بۇعان دەيىن ازاتتىقتىڭ وزبەك قىزمەتى بەرديەۆتىڭ جاقىندارىنا سىلتەمە جاساپ بەلسەندىنىڭ قازاقستاننان دەپورتاتسيالانعانىن حابارلاعان. ول كەزدە قازاقستان مەن وزبەكستاننىڭ رەسمي بيلىگى بۇل اقپارات جايلى ەشقانداي مالىمدەمە جاساماعان ەدى. بەلسەندىنىڭ ادۆوكاتى دا ەكستراديتسيا تۋرالى ەشتەڭە ايتپاعان.

تاشكەنت ىشكى ىستەر باسقارماسى "بەرديەۆتىڭ ەكستراديتسياسى ونىڭ وپپوزيتسيالىق ۇستانىمىمەن بايلانىستى ەمەس" دەپ مالىمدەدى.

"حۋررام بەرديەۆ وزبەكستان قىلمىستىق كودەكسىنىڭ "ادام ساۋداسى" بابىمەن ايىپتالىپ وتىر. وعان باسقا ايىپ تاعىلماعان" دەدى باسقارماسىنىڭ ءباسپاسوز قىزمەتى.

شىمكەنت سوتىنىڭ قاۋلىسىنا ساي، 2020 جىلى اقپاندا بەرديەۆكە حالىقارالىق ىزدەۋ جاريالانعان. كەيىن ول ۇستالىپ، قازاقستان ءىىم 167/11 تەرگەۋ يزولياتورىنا قامالعان.

وزبەكستان بيلىگى "بەرديەۆكە 2013 جىلى ادام ساۋداسىمەن اينالىستى دەگەن ايىپ تاعىلىپ، 2014 جىلى ىزدەۋ جاريالانعانىن" ايتادى. تەرگەۋشىلەردىڭ دەرەگىنشە، "بەرديەۆ بىرنەشە ادامدى الداپ، شىمكەنتكە جۇمىسقا اپارىپ، قۇجاتتارىن الىپ قويعان. كەيىن ولاردى تەگىن جۇمىس ىستەۋگە ماجبۇرلەگەن".

"ەرك" پارتياسىنىڭ مۇشەسى، وزبەكستاندىق بەلسەندى ديلوروم يسوكوۆا ايىپتى قولدان ۇيىمداستىرىلعان دەپ مالىمدەدى.

"قازاقستانعا جۇمىسقا بارعان ادامدار وزبەكستانداعى تۋىستارىنا اقشا سالىپ، تەلەفونمەن سويلەسكەن. مۇنى قازاقستانداعى تەلەفون كومپانيالارى مەن اقشا اۋدارۋ قىزمەتتەرى ۇسىنعان قۇجات دالەلدەيدى" دەدى ول.

وزبەكستاندا "ەرك" پارتياسىن 1980 جىلداردىڭ سوڭىندا اقىن مۇحامماد ساليح قۇرىلعان. ول 1991 جىلى پرەزيدەنت سايلاۋىندا يسلام كاريموۆتىڭ باستى قارسىلاسى بولعان. كەيىن ول ەلدەن كەتۋگە ءماجبۇر بولدى.

58 جاستاعى بەرديەۆ – "مازلۋم" قۇقىق قورعاۋ ورتالىعىن قۇرۋشىلاردىڭ ءبىرى. ول دا ەلدەن كەتۋگە ءماجبۇر بولىپ، بىرنەشە جىلدان بەرى قازاقستاندا تۇرىپ جاتقان. ونى دەپورتاتسيالاۋ تۋرالى سوت شەشىمىندە، بەرديەۆتىڭ قازاقستان ازاماتتىعىن يا بوسقىن مارتەبەسىن سۇراماعانى جازىلعان.

بەرديەۆ بۇعان دەيىن ەۋروپا وداعىنىڭ 2005 جىلى 13 مامىرداعى اندىجان قىرعىنىنا حالىقارالىق تەرگەۋ ۇيىمداستىرۋدى قولداعان. قۇقىق قورعاۋشىلار وسى قولداۋدان كەيىن بيلىك بەرديەۆكە قىسىمدى كۇشەيتتى دەپ سانايدى.

Abai.kz