قر تۋريزم جانە سپورت ءمينيسترى ەرمەك مارجىقپاەۆ ەۋروپالىق وداقتىڭ قازاقستانداعى وكىلدىگىنىڭ باسشىسى كەستۋتيس يانكاۋسكاسپەن كەزدەستى.

سونداي-اق، كەزدەسۋگە قر تۋريزم جانە سپورت ۆيتسە-ءمينيسترى ەرجان ەركىنباەۆ، سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ، 5-ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆ جانە ەۋرووداق دەلەگاتسياسىنىڭ باعدارلامالار ءبولىمىنىڭ قىزمەتكەرى نيكولا فرانچەسكەتتي قاتىستى.

ەۋرووداق دەلەگاتسياسىنا قازاقستاننىڭ تۋريستىك عانا ەمەس، سپورتتىق الەۋەتى دە تانىستىرىلدى. ەرمەك مارجىقپاەۆ استانادا 8-13 قىركۇيەك ارالىعىندا وتەتىن 5-ءشى دۇنيەجۇزىلىك كوشپەندىلەر ويىندارى تۋرالى ايتىپ بەردى.

«ويىندارعا 3000-عا جۋىق سپورتشىلار قاتىسادى دەپ كۇتىلۋدە. بۇل ۇلتتىق مادەنيەتتى، سپورت پەن ءتۋريزمدى دامىتۋعا باعىتتالعان جانە الەمنىڭ كوشپەلى حالىقتارىن بىرىكتىرەتىن اۋقىمدى جوبا. دۇنيەجۇزىلىك كوشپەندىلەر ويىندارى – بۇل ەلىمىزدىڭ استاناسىندا 100 مىڭنان استام تۋريست جينايتىن ەڭ ءىرى تۋريستىك ءىس-شارا. ءسىزدى رەسمي اشىلۋ سالتاناتىنا قاتىسۋعا شاقىرامىن. ەۋروپالىق وداق ەلدەرى وسى ويىندارعا بەلسەندى قاتىسادى دەپ ۇمىتتەنەمىز»، - دەپ اتاپ ءوتتى مينيستر.

قازىرگى ۋاقىتتا قازاقستان حالقىنىڭ 40,4%-ى دەنە شىنىقتىرۋمەن جانە سپورتپەن جۇيەلى تۇردە اينالىسادى. 2023 جىلى دەنە شىنىقتىرۋ جانە سپورتپەن شۇعىلدانۋعا تارتىلعان بالالار مەن جاسوسپىرىمدەردىڭ ۇلەسى 27,3% - عا (984 مىڭ ادام) جەتتى. ەلىمىزدە جىل سايىن وليمپيادالىق، وليمپيادالىق ەمەس جانە ۇلتتىق سپورت تۇرلەرىنەن ءتۇرلى جارىستار وتكىزىلەدى.

5-ءشى دكو-نا ەۋرووداقتان 13 ەل قاتىسۋعا ءوتىنىم بەردى

«قازىرگى ۋاقىتتا ەۋروپالىق وداقتىڭ 27 ەلىنەن 13 ەل ءوتىنىش بەردى، ولار: بولگاريا، ماجارستان، گەرمانيا، يتاليا، لاتۆيا، ليتۆا، مالتا، نيدەرلاندى، پولشا، رۋمىنيا، سلوۆاكيا، فرانتسيا، چەحيا. بولگاريادان كەلگەن سپورتشىلار جامبى اتۋدان جارىسقا قاتىسادى. ءماديارلار، يتاليالىقتار مەن فرانتسيالىقتار ءداستۇرلى ساداق اتۋدان جارىسادى. گەرمانيا قۇراماسى ساداق اتۋدان باسقا توعىزقۇمالاقتان دا وزدەرىن سىناپ كورمەك»، - دەپ ءبولىستى 5-ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆ.

ديرەكتسيا ەۋرووداقتىڭ تاعى 14 ەلىنەن ءوتىنىم كۇتۋدە. بۇعان ەۋروپالىق وداقتىڭ قازاقستانداعى وكىلدىگىنىڭ باسشىسى ەو-نىڭ بارلىق ەلدەرىن حاباردار ەتۋ ءۇشىن بار كۇش-جىگەرىن سالاتىنىنا سەندىردى. كەستۋتيس يانكاۋسكاس ەو سپورتشىلارى وسى ءىرى حالىقارالىق سپورتتىق ءىس-شارادا لايىقتى ونەر كورسەتەدى دەپ ۇمىتتەنەدى.

كەزدەسۋگە قاتىسۋشىلار كوشپەندىلەر ويىندارى قازاقستانعا تۋريستەردى قوسىمشا تارتۋعا تاماشا سەپ بولاتىنىنا كەلىستى.

Abai.kz