جۇما, 5 ناۋرىز 2021
انە، كوردىڭ بە؟ 5026 15 پىكىر 25 جەلتوقسان, 2018 ساعات 12:38

ەندى كەمپىر روتارۋعا شاشىلامىز با؟

وسى كەيىنگى كەزدەرى ءوز ەلىندە كەرەكسىز بولىپ قالعان، جۇرتتىڭ ءبارى كونتسەرتىنە بارمايتىن قارتايعان انشىلەردىڭ قازاقستانعا اۋەس بولىپ جۇرگەنى ءتىپتى دە جاسىرىن جايت ەمەس.  وسىلاردىڭ قاتارىنا جاقىندا عانا ۋكرايناناىڭ اتاقتى ءانشىسى، جاسى 70-ءتى القىمداپ قالعان سوفيا روتارۋ اجەمىز دە قوسىلىپتى.

رەسەيدىڭ «دني.رۋ» اگەنتتىگىنىڭ جازۋىنا قاراعاندا  بۇل كىسىنىڭ ءوز ەلىندە قادىرى قالماپتى.  ويتكەنى روتارۋ حانىمنىڭ كەيىنگى كەزدەرى ءوزىنىڭ كونتسەرتىنىڭ باعاسىن تىم شارىقتاتىپ جىبەرگەن كورىنەدى.  جاقىندا عانا جاڭا جىل قارساڭىنداعى ونەر كورسەتۋىنىڭ اناۋ-مىناۋ ەمەس، باقانداي 200 مىڭ ەۋروعا باعالاپ، ايدى اسپانعا ءبىر-اق شىعارىپتى. ۋكرايناناىڭ ونەر سۇيەر قاۋىمى «اۋ، بۇرىن روتارۋدىڭ كونتسەرتى 100 مىڭ ەۋرودان اسپايتىن ەدى عوي. قازىرگىسى نەسى؟» دەپ تاڭقالاسىن جاسىرمايدى. سوسىن «ءبىز مۇنداي كونتسەرتكە بارا المايمىز. وعان تولەيتىن مۇنشاما اقشامىز جوق» دەپ ءبىرجولاتا باس تارتقان كورىنەدى.

سوسىن الگى اجەمىز تمد ەلدەرىنە كوز سالماي ما؟ وبالى نە، بۇرىنعى تۋىستاس ەلدەردىڭ بارلىعى دا ات-تونىن الا قاشادى. جان-جاققا شاپقىلاپ، سارسىلىپ كوپ ىزدەگەن ءانشىنىڭ اقىرى جولى بولادى. وزگە ەلدىڭ انشىسىنەن 200 مىڭ ەۋرونى كوپ اقشا دەمەستەن، قاباق شىتپاستان بەرە سالاتىن دارقان ەل بار ەكەن. ول كىم دەيسىزدەر عوي؟ قازاقستان بولىپ شىقتى. ءيا، ءوز انشىلەرمىزگە تارشىلىق جاساسا دا، وزگەلەرگە كەلگەندە قولى اشىق، جومارت ەلىمىز «ويباي، بىزگە كەل. سىزگە قۇشاعىمىز قاشاندا اشىق» دەپ ادام ەستىمەگەن جومارتتىق تانىتىپتى.

ەگەر رەسەي ءباسپاسوزىنىڭ كوپ وتىرىگىنىڭ ءبىرى بولىپ شىقپاسا، مۇنىڭ ءوزى كوز كورىپ، قۇلاق ەستىمەگەن جومارتتىق ەكەن. مۇندايدا قازاق «اتىڭ شىقپاسا جەر ورتە» دەيتىن بە ەدى، قالاي؟

جايبەرگەن بولاتوۆ

Abai.kz

15 پىكىر