سارسەنبى, 30 قاراشا 2022
تامىر 5808 0 پىكىر 3 ناۋرىز, 2016 ساعات 09:02

دالا ساندۋعاشى

(بيوگرافيالىق ەسسە – ءبىرىنشى نۇسقا)

تەگىندە، گۇلبارشىن ىبىرايقىزى تەرگەۋبەكوۆا، كيىز تۋىرلىقتى قازاقتىڭ ونەرپاز ءناسىلى، اسىل بابانىڭ جەتىنشى ۇرپاعى، 1971 جىلى 04 ناۋرىزدا، ءتۇز جايلاعان قاراعاندى وبلىسىنا قاراستى، ارقاداعى ساقارا ءىنجۋ-مارجانى – قارقارالى تاۋ سىلەمدەرىنىڭ جالعاسى – ۇشقارا ءوڭىرى، بالقانتاۋ باۋىرىنداعى، بەينەتى اسقان ناۋقانداردىڭ 1928 جىلىندا قۇرىلعان بۇرىنعى قۋ، 1965 جىلى وزگەرتىلىپ – ەگىندىبۇلاق، 1993 جىلدان باستاپ قازىبەك بي دەپ اتالعان ەلدى مەكەندە دۇنيەگە كەلەدى.

ەگىندىبۇلاق اۋىلى قاراعاندى قالاسىنان – ءۇش ءجۇز جيىرما، قارقارالى شاھارىنان سەكسەن جەتى شاقىرىم جەردە جاتىر. قونىستىڭ ىرگەتاسى 1909 جىلى قالاندى. ەلدى مەكەننىڭ اتى – بالقانتاۋ تاۋىنان باستاۋ الاتىن ەگىندى بۇلاق – ورىس تىلىنەن اۋدارىلعان ءسوز، تۇپنۇسقاسى – حلەبورودنوە، سول كەزدەگى ورىنبوردىڭ گەنەرال-گۋبەرناتورى بۇيرىعىمەن بەكىتىلگەن اتاۋ.

1928 جىلعى 17 قانتاردا، قارقارالى دۋانىنا قاراستى قۋ، ەدىرەي جانە بايىر بولىستارى نەگىزىندە قۇرىلادى. اكىمشىلىك ورتالىق رەتىندە  حلەبورودنوە اۋىلى تاڭدالىنىپ الىنادى. 1930 جىلى قازاق كسر-ءى جوعارعى كەڭەسىنىڭ تورالقاسى جەرگىلىكتى حالىقتىڭ تالاپ-تىلەگى بويىنشا اۋدان ورتالىعى اتاۋىن – ەگىندىبۇلاق اۋىلى دەپ وزگەرتۋ تۋرالى قارارى – اتاقتى قاۋلىسىن قابىلدايدى.

گۇلبارشىننىڭ ارعى باباسى – قازاقتىڭ اتاقتى توبە بيلەرىنىڭ ءبىرى – قاز داۋىستى قازىبەك بي. سويى، ەل اۋزىنان جەتكەن سۇيەك شەجىرەسى بىلاي تارالادى: ارعىن قاراكەسەكتىڭ شانشارىنان كەلدىبەك، ودان قازىبەك بي، ءبيدىڭ ۇرپاعى سىرىمبەتتەن توقتىباي، ونىڭ ۇلى ءبىتىم، بىتىمنەن تەرگەۋبەك، تەرگەۋبەكتەن مۇحامەديار، مۇحامەدياردان ىبىراي.

ىبىراي – گۇلبارشىن تەرگەۋبەكوۆانىڭ اكەسى. جارىقتىق 2015 جىلى قاڭتار ايىندا دۇنيە سالدى. ەر تۇلعالى، ەلگە سىيلى، قازاق انىنە قۇمار،  كۇيىنە جۇيرىك، ونەرىنە عاشىق، زادىندا، الاشتىڭ الاپات ازاماتى، سۇڭعىلا جاناشىر پەرزەنتى بولاتىن.

گۇلبارشىن 1978-1988 جىلدارى بۇقار جىراۋ اۋدانىنا قاراستى امانگەلدى اۋىلىندا ورتا مەكتەپتە وقىپ، ەكى جىلعا جۋىق ارادا قارقارالى اۋداندىق (قالالىق) مادەنيەت ءۇيى مەن ساكەن سەيفۋللين اتىنداعى قاراعاندى وبلىستىق دراما تەاترىندا اكىمشىلىك-ۇيىمداستىرۋشى مىندەتتەرىن اتقارادى.

