جەرگىلىكتى تۇرعىنداردىڭ اقپاراتىنشا الماتى قالاسىنىڭ ماڭىنداعى قىزىلتۋ ەلدى-مەكەنىنىڭ جانىندا اسكەري ۇشاق اپاتقا ۇشىراعان.

ۇشاق قىزىلتۋ ماڭىنداعى دالاعا قۇلاعان. ازىرگە اپاتتىڭ سەبەبى مەن قازا تاپقانداردىڭ بار-جوعى بەلگىسىز.

اپاتقا ۇشىراعان ۇشاق ۇلتتىق قاۋىپسىزدىك كوميتەتىنە تيەسىلى ان-26  بولۋى مۇمكىن.

اقپاراتتىڭ انىق-قانىعى قۇزىرلى ورگاندار تاراپىنان تەكسەرىلۋ ۇستىندە.

قازتاگ اگەنتتىگى:

«الماتىدا قونۋ كەزىندە ان-26 اسكەري ۇشاعى اپاتقا ۇشىرادى. ول نۇر-سۇلتان-الماتى باعىتى بويىنشا ۇشقان. بورتتا 6 ادام بولعان. 4-ەۋى قايتىس بولىپ، 2-ەۋى جارالانعان»، - دەپ حابارلادى.

تاعى ءبىر اقپاراتتا:

«س 17.21-دەن باستاپ الماتى اەرودرومى جابىق. ان-26 اسكەري ۇشاعى اپاتقا ۇشىرادى»، - دەلىنگەن.

الماتى اۋەجايىنىڭ ءباسپاسوز قىزمەتى تاراتقان اقپاراتتا:

«الدىن الا مالىمەت بويىنشا، الماتىدا قونۋ كەزىندە قر ۇقك-نە تيەسىلى ان-26 اسكەري ۇشاعى قۇلادى. ول نۇر-سۇلتان-الماتى باعىتى بويىنشا ۇشقان. بورتتا 6 ادام بولعان. قازا تاپقاندار تۋرالى اقپارات ءالى جوق. ساعات 17.20 شاماسىندا بايلانىس ۇزىلگەن. دەرەۋ اپاتتىق جاعداي جاريالاندى. ءبىزدىڭ بارلىق قۇتقارۋشىلارىمىز، قىزمەتكەرلەرىمىز وقيعا ورنىنا باردى. ۇشاق قونۋ جولاعىنا جەتپەي قۇلاعان»، - دەپ جازىلعان.

قر يندۋستريا جانە ينفراقۇرىلىمدىق دامۋ مينيسترلىگى ۇشاق اپاتىنا قاتىستى پىكىر ءبىلدىرىپ:

«ازاماتتىق ازۆياتسيا ۇشاعى ەمەس. ۇقك اقپارات بەرەدى»، - دەگەن.

جەلىدەگى ۆيدەو:

قر توتەنشە جاعدايلار مينيسترلىگى الماتى اۋەجايىندا اسكەري ۇشاقتىڭ قۇلاعانىن رەسمي تۇردە راستادى.

«13 ناۋرىز كۇنى ساعات 17.25-تە الماتى اۋەجايىنىڭ ديسپەتچەرلىك قىزمەتىنە ساعات 17.22-دە نۇر-سۇلتان-الماتى باعىتى بويىنشا ۇشىپ كەلە جاتقان ان-26 اسكەري ۇشاعىنىڭ راداردان جوعالىپ كەتكەنى جانە اپاتتىق جاعدايدا قونعانى تۋرالى حابارلاما كەلىپ تۇسكەن»، - دەيدى مينيسترلىكتىڭ رەسمي وكىلى تالعات ءۋالي.

ونىڭ ايتۋىنشا، وقيعا ورنىنا ءورت ءسوندىرۋ قىزمەتىنىڭ 11-ءشى ەسەپتىك توبى بارعان. 9 ادام جانە 1 تەحنيكا، رەسپۋبليكالىق جەدەل-قۇتقارۋ وتريادىنىڭ 1 كينولوگيالىق توبى، 5 ادام مەن الماتى قۇتقارۋ قىزمەتىنىڭ 1 تەحنيكاسى جۇمىس ىستەپ جاتىر. سونداي-اق، وقيعا ورنىنا ىزدەۋ جانە اپاتتىق-قۇتقارۋ قىزمەتىنىڭ 4 تەحنيكاسى مەن الماتى وبلىسىنىڭ ءورت ءسوندىرۋ، اپاتتىق قۇتقارۋ قىزمەتىنىڭ 2 تەحنيكاسى بارعان.

