ەستەرىڭىزدە بولسا، بيىل قاڭتاردىڭ 5-ءى كۇنى الەمگە ايگىلى McDonald's كومپانياسى قازاقستانداعى قىزمەتىن توقتاتاتىنىن حابارلاعان ەدى.

«Food Solutions KZ» جشس باسقاراتىن McDonald's جىلدام تاماقتانۋ برەندى ءوز جۇمىسىن توقتاتۋدىڭ باستى سەبەبى – «ەت جەتكىزۋدەگى شەكتەۋلەر» دەپ تۇسىندىرگەن. قازاقستاندا McDonald's-تىڭ 24 مەيرامحاناسى بولعان. وندا ۇزىن-سانى 2000-عا جۋىق ادام جۇمىس ىستەگەن. كەيىن، McDonald's-تىڭ قازاقستانداعى وكىلدىگىنىڭ ءباسپاسوز قىزمەتى: «جۋىردا جاڭا اتاۋمەن قايتا اشىلامىز»، - دەگەن مالىمدەگەن.

ال بۇگىن McDonald's-تىڭ ورنىنا رەسەيلىك برەند كەلىپ جايعاسقالى جاتقانى تۋرالى اقپارات تارادى. قازىر ەلىمىزدە «ۆكۋسنو - ي توچكا» تاۋار بەلگىسىن تىركەۋ ءوتىنىشى قارالىپ جاتىر ەكەن. مۇنى قر ادىلەت مينيسترلىگىنىڭ ءباسپاسوز قىزمەتى دە راستادى.

«قازاقستان رەسپۋبليكاسىنىڭ تاۋار بەلگىلەرىنىڭ مەملەكەتتىك تىزىلىمىندە «ۆكۋسنو - ي توچكا» دەگەن تاۋار بەلگىسى تىركەلمەگەن. الايدا، ساراپتامالىق ۇيىمنىڭ قاراۋىندا «سيستەما پبو» جاۋاپكەرشىلىگى شەكتەۋلى قوعامدىعى اتىنان تۇسكەن «ۆكۋسنو - ي توچكا» تاۋار بەلگىسىن تىركەۋگە قاتىستى ءوتىنىم بار»، - دەپ حابارلادى اتالعان ۆەدومستۆو.

«ۆكۋسنو - ي توچكا» تاۋار بەلگىسى رەسەيدە McDonald's جەلىسى جابىلعاننان كەيىن اشىلعان فاست-فۋد مەيرامحانالار جەلىسى. العاش مەيرامحانا بىلتىر 12 ماۋسىمدا اشىلدى.

ءسويتىپ، McDonald’s قازاقستاننان كەتتى. بۇل اقپاراتقا كەي ادامدار «كەتسە كەتە بەرسىن، پايداسىنان زيانى كوپ»، «ءوز ۇلتتىق تاعامىمىزدى دامىتامىز»، «بۋرگەر كەتكەننەن بۇيرەگىمىز ءتۇسىپ قالماس» دەگەندەي پىكىر بىلدىرۋدە. الايدا راسىمەن سولاي ما؟ قۋانارلىق جايت پا؟

McDonald’s جاي عانا جىلدام تاماقتانۋ جەلىسى دەۋگە كەلمەس، بۇل جاھاندانۋدىڭ (گلوباليزاتسيا) نىشانىنا اينالعالى قاشان. ءتىپتى الەۋمەتتىك عىلىمدا ماكدونالديزاتسيا تەرمينى دە بار.

ەلىمىزدەگى جەلىلەرى حالىققا جۇمىس، بيلىككە سالىق بەرىپ تۇرعانىنان بولەك، نەگىزىنەن ول مەملەكەتتىڭ الەمدىك قاۋىمداستىقپەن قاتىناسىن دا كورسەتەتىن ءبىر ولشەم ىسپەتتەس. ەۋروپالىق تۋريستەردىڭ بارعان ەلىن وسى ءبىر ايگىلى فاستفۋد پاتشاسىنىڭ بار-جوعىمەن ولشەيتىن ادەتتەرى بار.

ايتپاقشى ءبىر قىزىق فاكتىنى ايتا كەتەيىك. كەڭەس-اۋعان سوعىسى جايلى... 1979 جىلى كسرو اۋعانستانعا باسىپ كىرىپ، ارتىنشا باتىس كسرو-عا سانكتسيانى ۇدەتىپ، 80-جىلعى وليمپياداعا بويكوت جاريالاعانىن بىلەسىزدەر. مىنە، سول وليمپيادانىڭ الدىندا 4-5 جىل بۇرىن كسرو McDonald’s-تى كىرگىزۋ ءۇشىن باتىسپەن (اقش-پەن) جانتالاسا بەيرەسمي كەلىسىم جۇرگىزەدى. ويتكەنى وليمپياداعا كەلەتىن ەۋروپالىقتار McDonald’s ارقىلى «كسرو دامىعان ەكەن» دەگەن باعا بەرسىن دەپ ويلاعان ەدى.

بىراق ماسكەۋ اۋعانعا كىردى، McDonald’s ايدالادا قالدى. العاشقى مەيرامحاناسى كسرو-دا 1990 جىلى اشىلدى. «ىرىگەن-شىرىگەن باتىستى» كۇنى-ءتۇنى جاماندايتىن كسرو حالقى سول مەيرامحانادان بۋرگەر جەۋگە كۇنى-ءتۇنى كەزەكتە تۇردى. بۇل جابىق قوعامعا جاھاندانۋدىڭ ەسىگى اشىلعانداي ءسات ەدى. ال بيىل كرەمل باۋىرى ۋكرايناعا سوعىس اشىپ، رەسەيدە 850 مەيرامحاناسى جابىلدى. بۇل كەرىسىنشە وركەنيەتتى الەم ماسكەۋ ءۇشىن ەسىگىن تارس جاپقانداي ارەكەت ەدى. كەيىن ول مەيرامحانالار اتىن وزگەرتىپ، رەسەيلىك سەرۆيسپەن (دەڭگەيى بەلگىلى) قايتا اشىلدى، بىراق ول ەندى الەم بىلگەن McDonald’s ەمەس ەدى.

McDonald’s-تىڭ بىزدەگى جابىلۋىندا قانداي سيپات جاتقانىن بىلمەدىك. مۇمكىن قاماۋداعى بورانباەۆتىڭ كاسىبى، مۇمكىن راسىمەن ەت جەتكىزۋدەگى قيىندىق، مۇمكىن باسقا.

Abai.kz