قاراعاندى وبلىستىق سوتىندا «احمەتوۆ ءىسى» بويىنشا سوتتالۋشىلاردىڭ «كولىكتىك-لوگيستيكالىق كەشەن» جشس-مەن بايلانىستى ەپيزود بويىنشا سوتتا جاۋاپ بەرۋى جالعاسۋدا. 19 قاراشاداعى سوت وتىرىسىندا سوتتالۋشىلاردىڭ ءبىرى، پرەمەر-مينيستر كەڭسەسى جەتەكشىسىنىڭ بۇرىنعى ورىنباسارى عابيت ماتاەۆ ءوزىنىڭ قۇقىن پايدالانىپ، تۇسىنىك بەرۋدەن باس تارتتى. مۇنداي جاعدايدا سوتتالۋشىنىڭ سوتقا دەيىنگى تەرگەۋ كەزىندە بەرگەن جاۋاپتارى جاريالانادى.

ايتا كەتەلىك، ع. ماتاەۆ 2010 جىلى «سارىارقا الەۋمەتتىك-كاسىپكەرلىك كورپوراتسياسى» ۇك اق-نىڭ باسقارما توراعاسى، 2011 جىلى قاراعاندى وبلىسى اكىمىنىڭ ورىنباسارى، 2013 جىلى پرەمەر-مينيستر كەڭسەسى جەتەكشىسىنىڭ ورىنباسارى قىزمەتتەرىن اتقارعان. سوتقا دەيىنگى تەرگەۋدە ول مىناداي تۇسىنىك بەرگەن: «2011 جىلدىڭ كوكتەمىندە س. احمەتوۆ ەكەۋارا اڭگىمەمىزدىڭ بارىسىندا ماعان قازاقستانداعى جانە الەمدەگى كولىكتىك-لوگيستيكالىق كەشەندەردىڭ تاجىريبەسىن زەرتتەۋگە تاپسىرما بەردى. سەبەبى ول وسىنداي جوبانى قاراعاندى وبلىسىندا جۇزەگە اسىرعىسى كەلەتىنىن ايتتى. مەن بۇل ماسەلەنى زەردەلەۋدى «سارىارقا» اكك» ۇك اق-نىڭ قۇرىلىمىنداعى «اگروكونسالتينگ-ك» اق-نىڭ باسشىسى ازامات مۇقانوۆقا تاپسىردىم. ارادا ءبىرشاما ۋاقىت وتكەندە ا. مۇقانوۆ تاپسىرمانى ورىنداپ، بولاشاق جوبانىڭ سىزباسىن جاسادى».

ع. ماتاەۆ ا. مۇقانوۆ دايىنداعان ماتەريالداردى قاراپ شىققاننان كەيىن س. احمەتوۆكە «اگروكونسالتينگ-ك» اق كولىكتىك-لوگيستيكالىق كەشەندى تانىستىرۋ ۇلگىسىن ازىرلەگەنىن باياندايدى. س. احمەتوۆ جوبانىڭ تانىستىرىلىمى وتەتىن كۇن مەن ۋاقىتتى بەلگىلەيدى. ودان ارىدەگى وقيعالار تىزبەگىن سوتتالۋشى بىلاي اڭگىمەلەگەن: «سول كۇنى مە الدە، باسقا كۇنى مە ەسىمدە جوق، اكىمدىكتەگى جينالىستان كەيىن احمەتوۆ مەنى جانە قالا اكىمى ابدىشەۆتى كابينەتىنە شاقىردى. سول جەردە كولىكتىك-لوگيستيكالىق كەشەننىڭ قۇرىلىسىنا جۇمسالاتىن قاراجات بارىن ايتتى. سونىمەن قاتار احمەتوۆ ابدىشەۆكە كەشەننىڭ قۇرىلىسىنا جەر تەلىمدەرىن ءبولۋدى، ماعان ونىڭ قۇرىلىسىنا جالپى باقىلاۋ جاساۋدى تاپسىردى. ايتارلىعى، كەزدەسۋدە ءجاي عانا جەر تەلىمى ەمەس، «اگروكونسالتينگ-ك» اق-نىڭ كوكونىس قويماسىنىڭ جانىندا ورنالاسقان جەر تەلىمى تۋرالى اڭگىمە قوزعالدى».

