سەنبى, 16 قاڭتار 2021
الاڭ 2916 17 پىكىر 25 ءساۋىر, 2019 ساعات 10:49

ايتىسكەر اقىندار مەن جىرشى-تەرمەشىلەر سايلاۋدا توقاەۆتى قولدايدى

كەشە، 24 ساۋىردە الماتى قالاسىنداعى قازاقستان جازۋشىلار وداعىنىڭ كونتسەرت زالىندا “ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ” II قۇرىلتايى ءوتتى. 

سەرىك قۇسانباەۆ، امانجول التاەۆ، سەرىك قاليەۆ، رينات زايىتوۆ، ەركەبۇلان قاينازاروۆ قاتارلى تانىمال اقىنداردان پرەزيديۋم وكىلدەرى سايلانعان بۇل قۇرىلتايعا قازاقستاننىڭ بارلىق وبلىسىنان ءتول ونەردىڭ وكىلدەرى قاتىسۋدا.

قۇرىلتايدى اشىپ، سويلەگەن وداقتىڭ باسقارما توراعاسى ءجۇرسىن ەرمان قازىرگى بيلىككە دەگەن نارازىلىعىن دا جاسىرىپ قالا المادى. ايتىسقا ۇنەمى بيلىك تاراپىنان قىسىم جاسالىپ، تەلەارنالاردىڭ ايتىستى قيىپ، ءۇزىپ-جۇلىپ بەرەتىنىن  دە ايتتى. ايتىستىڭ وتكەن كەتكەنىنە توقتالعان ءجۇرسىن مولداشۇلى ەلدەگى ساياسي جاعدايلاردان اقىنداردىڭ دا تىس قالماۋىن سۇرادى.

“الدىمىزدا پرەزيدەنت سايلاۋى، پارلامەنت سايلاۋى كەلە جاتىر. پارلامەنت سايلاۋىنا نەگە ءبىزدىڭ  اقىندار دا قاتىسپاسقا؟ جالعىز ايبەك قاليەۆ قانا ارقالىقتا قالالىق ءماسليحاتتىڭ دەپۋتاتى بولىپ ءجۇر. پارلامەنتتىڭ تورىندە امانجول التاەۆ، رينات زايىتوۆ، باۋىرجان حاليوللا وتىرسا پارلامەنتتىڭ قابىرعاسى قيسايىپ قالا ما ەكەن؟” دەگەن ءجۇرسىن ەرمان اقىندار ەلدىڭ ءسوزىن قاي ورتادا دا ايتاتىنىن تىلگە تيەك ەتتى.

ودان كەيىن ءسوز العان قۇدايبەرلى مىرزابەكوۆ، باقىت جاعىپارۇلى، ەربول قامباتىروۆ، سەرىك قاليەۆ، باۋىرجان حاليوللا، مۇحتار نيازوۆتار ايتىستىڭ كەم-كەتىگى مەن بولاشاقتاعى اتقارىلماق ىستەرگە ءوز كوزقاراستارىن ءبىلدىردى. جاھاندانۋ داۋىرىندە وسى ءبىر بەكزات ونەردى قايتسەك ارى قاراي دامىتساق، قازىرگى دەڭگەيىنەن دە بيىككە كوتەرسەك دەگەن اقىندار وبلىستارمەن تىعىز جۇمىس جاساۋ كەرەكتىگىن ايتتى.

پرەزيديۋم تىزگىنىن ۇستاپ وتىرعان امانجول التاەۆ ءجۇرسىن ەرماننىڭ ايتىسقا سىڭىرگەن ەڭبەگىنە توقتالا كەلىپ، جاس اقىندارعا ىزدەنۋ كەرەكتىگىن ايتتى.

ءسوز اياعىندا “ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ” باسقارما توراعاسى ءجۇرسىن ەرمان “ەلدە ساياسي ناۋقان باستالعانىن، سول سايلاۋعا ءبىزدىڭ وداقتىڭ دا ات سالىسىپ، قاتىسساق دەگەن ويى بولعانىن” جاسىرمادى. بۇل ويى بيلىكتىڭ وداققا دەگەن نازارىن اۋدارسا دەدى.

قۇرىلتاي سوڭىندا وداقتىڭ باسقارما توراعاسى ايتىسكەر اقىندار مەن جىرشى-تەرمەشىلەردىڭ الداعى سايلاۋدا ەلباسى نازارباەۆ ۇسىنعان كانديدات ق. توقاەۆتى قولدايتىنىن ايتتى.

قۇرىلتاي ءساتتى ءوتىپ، ايتىستىڭ الداعى دامۋ جولى بولجانىپ، ۇلتتىق ونەردى  بۇدان دا بيىك ورەگە كوتەرۋگە جوسپارلار جاسالدى.

دەرەككوز: Adyrna.kz 

Abai.kz

17 پىكىر