جۇما, 1 شىلدە 2022
انە، كوردىڭ بە؟ 2165 20 پىكىر 5 مامىر, 2022 ساعات 12:04

رەسەيلىك باق پروپاگانداسى: كىلەڭ لاقپا...

رەسەي ۋكرايناعا قارسى سوعىس اشقانىنا 70 كۇننەن استى. ۋكراينا ارمياسى اگرەسسورعا قارسى ايانباي كۇرەسىپ جاتىر.

پەنتاگون جوعارى لاۋازىمدى وكىلىنىڭ ايتۋىنشا، رەسەي دونباسستا ءسال پروگرەسسكە قول جەتكىزگەنىمەن، ورىس اسكەرى قولباسشىلارىنىڭ دەڭگەيى ءماز ەمەس، جاۋىنگەرلىك رۋحى تومەن، لوگيستيكا دا ناشارلاعان.

سونداي-اق ۋكراينا ارمياسى سوڭعى 24-48 ساعات ىشىندە ورىس اسكەرىن حاركوۆتەن شىعىسقا قاراي 40 شاقىرىم جەرگە دەيىن قۋىپ شىققان.

ال، ۇلىبريتانيا قورعانىس مينيسترلىگىنىڭ سوزىنشە، رەسەي 2005 جىلدان 2018 جىلعا دەيىنگى ارالىقتا قورعانىس بيۋدجەتىن ەكى ەسە ارتتىرعان. سوعان قاراماستان ۋكراينامەن سوعىستا ۇستەمدىك ورناتا العان جوق. ەۋروپا وداعى رەسەيگە قارسى التىنشى سانكتسيا پاكەتىن دايىنداپ جاتىر. ۇلىبريتانيا پرەمەر-ءمينيسترى بوريس جونسون ۋكرايناعا اسكەري كومەك رەتىندە 356,6 ميلليون ەۋرو كومەك بەرەتىنىن ايتتى. ال، رەسەي پرەزيدەنتى پۋتين وزىنە قارسى شىققان «جاۋ ەلدەرگە» جاۋاپ رەتىندە قارسى سانكتسيا سالىپتى.

ەكى ەلدىڭ اراسىندا قارۋلى سوعىسپەن قاتار اقپارات سوعىسى دا كۇشەيگەن. ەندى رەسەيلىك پروپاگاندالىق تەلەارنالار مەن باق-تار كىسى اقىلىنا قونبايتىن، ەستىگەنننىڭ ەزۋىنە كۇلكى ۇيىرەتىن اقپارلار تاراتۋعا كوشكەنىن كورىپ وتىرمىز.

سولاردىڭ ءبىرسىپىراسىن توپتاپ ۇسىنۋدى ءجون سانادىق، مارحابات…

«قارا ماگيا»

رەسەيلىك باق (ينتەرنەت سايتتارى بار، تەلەارنالارى بار ت.ب.) «ۋكراينا اسكەرلەرى «قارا ماگيامەن» اينالىستى»، - دەپ شۋلاپ جاتىر. ترەحيزبەنكا اۋىلىنىڭ شەتىندەگى ۋكراينا مينومەتشىلەرىنىڭ شتاب-پاتەرىندە اسكەرلەر قارۋ-جاراقتىڭ كۇشىن ارتتىرۋ ءۇشىن قارا سيقىرمەن اينالىسىپتى-مىس.

«ا4472 اسكەري ءبولىمى ورنالاسقان شتابتا جىن-شايتان شاقىرۋدىڭ بەلگىلەرى تابىلعان. جالپى، بۇل بەلگى - انارحيا، قارۋ-جاراق جانە فاشيستىك سيمۆوليزم يدەيالارىن بىرىكتىرەتىن قارا كۇشتەردىڭ سيقىرلى ءمورى»، - دەپتى رەسەيلىك ءبىر ماديەتتانۋشى.

كيسەلەۆتىڭ لاقپاسى

«روسسيا1» تەلەارناسىنداعى «ۆەستي نەدەلي» باعدارلاماسىنىڭ ەفيرىندە رەسەيلىك ناسيحاتشى كيسەلەۆ «رەسەي ۇلىبريتانيانى ءبىر ساتتە جويىپ جىبەرە الاتىنىن» ايتىپ، قوقان-لوقى كورسەتە سويلەگەن.

«الاقانداي ارالدا وتىرىپ رەسەيدى يادرولىق قارۋمەن قورقىتۋدىڭ قاجەتى قانشا؟ بۇل «تيتىمدەي ارال» ءبىر «سارمات» رس-28 زىمىرانىنىڭ سوققىسىنان امان قالمايدى. ءبىر عانا تەتىكتى باساسىڭ، بولدى»، - دەيدى كيسەلەۆ. ول ۇلىبريتانيانى تەڭىز تۇڭعيىعىنا جىبەرۋدىڭ تاعى ءبىر امالى رەتىندە «پوسەيدون» يادرولىق ەنەرگوقوندىرعىسىمەن جابدىقتالعان رەسەيلىك پيلوتسىز سۋاستى اپپاراتىن اتاعان.

