Data Hub كالكۋلياتسياسىنا سەنسەك قازاقستان حالقى كۇن ساناپ 732 ادامعا كوبەيىپ كەلەدى. ۇلتتىق ستاتيستيكا بيۋروسىنىڭ دەرەگى بويىنشا، جىلدىڭ باسىندا ءبىز 19 766 807 ادام بولساق، ءبىرىنشى قىركۇيەكتە 19 944 700 جەتتىك.

سوندا 8 ايدا 177 900 ادامعا وسكەنبىز. شامامەن 15 قاراشا كۇنى ءبىزدىڭ حالىق سانى 20 ميلليونعا جەتۋى ءتيىس. بۇل ءتول تەڭگەمىزدىڭ 30 جىلدىق مەرەيتويىنا تۇسپا-تۇس كەلەدى. ءتىپتى 20 ميلليونىنشى قازاقستان ازاماتىنا تەڭگەبەك الدە تەڭگەگۇل دەپ ەسىم بەرىلۋى دە عاجاپ ەمەس.

ال 2030 جىلى قازاقستان حالقى 21,8 ميلليون بولۋى ءتيىس.
ماعان وسى ءوسىمنىڭ وڭىرلىك بالانسى وتە قىزىق. مىسالى، جىل باسىنان بەرى حالىق سانى ەڭ كوبەيگەن ءوڭىر – استانا قالاسى. ول 8 ايدا 3,5 پايىزعا وسكەن.

ياعني، 1 354 556 ادامنان ەلوردا 1 402 002 ادامعا دەيىن جەتتى. الايدا، بۇل ءوسىم تابيعي تۋدىڭ ەسەبىنەن ەمەس، استاناعا كوشىپ كەلگەن دايىن ادامداردىڭ ارقاسىندا بولىپ وتىر. استاناعا جىل باسىنان بەرى 31 294 ادام كوشىپ بارعان، 16 152 ادام تۋعان. ەڭ كوپ بالا تۋعان تۇركىستان وبلىسى. وندا 30 مىڭ نارەستە دۇنيەگە كەلگەن. بىراق قاس قىلعاندا، جىل باسىنان بەرى 13 700 ادام كوشىپ كەتىپ، ستاتيستيكاسى بۇزىلىپ قالعان.

بىزدە تۋ بويىنشا تەك سولتۇستىك-قازاقستان وبلىسى مينۋستا وتىر. قالعان وڭىرلەردە تابيعي ءوسىم جاعىمدى سالدو كورسەتتى. ال ميگراتسيادا وتە قاۋىپتى تەندەنتسيا ورىن العانىن بايقايمىز: قازاقستان حالقى تەك بەس وڭىرگە كوشىپ باراتىن بولعان. ولار استانا، الماتى، ماڭعىستاۋ، شىمكەنت پەن الماتى وبلىسى. قالعان وڭىرلەردىڭ بارلىعىنان ادامدار كەتىپ جاتىر.

قازاقستان ەۋرازيالىق ەكونوميكالىق وداق اۋماعى بويىنشا 1991 جىلدان بەرى حالىق سانى وسكەن ەكى مەملەكەتتىڭ ءبىرى بولىپ وتىر. رەسەي، بەلارۋس، ارمەنيادا سوڭعى 32 جىلدا حالىق سانى ازايعان. ال قازاقستان مەن قىرعىزستاندا كەرىسىنشە كوبەيگەن. ءبىز 32 جىلدا 3,55 ميلليون ادامعا وستىك. ياعني، 16,45 ميلليوننان 20 ميلليونعا جەتتىك.

ادام سانى جانە ەكونوميكا

ادام سانى كوپ جانە تەز ءوسىپ جاتقان ەلدەر ءۇشىن تاياقتىڭ ەكى ۇشى بار. ءبىرىنشىسى – كەدەيلىك قاقپانى. الەۋمەتتىك كومەك پەن جۇمىس ورنى بارىنە بىردەي جەتپەيتىندىكتەن، حالقى كەدەيلىك قاقپانىنا ءتۇسىپ قالعان مەملەكەتتەر از ەمەس. ءبىز دە، جەتپەي جاتقان مەكتەپ، ەمحانا، بالاباقشا، اۋىز سۋعا قاراپ، حالىق سانىنىڭ ءوسىپ كەلە جاتقانىن جانە وسىعان قاتىستى قيىندىقتارعا تاپ بولا باستاعانىمىزدى كورىپ وتىرمىز. حالىقتىڭ ءوسۋى جاعدايىندا كەدەيشىلىكپەن كۇرەس باعدارلاماسىن ءساتتى جۇزەگە اسىرىپ، سونىڭ ارقاسىندا ەكونوميكاسىن ەسەلەپ وسىرگەن ەلدەر دە بار. بىزگە وسى مودەلدى قازىردەن باستاپ زەرتتەي بەرۋ قاجەت. كەدەيلىكتى جەڭگەن ەلدەر وسى ماسەلەلەردى ىشكى ءوندىرىس، ىشكى تۇتىنىم مەن شاعىن كاسىپكەرلىك ارقىلى شەشە الدى. ءبىزدىڭ دە وسى جولمەن جۇرەتىنىمىز انىق.

فوتو:اشىق دەرەككوزدەن

ايبار ولجاەۆ

Abai.kz