ەۋروپالىق وداق شىلدە ايىندا «ورتالىق ازياداعى COVID-19: داعدارىسقا قارسى ارەكەت» جوباسىنىڭ اياسىندا وا ەلدەرىنە 3 ميلليون ەۋرو (1,4 ميلليارد تەڭگە) بولەدى. بۇل تۋرالى forbes.kz جازدى.

ونىڭ ىشىندە قازاقستانعا 1,6 ميلليون ەۋرو (756,2 ميلليون تەڭگە) بولىنبەك.

دۇنيەجۇزىلىك دەنساۋلىق ساقتاۋ ۇيىمىنىڭ CACCR باعدارلاماسى COVID-19 پاندەمياسىنىڭ قازىرگى كەزدەگى ىندەتىن ازايتۋعا قولداۋ كورسەتەدى. سونىمەن قاتار، اتالعان باعدارلاما ورتالىق ازيا ەلدەرىنىڭ ۇلتتىق دەنساۋلىق ساقتاۋ جۇيەسىنىڭ ۇزاق مەرزىمدى تۇراقتىلىعىن قامتاماسىز ەتەدى.

«COVID-19 پاندەمياسىنىڭ ءورشۋى ءبىزدىڭ دەنساۋلىق ساقتاۋ جۇيەسىنىڭ قانشالىقتى وسال ەكەنىن جانە قوعامدىق دەنساۋلىق ساقتاۋدىڭ توتەنشە جاعدايلارىنا دەگەن كوزقاراسىمىزدى قايتا قاراۋدىڭ قانشالىقتى ماڭىزدى ەكەنىن كورسەتتى. سوندىقتان CACCR باعدارلاماسى قازىرگى ۋاقىتتا قاجەت ءدارى-دارمەكتەرمەن جانە جابدىقتارمەن قامتاماسىز ەتۋمەن قاتار، زەرتحانالار مەن اۋرۋحانالارعا بولاشاقتا وسىنداي پاندەميامەن كۇرەسۋگە الدىن الا دايىن بولۋعا كومەكتەسەدى»، - دەدى ەۋروپالىق وداقتىڭ قازاقستانداعى ەلشىسى سۆەن-ولوۆ كارلسسون.

CACCR باعدارلاماسى ءۇش ساتىدان تۇرادى. ءبىرىنشى كەزەڭدە - COVID-19-عا  ۇلتتىق جوسپار مەن شۇعىل قاجەتتىلىكتەردى شەشۋ. ەكىنشى كەزەڭدە -پاندەميانىڭ شارىقتاۋ شەگى وتكەن كەزدە، نەگىزگى قالپىنا كەلتىرۋ جانە ىقتيمال ەكىنشى تولقىنعا دايىندىق بولادى. سوڭعى كەزەڭدە ۇزاق مەرزىمدى پەرسپەكتيۆادا دەنساۋلىق ساقتاۋدىڭ ورنىقتى، ءتيىمدى جانە تۇراقتى جۇيەسىن قۇرۋ جانە قولداۋ بويىنشا بىرقاتار ءىس-شارالار اتقارىلاتىن بولادى.

CACCR -  2020 جىلدىڭ شىلدەسىندە باستالعان، ورتالىق ازياعا ارنالعان ەكى جىلدىق ايماقتىق باعدارلاما. اتالعان باعدارلاما «Team Europe» جوباسىنىڭ اياسىندا ەو-نىڭ ورتالىق ازيا ايماعىندا COVID-19-عا تويتارىس بەرۋ ماقساتىندا ازىرلەنگەن. بيۋدجەتى 124 ميلليون ەۋرونى قۇرايتىن ىنتىماقتاستىق پاكەتى اياسىندا جۇزەگە اسىرىلادى.

Abai.kz