سەنبى, 28 قاڭتار 2023
ايماق 1234 5 پىكىر 19 قازان, 2022 ساعات 13:45

اباي وبلىسى: قارىزعا باتقان ۇستازدار قايتپەك؟

وبلىسىمىز اشىلدى دەپ تاقيا مەن تىماقتى اسپانعا اتتىق. بىراق، شەشۋى كۇردەلى ماسەلەلەر القىمىمىزدان الۋدا. سەمەيلىك قوعام بەلسەندىسى، اقىن، دراماتۋرگ ءام اۋدارماشى مۇرات راقىمجان الەۋمەتتىك جەلدەگى ءوزىنىڭ پاراقشاسىندا ۇلكەن پروبلەما كوتەردى. ەندى سوعان كەزەك بەرەلىك.

«جاڭادان قۇرىلعان اباي وبلىسىنىڭ ۇستازدارى ەكى ايعا جۋىق جالاقىسىز ءجۇر. سەبەبىن بىلمەك بوپ، تانىس مۇعالىمدەرىمىزدى اڭگىمەگە تارتىپ كوردىك. ولاردىڭ ءبىرازى تامىز ايىنان بەرى جالاقى العانىمىز جوق دەسە، كەيبىر مەكتەپتەردە قىركۇيەك ايىندا از-ماز اۆانس بەرىلگەن كورىنەدى. «بۇل ايماقتاردى ءبولۋ جانە ءبىلىم بەرۋ ۇيىمدارىن قايتا تىركەۋمەن بايلانىستى ۋاقىتشا ماسەلە»، - دەيدى وزدەرى.

دەۋىن دەپ الىپ: «ەكى ايدان بەرى سۋ مەن جارىقتىڭ اقشاسى تولەنبەدى. سۋدى قويشى، تاسىپ ىشەرمىز. جارىقتى قيىپ تاستاسا جاعدايىمىز قيىن. نەسيەمىزدىڭ دە پەنيەسى ءوسىپ جاتىر»، - دەپ ۋايىم قىلادى.

ۋايىمى كوپ ۇستازدان، ۇلاعات كۇتۋ قيىن. شاكىرتتەرگە جانىم اشيدى. بۇگىن تاڭەرتەڭ «اباي وبلىسىنىڭ ۇستازدارى مەن بيۋدجەتتىك مەكەمە قىزمەتكەرلەرى ەكى ايدان بەرى جالاقىسىز جۇمىس ىستەپ ءجۇر»، دەگەن ماسەلەنى كوتەرگەن ەدىم. جازبام پاراقشامدا قالاي جاريالاندى، سولاي مەسسەندجەرىمە حاتتار جاڭبىرشا جاۋدى.

كوبىسى ۇستازدار قاۋىمى مەن بيۋدجەتتىك مەكەمە قىزمەتكەرلەرى. ولاردىڭ كەيبىرى: «كوكەيدە جۇرگەن ماسەلەنى كوتەردىڭىز!»، - دەپ العىستارىن ايتسا، كەيبىرى: «ەكى ايدان بەرى نەسيەمىز تولەنگەن جوق، پەنيەسى ءوسىپ جاتىر»، - دەپ الاڭداۋلى.

جاڭا وقۋ جىلى باستالعالى شاكىرتاقىلارىن الا الماي جۇرگەندەرىن ايتىپ شاعىمدانعان ستۋدەنتتەر دە بارشىلىق.

«حات-ساۋاتتارىڭىز بار عوي. وسىنى جازىپ، قۇقىقتارىڭىزدى نەگە قورعامايسىزدار؟»، - دەسەم، ءبارى قىرىق سىلتاۋ ايتىپ سىتىلىپ الەك. «تىم بولماسا، مەنىڭ جازبامنىڭ استىنا كوممەنت قىپ جازىڭىزدار؟»، - دەسەم دە ات-توندارىن الا قاشادى.

