ەلورداداعى بەس مەكتەپكە پيلوتتىق جوبا رەتىندە قازاق كۇرەسى سپورتى دەنە شىنىقتىرۋ پانىنە ەنگىزىلەدى.

«وتكەن جىلدىڭ قازان ايىندا قازاق كۇرەسى فەدەراتسياسىنىڭ وكىلدەرى فەدەراتسيانىڭ پرەزيدەنتى قىزمەتىن ماعان سەنىپ تاپسىرعان بولاتىن. وسى ۋاقىتقا دەيىن ءبىز اتقارىلۋى ءتيىس شارۋالار مەن شارالاردى رەتتەپ، جۇمىستى جۇيەلەدىك، جوسپار قۇردىق. سوعان سايكەس، بىرقاتار كەشەندى جوبانى ىسكە اسىرعالى وتىرمىز. ءبىزدىڭ نەگىزگى ماقسات – قازاق كۇرەسىن الەمدىك دەڭگەيگە كوتەرۋ»، - دەدى قازاقستان رەسپۋبليكاسىنىڭ قازاق كۇرەسى فەدەراتسياسىنىڭ پرەزيدەنتى - اقپارات جانە قوعامدىق دامۋ ءمينيسترى داۋرەن اباەۆ وكق-دا وتكەن ءباسپاسوز ءماسليحاتىندا.

فەدەراتسيا پرەزيدەنتىنىڭ ايتۋىنشا، وسى ماقساتتا ەڭ الدىمەن قازاق كۇرەسىن مەكتەپ باعدارلاماسىنا ەنگىزۋ جۇمىسى قولعا الىنعان.

«قازىرگى تاڭدا قازاق كۇرەسىنىڭ 100 ساعاتتىق وقۋ باعدارلاماسى دايىندالدى. ول وقۋ باعدارلاماسىندا كۇرەستىڭ الىپپەسىنەن باستاپ وزىندىك سپورت ءتۇرى رەتىندە بارلىق قىرى، وقىتۋ جولدارى قامتىلعان. الداعى وقۋ جىلى پيلوتتىق جوبا رەتىندە نۇر-سۇلتان قالاسىندا بەس مەكتەپتە دەنە شىنىقتىرۋ پاندەرىنە قازاق كۇرەسى ەنگىزىلەدى. الەمنىڭ كوپتەگەن ەلىندە ۇلتتىق سپورت مىندەتتى تۇردە مەكتەپتە وقىتىلادى. سول سەبەپتى جۇمىستى رەتتەپ الۋ ءۇشىن باستاپقىدا بەس مەكتەپكە فاكۋلتاتيۆتى پيلوتتىق جوبا رەتىندە ەنگىزدىك»، - دەدى داۋرەن اباەۆ.

ءوز كەزەگىندە فەدەراتسيانىڭ باس حاتشىسى باقداۋلەت ءسابيتوۆتىڭ قازاق كۇرەسىن مەكتەپ باعدارلاماسىنا ەنگىزۋ باستاماسى وسىدان ءۇش جىل بۇرىن كوتەرىلگەنىن ەسكە سالدى. ال قازاق كۇرەسىن دامىتۋدىڭ 2016-2021 جىلدارى دامىتۋ ستراتەگياسىندا 2020 جىلى قازاق كۇرەسىن مەكتەپ باعدارلاماسىنا ەنگىزۋ جوسپارى بولعان.

«بىرىنشىدەن 5-11 سىنىپ اراسىندا كاسىبي تۇرعىدا دايىنداۋ جوسپارلانۋدا. ال 1-4 سىنىپ ارالىعىندا قازاق كۇرەسىنىڭ اكروباتيكالىق جاتتىعۋلارىن ۇيرەتۋ قاراستىرىلعان. قىزدار اراسىندا دا، ۇلدار اراسىندا دا ءبىز بالۋانداردى دايىنداۋعا ءازىرمىز. دەگەنمەن، ءار وقۋشىنىڭ ءوز تاڭداۋى بار. سول سەبەپتى ءبىز گيمناستيكا فەدەراتسياسىمەن كەلىستىك. ياعني، بالالاردى قالاعاندارى قازاق كۇرەسىنەن بولەك گيمناستيكانى ۇيرەنە الادى»، - دەدى ول.

Abai.kz