قازىر جارتى الەمگە جايىلعان كوروناۆيرۋس پاندەمياسى مەن وسىعان بايلانگىستى ەنگىزىلگەن كارانتينجىك شارالار كوپ جۇرتتىڭ تۇرمىسىنا كەرى اسەرىن تيگەزگەنى وتىرىك ەمەس. مەملەكەت باسشىسى قاسىم-جومارت توقاەۆ ءوز كەزەگىندە كارانتيندىك رەجيم كەزىندە تۇراقتى تابىسىنان ايىرىلعان وتباسىلارعا قارجىلاي كومەك كورسەتۋ ءۇشىن ۇكىمەتكە ارنايى تاپسىرما بەرگەن بولاتىن. وسىعان ساي، مەملەكەتتەن بەرىلەتىن جاردەمپۇل - 42 500 تەڭگەلىك كومەك تۇرتىسى تارىلعان ميلليوننان اسا ازاماتقا ءتورتىنشى مارتە بەرىلەتىنى بەلگىلى بولدى.

بۇدان بولەك، «نۇر وتان» پارتياسى مەن «جاس وتان» ەرىكتىلەرى دە ىندەت تارالىپ، توتەنشە جاعداي جاريالانعان ناۋرىز ايىنان بەرى ەل قىزمەتىندە جۇرگەنى شىندىق. ەلباسى نۇرسۇلتان نازارباەۆتىڭ باستاماسىمەن مىڭداعان الەۋمەتتىك از قامتىلعان وتباسىلارعا 50 مىڭ تەڭگەلىك قارجىلاي كومەك، تەگىن ازىق-تۇلىك قوراپتارى تابىستالدى.

ماۋسىم ايىندا وتكەن «ءبىز بىرگەمىز» تەلەمارافونىندا: «كوۆيدپەن كۇرەسكە ەل بيۋدجەتىنەن قاراجات ءبولىندى. تۇرمىسى تومەن وتباسىلارعا تەگىن ازىق-تۇلىك تاراتىلدى. شوب وكىلدەرىنە دە بىرقاتار جەڭىلدىكتەر جاسالدى. ەلباسىنىڭ باستاماسىمەن قۇرىلعان «ءبىز بىرگەمىز» قورى دا قوعامتىق قاراجات ءبولدى. مۇقتاج ازاماتتارعا ناقتى كومەكتەر كورسەتىلىپ جاتىر. بۇل جۇمىستاردىڭ باسى-قاسىندا «نۇر وتان» پارتياسى ءجۇر. وسىنىڭ بارلىعى ءبىزدىڭ بىرلىگىمىزدى كورسەتەدى»، - دەگەن ەدى مەملەكەت باسشىسى.

پرەزيدەنت باستاعان وسى ۇندەۋگە ەلدەگى جەكەلەگەن اتىمتاي جومارت ازاماتتار مەن ءىرىلى-ۇساقتى  قايىرىمدىلىق قورلارى دا قولداۋ بىلدىرۋدە. سولاردىڭ ءبىرى – «حالىق» قايىرىمدىلىق قورى.

اتالعان قور جۋىردا اتىراۋ وڭىرىنە ءدارى-دارمەك جانە ازىق-تۇلىك ونىمدەرىنىڭ 1000 جيىنتىعىن ۇيىمداستىرىپ، جەتكىزدى.

دينارا قۇلىباەۆا باسشىلىق ەتەتىن «حالىق» قايىرىمدىلىق قورى اتىراۋ وبلىسىنداعى الەۋمەتىك از قامتىلعان وتباسىلارعا، كوپ بالالى وتباسىلار مەن مەديتسينالىق مەكەمەلەرگە قولداۋ كورسەتۋ ماقساتىندا قايىرىمدىلىق اكتسياسىن قولعا العان ەكەن.

