جەلىنى اشساڭ، جەلدەي ەسىپ جەلپىنگەن جۇرت. ءبىر توبى بيلىك باسىڭدى السا دا ونىڭ ارەكەتىن قۇپ كورەمىز دەيدى. ولارعا سەنسەڭ، اۋرۋىمىزدى جاسىرا تۇرايىق، ءبارىبىر ولەمىزگە سايادى. ەندى ءبىر توبى اۋرۋعا ەم تابايىق، ءوستىپ ءجۇرىپ ولەمىز بە دەسە، تاعى ءبىر توپ بۇلاردىڭ ەمى ءبىزدىڭ دەرتىمىزگە داۋا بولمايدى دەپ داۋرىعادى. شۋ-شۋ، گۋ-گۋ. ونىڭ ۇستىنە كەزەكتى رەت جەر ماسەلەسى شىققاندا جەلىنىڭ تۇڭلىگى ءتىپتى جەلپىلدەپ كەتتى. تۇڭلىك بىلاي تۇرىپتى، ءۇي شايقالىپ كەتە جازداعاندا جوعارىدان ادەتتەگىدەن وزگەشە جۇمسارعان داۋىس ەستىلىپ، ارەڭ باسىلدى. باسىلدى-اۋ دەگەن كەزدە جەلىنىڭ تۇڭلىگى جەلپىلدەپ جاتقان كەزدە ادەتتەگى بەلسەندىلىكتەرى كۇرت باسەڭسىپ، جەر جۇتقانداي جوعالعان ءبىر توپقا قايتا جان كىردى. ولار سىرت قاراعان ادامعا، مەملەكەتتىك قۇرىلىمداردىڭ قىزمەتىن ءاپ-ساتتە وزدەرى اتقارا باستادى. زاڭدى ءتۇسىندىردى – پروكۋراتۋرانىڭ قىزمەتىن الدى; رەسمي ساياساتقا قارسى شىعۋعا بولمايتىنىن ءتۇرلى جولدارمەن جەتكىزدى - مەملەكەتتىك باق-تىڭ قىزمەتىن الدى; ىشكى-سىرتقى ارانداتۋشى جاۋدى ىزدەپ – ۇقك مەن قۇقىق قورعاۋ ورگاندارىنىڭ قىزمەتىن الدى. ولارعا مۇنداي قۇقىقتى كىم بەرگەنىن قۇدايلارى بىلەدى... قوعام بولعان سوڭ، ءارتۇرلى پىكىر بولاتىنى زاڭدىلىق. بالكىم، ءبىر ويلاعاندارى، ءوز ەسەپتەرى بار شىعار... وزدەرىنە سالساڭىز، بۇل ولاردىڭ وتانشىلدىق، مەملەكەتشىلدىك، بەيبىت ءومىردى سۇيگىش ازاماتتىق كوزقاراسى، ۇستانىمى-مىس. بىراق، جەلىدەگى قازىرگى قارقىندارى "بيلىكتى سۇيسەڭ، مەنشە ءسۇي" دەگەن سوزگە ءدوپ كەلىپ تۇر. قايدان بىلەيىك، مۇمكىن مۇنداي قوعام مۇشەلەرىنە وتان، مەملەكەت، حالىق دەگەن ۇعىمدار ءبىر ادامنىڭ بەينەسىندە عانا ەلەستەيتىن شىعار...

نۇرا ماتاي

Abai.kz