋزيا پارلامەنتى «شەتەلدىك اگەنتتەر» تۋرالى زاڭدى ءۇشىنشى، سوڭعى وقىلىمدا بەكىتتى.

«گرۋزين ارمانى» باستاماسىمەن قابىلدانعان بۇل زاڭدى بيلىك پارتياسى قولدادى. ۇزىن-سانى 84 دەپۋتات قولداپ داۋىس بەردى. ولار رەسەيلىك ۇلگىدەگى «شەتەلدىك اگەنتتەر» تۋرالى زاڭعا قارسى نارازىلىق اكتسياسىنا شىققان ونداعان مىڭ گرۋزيا ازاماتتارىنىڭ پىكىرىن ەلەگەن دە، ەسكەرگەن دە جوق.

اتالعان داۋلى زاڭعا گرۋزيا پارلامەنتىندەگى وپپوزيتسيانىڭ 30 دەپۋتاتى قارسى داۋىس بەردى.

بيلەۋشى «گرۋزين ارمانى» پارتياسىنىڭ جانە ودان رەسمي تۇردە بولىنگەن «حالىق كۇشتەرىنىڭ» مۇشەلەرىنەن باسقا، داۋلى زاڭدى «ەۋروپالىق سوتسياليستتەردەن» فريدون يندجيا مەن اۆتانديل ەنۋكيدزە جاقتادى. بۇل وپپوزيتسيالىق پارتيا، بىراق بيلىكتىڭ باستامالارىن ءجيى قولدايدى.

گرۋزيا پرەزيدەنتى سالومە زۋرابيشۆيلي ەلدە جاپپاي نارازىلىق تۋدىرعان «شەتەلدىك اگەنتتەر» تۋرالى زاڭ جوباسىنا ۆەتو قوياتىنىن مالىمدەدى.

«ءبىز قوعامدى جۇمىلدىرۋدى جانە ساياسي پارتيالاردى بىرىكتىرۋدى وسى سايلاۋدا جەڭىسكە جەتۋ ءۇشىن پايدالانۋىمىز كەرەك، ويتكەنى بۇل ەۋروپالىق جول»، - دەدى زۋرابيشۆيلي. ول قازان ايىندا وتەتىن پارلامەنتتىك سايلاۋ زاڭ جوباسىن «الىپ تاستاۋعا» مۇمكىندىك بەرەتىنىن اتاپ ءوتتى.

پارلامەنت قابىلداعان زاڭ 10 كۇن مەرزىم ىشىندە گرۋزيا پرەزيدەنتىنە بەرىلەدى. سالومە زۋرابيشۆيلي بۇعان دەيىن زاڭ جوباسىنا ۆەتو قويۋعا ۋادە بەرگەن بولاتىن.  بىراق، «گرۋزين ارمانى» ۆەتونى جەڭۋگە جەتكىلىكتى داۋىسقا يە.

گرۋزيا كونستيتۋتسياسىنا سايكەس، پرەزيدەنت 2 اپتا ىشىندە زاڭعا قول قويىپ، جاريالايدى نەمەسە دالەلدى ەسكەرتۋلەرمەن ونى پارلامەنتكە قايتارادى. ەگەر وسىدان كەيىن دە پرەزيدەنت زاڭعا قول قويماسا، وعان پارلامەنت توراعاسى قول قويادى جانە جاريالايدى.

پارلامەنت پرەزيدەنت ۆەتوسىن ەڭسەرۋگە ءتيىس مەرزىم كونستيتۋتسيادا كورسەتىلمەگەن. بولجام بويىنشا، «گرۋزين ارمانى» زاڭ جوباسىن ماۋسىم ايىنىڭ ورتاسىندا بەكىتۋى مۇمكىن.

ۇكىمەتتە ولار ۆەتو اياسىندا باتىستىق سەرىكتەستەردەن «مازمۇندى ۇسىنىستاردى» ەسكەرۋى مۇمكىن دەپ مالىمدەدى.

Abai.kz

6 پىكىر