ساياسي بەلسەندى ەرمەك نارىمباي 2016 جىلى قازاقستاننان ۋكرايناعا كەتۋگە ءماجبۇر بولعان ەدى. ول اراعا التى جىل ۋاقىت سالىپ، "قاسىرەتتى قاڭتار" وقيعاسىنان كەيىن ەلگە قايتاتىنىن مالىمدەدى.

الماتىعا 6-اقپان كۇنى ءۇشىپ كەلگەن ەرمەك نارىمباي اۋەجايدا تۇتقىندالدى. ونى اۋەجايدا ەلۋگە شاقتى ادام قارسى الۋ ماقساتىندا كۇتىپ تۇرعان بولاتىن. بەلسەندىنى تۇتقىنداعانىن ەستىگەن جينالۋشىلار ونىڭ بوساتىلۋىن تالاپ ەتتى.

ول ەلگە ورالماس بۇرىن: "جاقىندا الماتىعا قايتامىن. قوعام مەن بيلىك اراسىندا ديالوگ ورنايتىنىنا سەنىمدىمىن. ديالوگتىڭ اق تۋىن كوتەرىپ بارامىن. بالالارمەن كەزدەسۋ مۇمكىندىگى بولا ما، جوق پا ازىرگە بەلگىسىز",  دەپ كيەۆ اۋەجايىنان ۇشار الدىندا مالىمدەمە جاسادى. ول قازاقستانعا كەلە سالا تۇتقىندالۋى مۇمكىن ەكەندىگىن دە جوققا شىعارمادى.

بۇگىندە تەرگەۋ يزولياتورىندا وتىرعان ەرمەك نارىمباي ارنايى حات جازىپتى. ماحامبەت ابجاننىڭ تەلەگرام-ارناسىندا جاريالاعان حاتتا ەرمەك نارىمباي ءوزى جاتقان كامەرانىڭ سىزباسىن سىزىپ، ولشەمىن اياق كيىممەن كورسەتكەن. تومەندە كورسەتىلگەن قاعازدا ول 1 اياق كيىمنىڭ – 26 سم ەكەنىن، كامەرانىڭ ەنى مەن ۇزىندىعى 12*9 اياق كيىمگە تەڭدىگىن جازىپتى.

ەرمەك نارىمباي ءوزىن الماتى قالاسىنىڭ اۋەجايىنان قالاي ۇستاپ الىپ كەتكەنىن دە حاتتا جازىپ كورسەتكەن. "اۋەجاي. ۇشاقتان تۇسە سالىسىمەن اۋەجاي عيماراتىنىڭ ەكىنشى قاباتىنان شىقتىم. ءبىرىنشى قاباتقا ءتۇسىپ بارا جاتىپ 7-8 ازاماتتىق كيىمدەگى ۇقك، ءىىد قىزمەتكەرلەرىن كوردىم. ولار مەنىڭ ارتىمنان ءجۇرىپ وتىردى. ءبىرىنشى قاباتتا ازاماتتىق كيىمدەگى ەكى ايەل ادام ۇشىپ كەلۋشىلەردىڭ پتسر-تەستىن تەكسەرىپ جاتتى. وسىنىڭ بارلىعى كەدەندىك باقىلاۋ الدىندا كەزەك تۋدىردى. اياق استىنان مەنى زالداعى وفيتسەر وڭ جاقتاعى ەڭ شەتكى كابينەتكە ءوتۋىمدى سۇرادى، ال مەن ەل كوپ شوعىرلانعان ورتاداعى كابينەتكە كىرمەك بولىپ تۇرا بەردىم. زالدا بولعان وفيتسەر كەزەكتەگى بارلىق ادامداردى بوس كابينەتتەرگە بولە باستادى، مەن سول كەزدە جاڭاعى وڭ جاق شەتكى كابينەتكە كىردىم. كىرگەن كەزدە بەتپەردە مەن كوزىلدىرىگىمدى شەشۋىمدى سۇراپ، ۆەب-كامەراعا ءتۇسىرىپ الدى، تولقۇجاتىما شتامپ قويىپ ونى سول جەرگە كەلگەن وفيتسەرگە بەردى. ول ماعان قازاقستان اۋماعىنان قالاي شىعىپ كەتكەنىم تۋرالى بىرنەشە سۇراق بار ەكەندىگىن ايتتى. بولمەدە 7-8 قىزمەتكەر بولعان ەدى. ولار مەنىڭ قولىما كىسەن سالىپ سي-18 مەكەمەسىنە الىپ كەتتى،" - دەلىنگەن حاتتا.

ءبىر اپتادان كەيىن ەرمەك نارىمبايدىڭ قايدا جازاسىن وتەيتىنى انىقتالۋى ءتيىس. ونىڭ قورعاۋشىسى ساياسي بەلسەندىنى زارەچنىي اۋىلىنىڭ ماڭىنداعى اباقتىعا جىبەرۋى مۇمكىن ەكەنىن ايتۋدا.

Abai.kz