ۇلتتىق قوردىڭ قارجىسى حالىق مۇددەسى ءۇشىن جۇمىس ىستەي باستايدى. مەملەكەتتىك كەڭەسشى ەرلان قارين ءماجىلىس قاراۋىنا تۇسكەن «ۇلتتىق قور – بالالارعا» باعدارلاماسىنا قاتىستى وسىلاي پىكىر ءبىلدىردى، دەپ حابارلايدى قازاقپارات.

«بۇگىن ءماجىلىس دەپۋتاتتارى ۇلتتىق قوردان بالالارعا بولىنەتىن جاردەماقى ماسەلەسى جونىندەگى زاڭ جوباسىن قاراۋعا كىرىستى.

اتالعان زاڭ جوباسى كەلەسى جىلدىڭ 1 قاڭتارىنان باستاپ ىسكە اساتىن مەملەكەت باسشىسىنىڭ «ۇلتتىق قور – بالالارعا» اتتى باعدارلاماسى بويىنشا ازىرلەنىپ جاتىر.

بۇل – پرەزيدەنت جۇزەگە اسىرىپ جاتقان اۋقىمدى رەفورمالار باعدارلاماسىنىڭ نەگىزگى باستامالارىنىڭ ءبىرى.

اتالعان باستاما تۋرالى پرەزيدەنت بىلتىرعى جىلدىڭ 1 قىركۇيەك كۇنى جاريالاعان جولداۋىندا ايتقان بولاتىن.

مەملەكەت باسشىسىنىڭ «ۇلتتىق قور – بالالارعا» جوباسى جاس قازاقستاندىقتاردىڭ كامەلەت جاسىنا تولعان كەزىندە ءوزىنىڭ باسپانا جاعدايىن جاقسارتۋىنا نەمەسە ءبىلىم الۋىنا مۇمكىندىك بەرەدى.

وسىلايشا، پرەزيدەنتتىڭ الەۋمەتتىك ماڭىزدى باستاماسى زاڭ تۇرعىسىنان راسىمدەلىپ، ۇلتتىق قوردىڭ قارجىسى حالىقتىڭ مۇددەسى ءۇشىن جۇمىس ىستەي باستايدى»، - دەپ جازدى ە.قارين.

ەسكە سالايىق، بۇگىن ءماجىلىس «ۇلتتىق قور – بالالارعا» قۇجاتىن قاراۋعا الدى.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە قر ۇلتتىق قورىنان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەملەكەت باسشىسىنىڭ «ۇلتتىق قور – بالالارعا» جوباسىن 2024 جىلعى 1 قاڭتاردان باستاپ ىسكە قوسۋ ماقساتىندا ازىرلەندى. ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى بالالاردىڭ ارناۋلى جيناقتاۋشى شوتتارىندا جيناقتالاتىن بولادى.

Abai.kz