جاسىراتىنى جوق بۇۇ كىرگەن 6 ءتىلدى تۇتىنۋشى مەملەكەتتەر قازىرگى ءىت زامانىندا جالعاندى جالپاعىنان باسۋدا. بۇل تۋرالى Mezgil.kz اقپاراتتىق پورتالى جازدى. 

«جالعاندى جالپاعىنان باسۋدا» دەگەندە ايتپاعىمىز: «اقپاراتقا كىم يەلىك ەتسە، سول الەمدى بيلەيدى» دەگەن ساياسي قاناتتى ءسوزدىڭ استارىندا جاتقان ءومىر شىندىعى. قازىرگى كوزى اشىق قازاق اراب، ورىس، اعىلشىن جانە قىتاي باق قۇردىمىنا تۇسە باستاعانى دا جاسىرىن ەمەس. وسى ەلدەردىڭ قايسىندا ءبىلىم الدىڭ، سول ەلدىڭ سويىلىن قالاي سوققانىڭدى بىلمەي قالاسىڭ دەگەن وسى.

قىتاي اقپاراتتىق سوعىس ارمياسىن قۇردى

قازىر وسى 6 ءتىلدىڭ ەگەلەرى وزدەرىنە تاۋەلدى ەلدەرگە ءوز ينتەرنەت قۇلدانۋىن جۇرگىزە باستادى. بۇرىن بۇل زالىمدىق استىرتىن جۇرگىزىلسە، ەندى ولار ءبارىن جيىپ قويىپ، اشىق بەل سىبانا كىرىستى. سونىڭ جارقىن مىسالى - قازاق بيلىگى «تيك-توكپەن كۇرەسەمىز بە» دەپ جاتقاندا قىتاي اقپاراتتىق سوعىس ارمياسىن قۇرىپ ۇلگەردى.

«The Insider»: «قىتاي ارمياسىندا اقپاراتتىق وپەراتسيالارعا جاۋاپتى اسكەر پايدا بولادى»،- دەپ جازدى. ەندى وسىعان وي جۇگىرتىپ كورەيىك.

19 ساۋىردە بەيجىڭنىڭ باي اۋدانىندا قىتاي حالىق-ازاتتىق ارمياسىن اقپاراتتىق قولداۋ كۇشتەرىنىڭ قۇرىلتاي كونفەرەنتسياسى ءوتتى. وتىرىسقا قىتاي كوممۋنيستىك پارتياسى ساياسي بيۋروسىنىڭ مۇشەسى جانە ورتالىق اسكەري كەڭەس توراعاسىنىڭ ورىنباسارى حە ۆەيدۋن توراعالىق ەتتى.

قۇرىلتاي كونفەرەنتسياسىندا قىتاي كوممۋنيستىك پارتياسى ورتالىق كوميتەتىنىڭ باس حاتشىسى، مەملەكەت پرەزيدەنتى جانە ورتالىق اسكەري كەڭەستىڭ توراعاسى سي تسزينپين اقپاراتتىق قولداۋ كۇشتەرىنە ارميا تۋىن تاپسىرىپ, پارتيانىڭ ورتالىق كوميتەتى مەن ورتالىق اسكەري كوميسسياسى اتىنان ول اقپاراتتىق قولداۋ كۇشتەرىنىڭ بارلىق وفيتسەرلەرى مەن ساربازدارىن جىلى لەبىزبەن قۇتتىقتادى.

سي: جاڭا داۋىردە قۋاتتى ارميا مەن ونى اقپاراتتىق قولداۋ ارمياسى كەرەك!

