بەيسەنبى, 20 ماۋسىم 2024
اقمىلتىق 1720 12 پىكىر 4 مامىر, 2024 ساعات 21:22

رەسەي مەن ۋكراينا: قازاقستان كەلىسسوزشى بولا ما؟

سۋرەت: ۆۆس سايتىنان

«ۇڭگىردەگى ۇلتشىلدىق» ساياسي اتاۋىنىڭ ەگەسى، بۇگىندەرى رەسەيدەگى قازاق ەلشىسى داۋرەن اباەۆ «تاسس-قا» كولەمدى سۇحبات بەرىپ، قازاقستانداعى رۋسوفوبيا، اەس قۇرىلىسى جانە قازاقستاننىڭ وزگە ەلدەرمەن اسكەري ارىپتەستىگى تۋرالى تاقىرىپتار توڭىرەگىندە اڭگىمە ءوربىتىپتى.

اتالعان سۇحباتتاعى ەڭ ماڭىزدىسى تۇسى - ءتىلشىنىڭ: «قازاقستان ۋكراينا مەن رەسەيگە كەلىسسوز الاڭىن ۇسىنا ما؟» - دەگەن سۇراعىنا: «ءبىز بەيبىت كەلىسسوزدەرگە الاڭ ۇسىنۋعا دايىنبىز»، - دەپ جاۋاپ بەرىپتى.

سۋرەت: azattyq-ruhy.kz سايتىنان

ءتىلشى: «قازاقستان پرەزيدەنتى قاسىم-جومارت توقاەۆ بۇعان دەيىن ارمەنيا مەن ازەربايجان اراسىنداعى داۋلى ماسەلەلەردى رەتتەۋ ءۇشىن قازاقستاندا بايلانىس ورناتۋ باستاماسىن كوتەرگەن بولاتىن. ال قازاقستاننىڭ ۋكرايناداعى قاقتىعىستى رەتتەۋ بويىنشا قانداي دا ءبىر دەلدالدىق ارەكەتتەرگە قاتىسۋى مۇمكىن بە؟ استانا وسىنداي جۇمىس ءۇشىن الاڭ بولا الا ما؟» دەپ سۇرايدى.

بۇعان قازاقستان ەلشىسى داۋرەن اباەۆ: «ءسوزسىز، قازاقستان الەمگە قاتىستى بارلىق ۇدەرىستەر بويىنشا ارقاشان كومەكتەسۋگە دايىن. بۇل تەك رەسەي مەن ۋكراينا عانا ەمەس، سيريا ماسەلەسى بويىنشا، يران ماسەلەسى بويىنشا، ارمەنيا مەن ازەربايجان بويىنشا دا سولاي. الاڭ ۇسىنۋ، قانداي دا ءبىر جاعداي جاساۋ... ارينە، ءبىز دايىنبىز.

وزدەرىڭىز بىلەسىزدەر، قازىر ءتۇرلى باستامالار كوپ. جانە رەسەيدىڭ قاتىسۋىنسىز بۇل ۇدەرىستەر مۇمكىن ەمەس دەگەن تۇسىنىك بار. ارينە، بۇل ۇدەرىستەردە رەسەيدىڭ پىكىرىن ارقاشان ەسكەرۋ كەرەك. ارينە، مەن ايتقانداي، ءبىز دەلدال بولۋعا ەمەس، الاڭدى ۇسىنۋعا، قانداي دا جاعداي جاساۋعا دايىنبىز.

كەلىسسوزدى باستاۋ وتە ماڭىزدى. ءتىپتى، مەن قازىر رەسەي مەن ۋكراينانى ەمەس، جالپى كەز كەلگەن قاقتىعىستى ايتىپ وتىرمىن، جاي عانا سويلەسە باستاۋ وتە ماڭىزدى. بۇل ادامداردىڭ قانداي دا ءبىر كەلىسىمگە كەلە باستاۋىنىڭ العاشقى قادامى.

بۇل تۋرالى پرەزيدەنت قاسىم-جومارت كەمەلۇلى توقاەۆ بىرىككەن ۇلتتار ۇيىمىنىڭ جارعىسى اياسىنداعى حالىقارالىق قۇقىق جانە بارلىق پروتسەستەردى جۇزەگە اسىرۋ قاعيداتتارىن بەرىك ۇستانادى. ءبىزدىڭ ۇستانىمىمىز ايقىن»، - دەپ جاۋاپ بەرەدى.

قازىر جۇرتتىڭ ىزۋ-قىزۋ تالقىلاپ جاتقانى وسى تۇسى.

قازاقستاننىڭ ۇسىنىسىن ازەربايجان مەن ارمەنيا قابىل الدى. ەگەسكەن ەكەۋدىڭ ءسىم باسشىلارى، مامىردىڭ بەل ورتاسىندا الماتىدا جولىعادى.

ال ۋكراينا مەن رەسەي بۇنداي ۇسىنىستى قابىل الا ما؟ ول جاعى كۇماندى. ءسىز نە دەيسىز؟

Abai.kz

12 پىكىر