«ءورت تولىقتاي سوندىرىلگەن. وقيعا ورنىندا جەدەل جاردەمنىڭ 10 رەانيماتسيالىق بريگاداسى جۇمىس ىستەپ جاتىر. الدىن الا مالىمەت بويىنشا 4 ادام قازا تاۋىپ، 2 ادام جارالانعان. جارالانعاندار ىلە اۋداندىق اۋرۋحاناسىنا جەتكىزىلگەن»، - دەيدى ءۋالي مىرزا.

فوتو:

قازا تاپقانداردىڭ اتى-ءجونى:

قازتاگ اگەنتتىگى ۇشاق اپاتىنان قازا تاپقانداردىڭ اتى-جوندەرىن جاريالادى.

ولار:

عابيت بارلىقباەۆ، 1987 جىلى تۋعان. شەنى – مايور;

دوسجان بايمۇراتوۆ، 1987 جىلى تۋعان. شەنى – اعا لەيتەنانت;

مۇحتار ساعىنباەۆ، 1995 جىلى تۋعان. شەنى – اعا لەيتەنانت;

ەۆگەني ۆاسيلكوۆ، 1987 (1986) جىلى تۋعان. شەنى – سەرجانت.

قازاقستان پرەزيدەنتى قاسىم-جومارت توقاەۆ بۇگىن بولعان ۇشاق اپاتىنا قاتىستى (ان-26 اسكەري ۇشاعى) ءمان-جايدى انىقتاۋدى تاپسىردى.

«الماتى اۋەجايىندا اپاتقا ۇشىراعان ۇشاقتا قازا بولعان اسكەري قىزمەتكەرلەردىڭ تۋىستارى مەن جاقىندارىنا كوڭىل ايتامىن. جاراقات العانداردىڭ تەزىرەك ساۋىعىپ كەتۋىن تىلەيمىن. مەنىڭ تاپسىرمام بويىنشا اۋە اپاتىنىڭ سەبەپتەرىن انىقتاۋ جۇمىستارى باستالدى. بۇنداي وقىس وقيعالار قايتالانباۋى كەرەك»، - دەپ جازدى Twitter-دەگى پاراقشاسىندا.

الماتى قالاسىنىڭ اكىمى باقىتجان ساعىنتاەۆ اسكەري ۇشاق اپاتى بولعان ورىنعا باردى. بۇل تۋرالى ساعىنتاەۆ ءوزىنىڭ Twitter-دەگى پاراقشاسىندا جازدى.

«ان-26 اسكەري ۇشاعى قۇلاعان جەرگە باردىم. ءتيىستى قىزمەت وكىلدەرىنە بولعان وقيعانىڭ سالدارىن جويۋدى تاپسىردىم. قازا بولعانداردىڭ تۋىستارى مەن جاقىندارىنا كوڭىل ايتامىن. زارداپ شەككەندەرگە بارلىق قاجەتتى مەديتسينالىق كومەك كورسەتىلۋدە»، - دەپ جازدى اكىم.

قر ۇقك ۇشاق اپاتى تۋرالى:

«13 ناۋرىز، ساعات 17.22-دە الماتى اۋەجايىنا قونۋ بارىسىندا ان-26 ۇشاعى اپاتقا ۇشىرادى. بورت نومەرى – 02. ۇشاق قر ۇقك اۋە قىزمەتىنە تيەسىلى.

بورتتا 6 ەكيپاج مۇشەسى بولعان. 4 ادام قازا تاۋىپ، 2-ەۋى اۋىر جاراقات العان. ولار اۋرۋحاناعا جەتكىزىلدى.

اپاتتىڭ سەبەپتەرى انىقتالۋدا»، - دەپ جازدى.

Abai.kz