توراعا سي تسزينپين جاڭا داۋىردە كۇشتى ارميا يدەياسىن ىسكە اسىرۋ، جاڭا ءداۋىردىڭ ستراتەگيالىق اسكەري ساياساتىن ىسكە اسىرۋ، ارميانىڭ ساياسي قۇرىلىسىن ۇستانۋ، كۇشتى ارميانى، عىلىم مەن تەحنولوگيانى رەفورمالاۋ قاجەتتىگىن اتاپ ءوتىپ:

«كۇشتى ارميا اسكەردى باسقارۋ، جۇيەلى ىقپالداستىق پەن جاھاندىق قولداۋدىڭ ستراتەگيالىق تالاپتارىنا سايكەس سوعىسقا دايىندىققا دەن قويىپ، العا ىلگەرىلەۋ، ءبىرتۇتاس جۇمىس ىستەۋ جانە اقپاراتتىق قولداۋدىڭ قۋاتتى قازىرگى زامانعى كۇشتەرىن قۇرۋعا ۇمتىلۋعا ءتيىس», - دەگەنىنەن كوپ نارسەنى اڭعارۋعا بولادى.

اقپاراتتىق قامتاماسىز ەتۋ كۇشتەرىن تۇزەتۋ مەن قالىپتاستىرۋ پارتيانىڭ ورتالىق كوميتەتى مەن ورتالىق اسكەري كوميسسيانىڭ اسكەري ونەركاسىپتى نىعايتۋ تۇرعىسىنان قابىلداعان ماڭىزدى شەشىمى بولىپ تابىلىپ وتىرعانى جاي ەمەس. وسى ءبىر جاڭا ۇلگىدەگى قارۋ-جاراقتىڭ قۇرىلىمى مەن قۇرامداستىعىن قۇرۋ جانە قىتايلىق ەرەكشەلىكتەرى بار قازىرگى زامانعى اسكەري قۋات جۇيەسىن جەتىلدىرۋ جونىندەگى ستراتەگيالىق باستاما ومىرگە كەلىپ، شىنداپ قولعا الىنا باستادى.

جاڭا ستراتەگيالىق باستاما ۇلتتىق قورعانىس پەن ارميانى جاڭعىرتۋدى جەدەلدەتۋگە جانە جاڭا داۋىردە حالىق ارمياسىنىڭ ميسسياسى مەن مىندەتتەرىن ءتيىمدى ورىنداۋعا ەلەۋلى ءارى الىس اسەرىن تيگىزەتىن ورتالىق ازيا بۇل تالپىنىستان تىسقارى قالمايتىنى ايتپاسا دا تۇسىنىكتى.

(سۋرەت: nhk.or.jp)

توراعا سي نە دەدى?

«ءبىز وپەراتسيالاردى تاباندى تۇردە قولداۋعا، اقپاراتتىق ۇستەمدىكتى جانە بىرلەسكەن جەڭىستى ۇستانۋعا، اقپاراتتىق بايلانىستاردى بۇعاتتاۋعا، اقپاراتتىق رەسۋرستاردى ىقپالداستىرۋعا، اقپاراتتى قورعاۋدى كۇشەيتۋگە، جالپىاسكەري بىرىككەن جاۋىنگەرلىك جۇيەگە تەرەڭ كىرىگۋگە، اقپاراتتىق قولداۋدى ءدال ءارى ءتيىمدى جۇزەگە اسىرۋعا جانە بارلىق باعىتتار مەن سالالاردا اسكەري كۇرەستى قامتاماسىز ەتۋگە قىزمەت ەتۋگە ءتيىسپىز.

ءبىز يننوۆاتسيالار مەن دامۋدى جەدەلدەتۋگە، جاۋىنگەرلىك قاجەتتىلىكتەردى قاناعاتتاندىرۋدىڭ ىرگەلى قاعيداتتارىن ۇستانۋعا، جۇيەلى ۇيلەستىرۋدى نىعايتۋعا، بىرلەسكەن قۇرىلىس پەن اقپارات الماسۋدى كوتەرمەلەۋگە، عىلىمي جانە تەحنولوگيالىق يننوۆاتسيالاردى نىعايتۋعا، قازىرگى زامانعى سوعىس تالاپتارىنا جاۋاپ بەرەتىن جانە ءبىزدىڭ ارميامىزدىڭ سيپاتتامالارىنا يە جەلىلىك اقپاراتتىق جۇيەنى قۇرۋعا جانە جوعارى ساپالى جۇيەنىڭ جاۋىنگەرلىك مۇمكىندىكتەرىن جەدەلدەتىپ جاقسارتۋعا ىقپال ەتۋگە ءتيىسپىز»، - دەدى.