اكتسيا اياسىندا ءدارى-دارمەكتەر، مەديتسينالىق زاتتار (انتيسەپتيكتەر مەن جۋعىش زاتتار), ءبىرىنشى قاجەتتىلىكتەگى ازىق-تۇلىك تاۋارلارى جيناقتالعان 1000 قوراپ تاراتىلعان.  سونداي-اق، اتىراۋ وبلىسىنداعى مەديتسينالىق مەكەمەلەرگە 1000 دانا پۋلسوكسيمەتر مەن 100 دانا وتتەگى كونسەنتراتورى جانە كوروناۆيرۋس ىندەتىنە قارسى قولدانىلاتىن مەديتسينالىق پرەپاراتتار جەتكىزىلگەن.

مۇقتاج وتباسىلارعا تابىستالعان ءار جيىنتىقتىڭ سالماعى 60 كەلىنى قۇرايدى. وندا ۇن، كۇرىش، ماكارون ونىمدەرى، وسىمدىك مايى، قانت، شاي، ءسۇت، تاتتىلەر، انتيسەپتيكالىق قۇرالدار مەن بەتپەردەلەر بار. سونداي-اق، قر دەنساۋلىق ساقتاۋ مينيسترلىگى بەكىتكەن Covid-19 ىندەتىن ەمدەۋ حاتتاماسىنا ەنگىزىلگەن دارىلىك پرەپاراتتار: ازيتروميتسين، تسيپروفلوكساتسين، اموكسيتسيللين، ريۆاروكسابان، برومگەكسين، سپيرولاكتون، اسپيرين ت.ب. ءدارى-دارمەكتەر بار.

بۇدان بولەك، اتالعان قايىرىمدىلىق قوردىڭ اتىنان وڭىردەگى مەديتسينالىق مەكەمەلەرگە 30 دانا وكپەنى جاساندى جەلدەتۋ اپپاراتتارى جەتكىزىلەدى دەپ جوسپارلانىپ وتىر ەكەن.

ەلدەگى ەپيدەميولوگيالىق احۋالعا بايلانىستى قولعا الىنعان قايىرىمدىلىق شاراسىنا جەرگىلىكتى اتىراۋ وبلىستىق اكىمدىگى قولداۋ ءبىلدىرىپ، ماتەريالدىق جاعدايى تومەن، ءدارى-دارمەك پەن ازىق-تۇلىككە مۇقتاج وتباسىلاردىڭ ءتىزىمىن ازىرلەپ بەرگەن.

ايتا كەتەيىك، پرەزيدەنت پارمەن بەرىپ، ەلدە توتەنشە جاعداي ەنگىزىلگەننەن بەرى «حالىق» قايىرىمدىلىق قورى كوروناۆيرۋس ينفەكتسياسىمەن كۇرەسۋگە جانە ەپيدەميولوگيالىق جاعدايدى رەتتەۋگە  باعىتتالعان بىرقاتار جۇمىستار اتقارعان.

تج كەزىندە تۇراقتى تابىسىنان ايىرىلعان كوپ بالالى 20 مىڭنان استام وتباسىعا تەگىن ازىق-تۇلىك جيىنتىقتارىن، ىندەتپەن كۇرەستىك الدىڭعى شەبىندە جۇرگەن مەديتسينالىق قىزمەتكەرلەرگە قارجىلاق كومەك، قاجەتتى مەديتسينالىق قۇرال-جابدىقتار، وكپەنى جاساندى جولمەن تىنىستاتۋ اپپاراتتارى، پتر زەرتحاناسى جانە جەدەل جاردەم ماشيناسى تۇرىندە جالپى سوماسى 5,5 ميلليارد تەڭگەنىڭ كومەگىن كورسەتكەن.

ەستەرىڭىزگە سالا كەتەيىك، بيىل مامىر ايىندا «حالىق» قايىرىمدىلىق قورى كارانتيندىك رەجيم كەزىندە تۇرمىسى تارىلعان قىزىلوردالىق 1000 وتباسىنا كومەك كورسەتكەن بولاتىن.

Abai.kz