كۋاگەردىڭ ءوزى «فەنيكس» كينوكارتيناسىنىڭ باس ديرەكتورى بولىپ فورمالدى تۇردە تىركەلگەنىمەن، فيلمگە ەشقانداي قاتىسى بولماعانىن اڭگىمەلەپ بەردى.

كەرىمجان ەسباەۆ اتالعان جۇمىسقا ءوزىن تۇڭعىشباي جامانقۇلوۆ شاقىرىپ، تىكەلەي تاعايىنداعانىن ايتتى. اتاپ ايتارلىعى، ونىڭ اي سايىن الاتىن جالاقىسى ت. جامانقۇلوۆتىڭ جەكە قاجەتتىلىكتەرىنە جۇمسالىپ وتىرعان.

«اقشا ت. جامانقۇلوۆتىڭ ءۇيىن جوندەۋگە، كوممۋنالدىق قىزمەت اقىسىنا، ۇيالى تەلەفونى جانە ءۇيىنىڭ كۇزەت قىزمەتىنىڭ اقىسىن تولەۋگە جۇمسالدى. بۇل تولەمدەر تىكەلەي ت. جامانقۇلوۆتىڭ نۇسقاۋىمەن جونەلتىلدى. ال شىعىنداردى مەن ءوز جۋرنالىما جازىپ وتىردىم، سول جۋرنالدى ءوز ەركىممەن تەرگەۋ ورگاندارىنا بەردىم. سونداي-اق، اقشا ت. جامانقۇلوۆتىڭ ۇلىنىڭ ماسكەۋگە بارىپ-قايتقان جولىنا جۇمسالدى»، - دەپ اڭگىمەلەدى كۋاگەر.

سوت وتىرىسىندا كەرىمجان ەسباەۆ ت. جامانقۇلوۆتىڭ شىعىندارىن راستايتىن قۇجاتتاردى سوتقا ۇسىندى.

بۇعان قوسا، كۋاگەر تۇڭعىشباي جامانقۇلوۆقا ارنالعان قارجىنىڭ قالاي قولما-قول اقشاعا اينالدىرىلعانىن ەگجەي-تەگجەيلى اڭگىمەلەدى. «جامانقۇلوۆ «فەنيكستىڭ» پروديۋسەرى ن. يۋديناعا 6 ملن. تەڭگەنى قولما-قول اقشاعا اينالدىرۋعا نۇسقاۋ بەردى. بۇل اڭگىمەنى كارتينانىڭ رەجيسسەرى تالعات جانىبەكوۆ، رەداكتورى عيزات سۇلتانوۆ جانە ەسەپشى نازگۇل ءجۇنىسوۆا ءوز قۇلاعىمەن ەستىدى»،- دەدى سوتتا ك. ەسباەۆ.

كۋاگەر سونداي-اق، قىلمىستىق ءىس سىبايلاس جەمقورلىققا قارسى ءىس-قيمىل قىزمەتىنە بەرىلگەن سوڭ ت. جامانقۇلوۆ ءفيلمدى تۇسىرۋشىلەر توبىن جيناپ الىپ، ەشكىمنىڭ وزىنە قارسى قۇزىرلى ورگاندارعا تۇسىنىك بەرمەۋىن قاداپ تاپسىرعانىن اشىق ايتتى.

«21 نەمەسە 23 قاڭتاردا جامانقۇلوۆ ماعان قوڭىراۋ شالىپ، ءوز كەڭسەسىنە شاقىردى. كەڭسەگە كەلگەنىمدە مەنى بۇرىن قۇزىرلى ورگاندارعا بەرگەن جاۋاپتارىمنان باس تارتۋدى ءوتىندى، ال ەگەر باس تارتپاعان جاعدايدا مەنى قىلمىستىق جاۋاپكەرشىلىككە تارتۋ ءۇشىن قولىنان كەلگەن نارسەنىڭ بارلىعىن جاسايتىنىن اتىپ، قورقىتتى»، - دەپ ءسوزىن اياقتادى كۋاگەر.

ەسكە سالا كەتەيىك، سىبايلاس جەمقورلىققا قارسى ءىس-قيمىل جونىندەگى ۇلتتىق بيۋرو «فەنيكس» كينوفيلمىن تۇسىرۋگە بولىنگەن بيۋدجەت قاراجاتىنىڭ ۇرلانعانى تۋرالى فاكتىلەردى انىقتادى. تەرگەۋدىڭ نۇسقاسى بويىنشا، ءفيلمدى تۇسىرۋگە بولىنگەن 79 ملن. تەڭگەنىڭ 69 ملن-ىن كارتينانىڭ پروديۋسەرى تۇڭعىشباي جامانقۇلوۆ جىمقىرعان. وسى ماقساتقا ول ءوزى قۇرىلتايشى بولىپ تابىلاتىن «T.K. TURAN UNIVERSAL BUSINESS» فيرماسىن پايدالانعان.

ايتا كەتەلىك، تەرگەۋ بارىسىندا تۇڭعىشباي جامانقۇلوۆ ءوزىنىڭ قورعاۋشىسىنىڭ كوزىنشە بيۋدجەت قاراجاتىن ۇرلاعانىن تولىق مويىندادى. سونداي-اق، جىمقىرىلعان اقشانى قولما-قول اقشاعا اينالدىرىپ، ءوزىنىڭ جەكە قاجەتتىلىكتەرىن قاناعاتتاندىرۋعا جۇمسالعانىن ايتتى.

Abai.kz