اكە ارمانى، اۋلەت مۇراتى، اۋليە اتا-بابا جولىندا (كەلدىبەك، قاز داۋىستى قازىبەك بي، بەكبولات، سىرىمبەت، تىلەنشى، الشىنباي، تاتتىمبەت، ۇلجان، ءدىلدا، ءمادي، قاليبەك) قىزمەت ەتۋگە بەل بايلاپ، جاس تالاپ 1990 جىلى قۇرمانعازى اتىنداعى الماتى كونسەرۆاتورياسىنا وقۋعا تۇسەدى. ونى 1995 جىلى ۆوكال (حالىق ءانى مەن دومبىرا) ماماندىعى بويىنشا ءبىتىرىپ شىعادى.

كەيىنگى ۋاقىت، 2000 جىلدارعا دەيىن ت.جۇرگەنوۆ اتىنداعى تەاتر جانە كينو ينستيتۋتىندا ءوز ماماندىعى بويىنشا ءدارىس بەرەدى.

سوڭعى جىلدارى گۇلبارشىن تەرگەۋبەكوۆا تەك شىعارماشىلىقپەن اينالىسىپ كەلەدى. ونىڭ رەپەرتۋارىندا قۇيقىلجىعان ارقا اندەرىمەن قاتار بۇگىنگى زاماناۋي ەسترادالىق اندەر دە بار. ءبىرجان سال، اقان سەرى، ەستاي، ءمادي، مايرا، ۇكىلى ىبىراي، قاسىم امانجولوۆ، ءىليا جاقانوۆ، ەسكەندىر حاسانعاليەۆ، ابىلاقات ەسپاەۆ، كەنجەبەك كۇمىسبەكوۆ، اسەت بەيسەۋوۆ، ءشامشى قالداياقوۆ اندەرى گۇلبارشىننىڭ ورىنداۋىندا اسا ءبىر حالىقتىق ورىنداۋشىلىق سيپاتقا يە.

تابيعي تالانتىنا مۋزىكالىق تەرەڭ ءبىلىم قوسقان گۇلبارشىن ەلىمىزگە كەڭىنەن تانىلىپ، كەزىندە كۇلاش بايسەيىتوۆا، جامال وماروۆا، راحيا قويشىباەۆا، رابيعا ەسىمجانوۆا، گۇلبارشىن اقپانوۆا، روزا جامانوۆا، روزا باعلانوۆا ءتارىزدى قازاق ساحناسىنىڭ بۇلبۇلدارى، اياۋلى ونەرپازدارى شىرقاعان ەستايدىڭ “ساندۋعاشىنان” باستاپ، ءشامشىنىڭ “اقماڭدايلىمىنا” دەيىنگى كۇردەلى اندەردى ناقىشىنا كەلتىرە، كەلىستىرە ورىنداپ، بۇگىندە حالىق اراسىندا “دالا ساندۋعاشى” اتاندى.

2012 جىلدان باستاپ گۇلبارشىن تەرگەۋبەكوۆا كونتسەرتتىك جوبالاردى قولعا الا باستادى. حالىقارالىق جانە رەسپۋبليكالىق كونكۋرستاردىڭ لاۋرەاتى، ءانشى، پروديۋسەر، “قاسىمنىڭ اندەرى-اي”، “اباي اندەرى”، “الماتى – عاشىقتار مەكەنى” اتتى كونتسەرتتىك جوبالاردىڭ اۆتورى جانە پروديۋسەرى.

ديدار امانتاي

Abai.kz

 

0 پىكىر

ۇزدىك ماتەريالدار

انە، كوردىڭ بە؟

ورىس ءپاتريوتيزمى جانە ياحتا

ەسبول ۇسەنۇلى 1529
قازاقتىڭ ءتىلى

قازاقتىڭ ءتىلى ولمەسىن دەسەك...

كامشات تاسبولاتوۆا 1620
سوعىستا جۇرگەن سۇلۋلار

مايدانداعى ۋكراينا ارۋلارى: مارگاريتا ريۆچاچەنكو

ايجان تەمىرحان 1782