يزرايل ارمياسىنىڭ گازا سەكتورىنداعى اسكەري وپەراتسياسىنا بايلانىستى تۇركيا يزرايلمەن تاۋار يمپورتى مەن ەكسپورتىن دوعاردى. بۇل جونىندە ەكى تۇرىك شەنەۋنىگىنە سۇيەنگەن Bloomberg باسىلىمى جازدى. ساۋدا وپەراتسيالارى تولىق توقتاعانى جونىندە رەسمي اقپارات ازىرگە شىقپادى.

تۇركيانىڭ ستاتيستيكا ينستيتۋتىنىڭ دەرەگىنشە، 2023 جىلى تۇركيا مەن يزرايل اراسىنداعى تاۋار اينالىمى 6,8 ملرد دوللار بولعان. شامامەن 76 پايىزى تۇرىك ەكسپورتىنىڭ ۇلەسىن قۇرايدى.

يزرايل سىرتقى ىستەر ءمينيسترى يسراەل كاتس X جەلىسىندە "حالىقارالىق ساۋدا كەلىسىمدەرىن جوققا شىعارىپ وتىرعان انكارانىڭ شەشىمى تۇرىك حالقى مەن كاسىپكەرلەرىنىڭ مۇددەسىنە قايشى كەلەدى" دەپجازدى.

كاتستىڭ سوزىنشە، يزرايل تۇركيامەن ساۋدا قاتىناسىنىڭ ورنىن باساتىن شارالار جۇرگىزبەك: جەرگىلىكتى ءوندىرىستى دامىتىپ، وزگە دە تاسىمالداۋشىلاردى ىزدەيدى.

وتكەن اپتادا رەجەپ ەردوعان تۇركيا ەندىگارى يزرايلمەن ساۋدا قاتىناسىن دامىتپايدى دەپ مالىمدەگەن. تۇركيا جەتەكشىسى يزرايل بيلىگىن گازاداعى 45 مىڭنان استام پالەستينالىقتىڭ ولىمىنە كىنالاعان.

ءساۋىر ايىنىڭ باسىندا تۇركيانىڭ ساۋدا مينيسترلىگى گازادا اتىس تولىق توقتاپ، پالەستينالىقتارعا ۇزدىكسىز گۋمانيتارلىق كومەك بەرىلگەنگە دەيىن يزرايلگە ونەركاسىپ تاۋارلارىنىڭ 54 ءتۇرىن ەكسپورتتاۋعا شەكتەۋ ەنگىزگەن. شەكتەۋ قويىلعان تاۋار تىزىمىنە بولات جانە پلاستيك ترۋبالارى، الليۋميني وتكىزگىشتەر، موتور مايى، تسەمەنت، مينەرالدى تىڭايتقىشتار كىرەدى. يزرايل ول كەزدە بۇعان شارا قولداناتىنىن ايتپاعان.

دەرەككوز: ازاتتىق راديوسى

Abai.kz