كەشە ەلىمىزگە حالىقارالىق ۆاليۋتا قورىنىڭ باسقارۋشى ديرەكتورى كريستين لاگارد كەلدى.

كيريستين لاگاردتى اقوردادا ەلباسى نۇرسۇلتان نازارباەۆ قابىلدادى. كەزدەسۋ بارىسىندا قازاقستان مەن جاھاندىق قوردىڭ ءوزارا ىنتىماقتاستىعىنىڭ نەگىزگى باعىتتارى، سونداي-اق الەمدىك قارجى-ەكونوميكا جۇيەسىنىڭ دامۋىنداعى ماڭىزدى ۇردىستەر تالقىلاندى.

تاۋەلسىزدىك تاڭىندا حالىقارالىق ۆاليۋتا قورى قازاقستاننىڭ قارجىلىق جۇيەسىنىڭ قالىپتاسۋىنا، ەكونوميكا­سىنىڭ جاندانۋىنا سەپتىگىن تيگىزدى. بىراق بۇل جاھاندىق ۇيىم نەسيە بەرەتىن ەلدەرگە ءوزى قالاعان رەفورمالاردى تاڭاتىندىقتان، ەل ۇكىمەتى كەيىن ۇيىمنىڭ قارجىلىق قولداۋىن قاجەت ەتپەدى. قازىرگى كەزدە حۆق مەملەكەتىمىزگە، نەگىزىنەن، كەڭەس-كونسۋل­تاتسيالىق كومەك كورسەتەدى. 
ءوز سوزىندە نۇرسۇلتان نازارباەۆ حۆق-نىڭ وڭىرلىك كونفەرەنتسياسىن استانا ەكونوميكالىق فورۋمى قارساڭىندا قازاقستاندا وتكىزۋ تۋرالى شەشىمنىڭ ءبىز ءۇشىن ماڭىزدى قولداۋ بولعانىن اتاپ ءوتتى.
مەملەكەت باسشىسى قازاقستان ءوز تاۋەلسىزدىگىنىڭ العاشقى كۇنىنەن باستاپ حالىقارالىق ۆاليۋتا قورىمەن ىنتىماق­تاسىپ كەلە جاتقانىن ايتتى.
– قور قىزمەتكەرلەرى العاشقى جىل­دارى تەحنيكالىق جانە قارجىلىق تۇرعى­دان زور كومەك كورسەتتى. بۇرىنعى كەڭەستىك وزگە مەملەكەتتەرمەن سالىستىرعاندا ءبىز­دىڭ ەل تاۋەلسىزدىگىنىڭ 25 جىلدىعىنا دەيىن كوپ نارسەنى جۇزەگە اسىرا الدى. قازىرگى كەزدە قازاقستان ەكونوميكاسى دا الەمدىك ەكونوميكا سياقتى كۇردەلى كەزەڭدى باستان وتكەرۋدە. بۇعان بىرقاتار فاكتورلار، سونىڭ ىشىندە شيكىزات رەسۋرستارى باعا­سىنىڭ تومەندەۋى، قازىر ءبىز جۇزەگە اسىرىپ جاتقان قۇرىلىمدىق رەفورمالاردىڭ كەشىكتىرىلۋى، سونداي-اق رەسەيگە قاتىستى احۋال مەن قىتايداعى ەكونوميكالىق جاعداي ىقپال ەتىپ وتىر. سوعان قاراماستان، ءبىز ءجىو-ءنىڭ تومەندەۋىنە جول بەرمەي، وڭ ديناميكانى قامتاماسىز ەتتىك جانە ونى بيىل دا ساقتايمىز دەگەن ۇمىتتەمىن. ءبىزدىڭ رەسپۋبليكا التى جىلدان بەرى ەكونومي­كانىڭ شيكىزات رەسۋرستارىنا تاۋەلدىلىگىن ازايتۋ شارالارىن جۇزەگە اسىرىپ جاتىر، – دەدى قازاقستان پرەزيدەنتى.
كريستين لاگارد بىرقاتار مەملەكەتتەر ۇكىمەتتەرىنىڭ ەكونوميكالىق بلوگىنىڭ باس­شىلارى ءبىرىنشى رەت قاتىسقالى وتىر­عان وڭىرلىك كونفەرەنتسيانىڭ تابىستى وتەتىنىنە سەنىم ءبىلدىردى.
حۆق باسقارۋشى ديرەكتورى، سونداي-اق نۇرسۇلتان نازارباەۆقا قورمەن اراداعى سەرىكتەستىكتىڭ جولعا قويىلعانى ءۇشىن العىس ايتتى. وسى سەرىكتەستىك اياسىندا قازاقستانعا قاجەتتى قولداۋ، سونىڭ ىشىندە تەحنيكالىق سيپاتتاعى قولداۋ كورسەتۋ جالعاسىپ كەلەدى.
سونىمەن قاتار ك.لاگارد ەلدى ەكونو­ميكالىق، يندۋستريالىق جانە ينفراقۇ­رىلىمدىق دامىتۋ جونىندەگى قازاقستان جۇزەگە اسىرىپ جاتقان رەفورمالاردى حۆق قولدايتىنىنا نازار اۋداردى.
ساپار اياسىندا كريستين لاگارد «نازارباەۆ ۋنيۆەرسيتەتىنىڭ» ستۋدەنتتەرى مەن وقىتۋشىلارىنا ارناپ، ءدارىس وقىدى. ونىڭ بارىسىندا حالىقارالىق ۆاليۋتا قورىنىڭ باسشىسى جاھاندىق جانە وڭىرلىك احۋال، سونداي-اق قازاقستان، كاۆكاز جانە ورتالىق ازيا ءۇشىن سىن-قاتەرلەر جانە مۇمكىندىكتەر جايىن اڭگىمەلەدى. ءدارىس سوڭىندا ستۋدەنتتەر لاگارد حانىمعا وزدەرىن قىزىقتىرعان سۇراقتارىن قويىپ، جاۋاپ الدى. حۆق باسقارۋشى ديرەكتورى ەرتەڭ، 26 مامىردا وتەتىن استانا ەكونوميكالىق فورۋمىنىڭ پلەنارلىق وتىرىسىنا بەينە ۇندەۋمەن قايىرىلادى دەپ كۇتىلۋدە.
وسىنىڭ الدىندا ۇلتتىق ەكونوميكا ءمينيسترى قۋاندىق بيشىمباەۆ پەن حۆق ميسسياسىنىڭ باسشىسى مارك حورتون سالىقتىق-بيۋدجەتتىك ساياساتتى تالقىعا سالدى. م.حورتون مىرزا قازاقستاننىڭ ەكونوميكالىق دامۋ پەرسپەكتيۆالارىنا، ەكونوميكالىق ساياسات رەفورمالارىنا قاتىستى وزدەرىنىڭ ۇستانىمدارى مەن ۇسىنىس-پىكىرلەرىن ايتىپ بەردى. ءوز كە­زەگىندە، ق.بيشىمباەۆ ەل ەكونوميكاسىنىڭ قازىرگى جاي-كۇيى جانە «100 ناقتى قادام» ۇلت جوسپارى اياسىنداعى رەفورمالار تۋرالى اقپاراتتاندىردى. كەزدەسۋ با­رىسىندا رەسپۋبليكادا جۇرگىزىلىپ جاتقان جەكەشەلەندىرۋ ماسەلەلەرى دە قارالعان.

Abai.kz