زەلەنسكيدىڭ سويى ءھام جويتتەردىڭ وكپەسى

رەسەي سىرتقى ىستەر ءمينيسترى سەرگەي لاۆروۆ يتاليالىق تەلەشوۋعا بەرگەن سۇحباتىندا ۋكراينا پرەزيدەنتىنىڭ ۇلتىنا تيىسە سويلەگەن.

«زەلەنسكيدىڭ ەۆرەي بولعانىنان نە پايدا؟ بۇل ۋكرايناداعى ناتسيستىك ەلەمەنتتەردى جوققا شىعارا ما؟»، - دەپتى لاۆروۆ. ول: «انتيسەميتتەر ەڭ الدىمەن ەۆرەيلەردىڭ ءوز ىشىنەن شىققان، فاشيستىك گەرمانيانى باسقارعان گيتلەردىڭ دە بويىندا ەۆرەي قانى بولعان»، - دەگەن.

وسى حاباردان كەيىن يزرايل سىرتقى ىستەر ءمينيسترى ياير لاپيد: «لاۆروۆتىڭ انتيسەميتيزمگە ەۆرەيلەردىڭ وزدەرى كىنالى دەۋى «كەشىرۋگە كەلمەيتىن قاتە سوزدەر» جانە ول «ناسىلشىلدىكتىڭ ەڭ جابايى دەڭگەيىن كورسەتتى»، - دەپ مالىمدەگەن.  يزرايل ءمينيسترى: «لاۆروۆ كەشىرىم سۇراسىن»، - دەپ تالاپ ەتتى. بىراق، لاۆروۆ جالعان سوزدەرىنە كەشىرىم سۇراماق تۇگىلى، كەلەسى كۇنى يزرايلدىك ارىپتەستەرىنىڭ وزدەرىن كىنالاپ، تۆيتتەرىندە جازبا قالدىردى. «يزرايل كيەۆتەگى نەوناتسيستەردى قولداپ وتىر»، - دەدى لاۆروۆ.

ازوۆ پولكىن قارالاۋ

رەسەيدىڭ باسقىنشى اسكەرىنە اتوي سالىپ، جان ايانباي تويتارىس بەرىپ جاتقان ايگىلى ازوۆ پولكىن بۇگىندە الەم جۇرتى بىلەدى. ۋكراينانىڭ ماريۋپول قالاسىندا جاساقتالعان ازوۆ پولكىن رەسەيلىك اقپارات قۇرالدارى الدەرى جەتكەنشە قارالاۋمەن كەلەدى. قازىرگى كۇنى رەسەي اسكەرىنىڭ قارۋلى سوققىسىنان جاسىرىنعان، ازوۆستال مەتاللۋرگيالىق زاۋىتىن پانالاعان بەيبىت تۇرعىنداردى ازوۆ پولكى قورعاپ تۇر. رەسەيلىك باق تىرناقشانىڭ ىشىندەگى «ماريۋپول تۇرعىندارىنان» ازوۆ پولكى تۋرالى ءبىرلى-جارىم پىكىر سۇراپ، ونىڭ ورىس تەلەەفيرى ارقىلى تاراتقان. ارينە، ولاردىڭ ايتقاندارى – «ازوۆ پولكىنىڭ اسكەرلەرى «قانىشەر ناتسيستەر».

«ازوۆ پولكىنىڭ ءوز قۇدايى مەن ءدىنى بار»

قايسىبىر جولى دحر (رەسەي ۋكراينادان تارتىپ العان اۋماق) دەگەن الەمدە جوق ەرگەجەيلى مەملەكەتسىماقتىڭ بيلىك وكىلى يان گاگين دەگەن: «ازوۆ جاساعى وزدەرىنە ءدىن ويلاپ تاۋىپ العان. ولاردىڭ وزدەرى سىيىناتىن قۇدايلارى دا بار. مورانا دەگەن ءولىس قۇدايىنا سىيىنادى. ال دىندەرىن سكانديناۆتىڭ سەنىم مەن ەجەلگى سلاۆيان سەنىمدەرىنەن ارالاستىرىپ، قۇراپ العان»، - دەپ سويلەگەن.

قىسقاسى، وسى…

رەسەي بيلىگى سوعىس باستالعالى بەرى رف اۋماعىندا رەسمي تىركەلگەن ونشاقتى تاۋەلسىز باق-تى جاۋىپ، ولاردى «شەتەل اگەنتتەرى» دەپ تانىعان. «روسكومنادزور» ەركىن ويلى اقپارات قۇرالدارىن بۇعاتتاۋدى باستاعاننان كەيىن، قازىر رەسەي اۋماعىندا تاۋەلسىز باق جويىلعان. قازىرگى جۇمىس ىستەپ تۇرعان اقپارات قۇرالدارىنىڭ ءبارى كرەملدىڭ پروپاگانداسىن جۇرگىزىپ وتىر دەۋگە ابدەن نەگىز بار. ال سول پروپاگاندانىڭ سيقى، اناۋ…

ايجان تەمىرحان

Abai.kz

20 پىكىر

ۇزدىك ماتەريالدار