جاسامىستار جاعى: «جەپ وتىرعان نانىمىزدان ايرىلىپ قالامىز عوي»، - دەسە، جاستار جاعى: «وقۋدان قۋىلىپ كەتەمىز»، - دەپ قورقادى.

«وۋ، اينالايىندار-اۋ، جالاقى مەن شاكىرتاقى ماعان ەمەس، سىزدەرگە كەرەك قوي. سىزدەر ءۇشىن جازىپ، جاماناتتى بولىپ وتىرمىن عوي»، - دەسەم، قۇلاق اساتىن تۇرلەرى كورىنبەيدى.

ءتىپتى، قانشا جەردەن ءوپتيميستپىن دەگەن مەنىڭ ءوزىم دە: «اپىر-اي، قانداي قوعامدا ءومىر ءسۇرىپ وتىرمىز؟»، - دەگەن كۇمانعا قالدىم.

وتىز جىلدىق توتاليتارلىق جۇيە جۇرتشىلىقتى ۇدايى ۇرەيدە ۇستاپ، كولەڭكەسىنەن قورقاتىن سۋجۇرەك قىپ قويعانىنا كوزىم جەتتى.

ءيا، ۇرەي بيلەگەن ەلدىڭ بولاشاعى بۇلىڭعىر.

وبالى كانە، اۋەلى اباي وبلىسى ءبىلىم باسقارماسىنىڭ قىزمەتكەرلەرى جازبامنىڭ استىنا كوممەنت قالدىرىپ، تۇسىنىكتەمە بەردى. ونىڭ ءىزىن الا، وبلىستىق ءبىلىم باسقارماسىنىڭ باسشىسى نۇرجان نىعمەتوللاۇلى احمەتقاليەۆ مىرزانىڭ ءوزى قوڭىراۋ شالىپ: «مۇعالىمدەر مەن بيۋدجەتتىك مەكەمە قىزمەتكەرلەرىنىڭ الدى كەشەدەن بەرى جالاقىسىن الا باستاعانىن، ال ستۋدەنتتەرگە دە بۇگىن-ەرتەڭ شاكىرتاقىلارى تولىق تولەنىپ، ەسەپ ايىرىساتىندارىن» ايتىپ ءمان-جايدى ءوز اۋزىمەن ءتۇسىندىردى.

«تولەيسىزدەر عوي. تابان اقى، ماڭداي تەرلەرى، تولەمەگەندە قايدا باراسىزدار؟!

ەندى ەڭبەك اقىلارى كەشىكتىرىلىپ بەرىلگەنى ءۇشىن مۇعالىمدەرگە وتەماقى تولەنە مە؟»، -دەسەم: «ول جاعى قاراستىرىلماعان»، - دەيدى. «ولاي بولسا، بانكتەرگە پەنيا قوسپاۋ جاعىن قاراستىرۋعا ىقپال ەتىڭىزدەر!» دەگەن ۇسىنىسىم «جاۋاپسىز» قالدى.

مەن ءوز تاراپىمنان «وتەماقى نەمەسە پەنيا ماسەلەسىن اياقسىز قالدىرمايتىنىمدى» ەسكەرتتىم. ءسويتىپ، نۇرجان نىعمەتوللاۇلى مىرزامەن «جىلى قوشتاستىق».

ەندى وسىنداعى ءلاززات اقتانوۆا باستاعان يۋريست دوستارىمنان وسى جاعىنان (وتەماقى مەن پەنيە قوسپاۋ) كەڭەس كۇتەمىن!» دەپ ويىن تۇيىندەيدى مۇرات مىرزا.

سىزدەر بۇعان نە دەيسىزدەر، بيلىك ۇستازدار مەن بيۋدجەتتەگىلەردىڭ جان ايقايىن شەشىپ بەرە الا ما؟ قارىزعا باتقان اعايىنعا، جەڭىلدىك جاسالا ما؟..

ءابىل-سەرىك الىاكبار

Abai.kz

5 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3143
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1918