(سۋرەت: nhk.or.jp)

اقپاراتتىق قولداۋ كۇشتەرىن قۇرۋ تۋرالى بۇيرىق

قۇرىلتاي جينالىسىندا قىتاي كوممۋنيستىك پارتياسى ساياسي بيۋروسىنىڭ مۇشەسى جانە ورتالىق اسكەري كەڭەس توراعاسىنىڭ ورىنباسارى چجان يۋسيا سي تسزينپين شىعارعان اقپاراتتىق قولداۋ كۇشتەرىن قۇرۋ تۋرالى ورتالىق اسكەري كەڭەستىڭ بۇيرىعىن، اقپاراتتىق قولداۋ كۇشتەرىنىڭ باسشىلىق توبىنىڭ مۇشەلەرىن تاعايىنداۋ تۋرالى بۇيرىقتى جانە پارتكومنىڭ تۇراقتى كوميتەتىنىڭ قۇرامى تۋرالى حابارلامانى وقىدى.

وسىدان سوڭ: «قحر توراعاسى سي ءتسزينپيننىڭ بۇيرىعىمەن قىتاي ارمياسىندا اقپاراتتىق قولداۋ كۇشتەرىنىڭ جاڭا ءتۇرى قۇرىلادى», - دەپ حابارلادى ۇكىمەت سايتى.

ولار وسىدان توعىز جىل بۇرىن قۇرىلعان ستراتەگيالىق قولداۋ كۇشتەرىنىڭ نەگىزىندە پايدا بولادى. سونداي-اق، ولاردان تاعى ەكى اسكەر ءتۇرى بولىنەدى: كيبەرنەتيكالىق جانە اەروعارىش كۇشتەرى، ولار اقپاراتتىق قولداۋ كۇشتەرىمەن قاتار ارەكەت ەتەتىن بولادى.

سي تسزينپين اتاپ وتكەندەي، اقپاراتتىق قولداۋ كۇشتەرى «كيبەر فورماتتىق جۇيەنى قۇرۋ مەن پايدالانۋدى ۇيلەستىرۋدە نەگىزگى قولداۋ كورسەتەدى».

«Bloomberg»: «بۇل وزگەرىستەر 2015 جىلدان بەرى قىتاي ارمياسىنداعى ەڭ ءىرى قايتا قۇرۋ بولىپ تابىلادى»، - دەپ جازادى. بۇل الەمدىك ىقپالى ءۇشىن اقش-پەن باسەكەلەستىك اياسىندا، سونداي-اق قىتاي بيلىگىنىڭ باتىس ەلدەرىن كيبەرشابۋىلدارعا ايىپتاۋى اياسىندا بولىپ وتىر.

ساراپشىلاردىڭ ايتۋىنشا، بۇل وزگەرىستەر قىتاي قارۋلى كۇشتەرىنىڭ اقپاراتتىق قۇرامداس بولىگى ماڭىزدى ءرول اتقاراتىن سوعىسقا دايىندىعىن ارتتىرۋعا باعىتتالعان. اسكەري سالاداعى اۋقىمدى تازاتۋدان كەيىنگى قحر تامىرىنا قان جۇگىرتۋدىڭ جاڭا قادامى - قىتاي ارمياسىندا اقپاراتتىق وپەراتسيالارعا جاۋاپتى اسكەر تەگىنىڭ ناقتى ومىرگە كەلگەنى بولىپ تابىلادى. ەندى بۇكىل الەم اقش بۇعان قالاي جاۋاپ قاتپاقشى دەپ كۇتىپ وتىرعان جايى بار.

Abai.kz