كوپ ۇزاماي «اگروكونسالتينگ-ك» اق جوبانى ودان ءارى پىسىقتاۋعا كىرىسىپ كەتەدى. احمەتوۆتىڭ نۇسقاۋىن ورىنداي وتىرىپ، ب. ابدىشەۆ كولىكتىك-لوگيستيكالىق كەشەننىڭ قۇرىلىسىنا «اگروكونسالتينگ-ك» اق-نىڭ كوكونىس قويماسىنىڭ جانىنان جەر تەلىمدەرىن بولەدى. سوتتالۋشى ع. ماتاەۆتىڭ ايتۋىنشا، س. احمەتوۆ كولىكتىك-لوگيستيكالىق كەشەننىڭ قۇرىلىسىنا اقشا سالۋشى ەتىپ كورسەتەتىن قانداي دا ءبىر شەتەلدىك ينۆەستور تابۋدى تاپسىرادى. «ياعني احمەتوۆتىڭ وسى كەشەنگە سالاتىن اقشاسى بولدى. بىراق ول اقشانى شەتەلدىك ينۆەستوردىڭ قاراجاتى رەتىندە سالۋدى جوسپارلادى» دەيدى سوتتالۋشى تەرگەۋدەگى تۇسىنىگىندە. سايىپ كەلگەندە الدەبىر تانىسى مارات يسباەۆ اشقان «Standartex Project LLP» كومپانياسى ينۆەستور رەتىندە تاڭدالادى. ءسويتىپ م. يسباەۆ «اگروكونسالتينگ-ك» اق-مەن بىرلەسىپ «قاراعاندى كولىكتىك-لوگيستيكالىق كەشەنى» جشس-ءىن قۇرادى.  جاڭا فيرمانى باسقارۋ ع. ماتاەۆتىڭ ۇسىنۋىمەن ا. بىلالوۆقا تاپسىرىلادى.

«2012 جىلدىڭ اقپان ايىندا س. احمەتوۆ ماعان كاسىپكەر د. ىدىرىسوۆپەن سويلەسكەنىن ايتتى. بىلۋىمشە، ىدىرىسوۆتىڭ كومپانياسى كوممۋنالدىق مەكەمەلەردى باسقاراتىن. س. احمەتوۆتىڭ سوزىنەن ۇققانىم، د. ىدىرىسوۆ شەتەلدىك كومپانيانىڭ شوتىنا اقشا اۋدارۋعا جاردەمدەسۋگە كەلىسىپتى. كەيىنىرەك ول قاراجات ينۆەستيتسيا ەسەبىندە «قاراعاندى كولىكتىك-لوگيستيكالىق كەشەنى» جشس-ءنىڭ شوتىنا اۋدارىلاتىن بولعان. وسىدان كەيىن س. احمەتوۆتىڭ نۇسقاۋىمەن «Standartex Project LLP»-ءتىڭ شوتىنا اۋدارىلۋى قاجەت اقشانى مەنىڭ ۇيىمە ءۇش رەت اكەلدى»،- دەلىنگەن ع. ماتاەۆتىڭ تەرگەۋگە بەرگەن تۇسىنىكتەرىنىڭ بىرىندە. ول اقشانى ع. راقىمجانوۆ، ب. ابدىشەۆ جانە ب. نۇرەكينا اكەلىپ بەرگەنىن ايتادى.

س. احمەتوۆ اركەز «Standartex Project LLP» كومپانياسىنىڭ شوتىنا اۋدارىلاتىن اقشانى اكەلەتىنىن ەسكەرتىپ وتىرعان. سوتتالۋشى ع. ماتاەۆ كەزدەسۋلەردىڭ ءوز ۇيىندە بولعانىن راستايدى. ءبىرىنشى رەت اقشانى 2012 جىلدىڭ اقپانىندا، ەكىنشى رەت 2012 جىلدىڭ ماۋسىمىندا جانە ءۇشىنشى رەت 2012 جىلدىڭ قىركۇيەگىندە جەتكىزگەن. بۇل وقيعانى: «اقشا سپورتتىق سومكەلەرگە سالىنعان. مەن سومكەلەردى اشىپ، وندا اقشانىڭ بار-جوعىن تەكسەردىم. بىراق اقشانى ساناعان جوقپىن. ويتكەنى ع. راقىمجانوۆ، ب. ابدىشەۆ جانە ب. نۇرەكينالار ماعان اقشانى بەرگەندە سومكەلەردە قانداي سوما بارىن ايتىپ وتىردى» دەپ تۇسىندىرەدى تەرگەۋدە سوتتالۋشى. ع. ماتاەۆ اقشانى العاننان كەيىن، بىردەن س. احمەتوۆكە تىكەلەي حابارلاعان. ال قارجىنىڭ اۋدارىمدارى س. احمەتوۆتىڭ قىزمەتتىك بولمەسىندە كەلىسىلگەن كورىنەدى. ناتيجەسىندە شەتەلدىك كومپانيا ارقىلى «كولىكتىك-لوگيستيكالىق كەشەن» جشس-ءنىڭ شوتىنا 6 ملن. دوللارعا جۋىق اقشا اۋدارىلعان.

ءامينا باكىر

Abai.kz