مەنىڭ وسى Abai.kz اقپاراتتىق پورتالىنداعى «قوستانايدىڭ «قوجاسى» ارحيمەد نە دەيدى، ەل نە دەيدى؟» دەگەن ماقالاما وسى وبلىستاعى «قوستاناي تاڭى» گازەتىنىڭ باس رەداكتورى جانۇزاق ايازبەكوۆتىڭ  «جايبەرگەنگە جاۋاپ. وزىنە-ءوزى قارسى...» دەگەن جاۋاپ جازعان ماقالاسى جارىق كوردى.

كىم-كىمنىڭ دە قانداي دا ءبىر ماقالاعا وزىندىك كوزقاراسىن ءبىلدىرۋ ورىندى دۇنيە، ونسىز پىكىرلەر الۋاندىعى ورىستەمەيدى. بۇل ورايدا باس رەداكتور مىرزانىڭ ماقالادا كوتەرىلگەن ماسەلەگە جاۋاپ قايتارۋىنا العىستان باسقا ايتارىمىز جوق. الايدا ءبىزدى بۇل ماقالاداعى: «ءبىزدىڭ تاڭقالعانىمىز – جايبەرگەن بولاتوۆ مىرزانىڭ بۇدان ءارى ءوز ماقالاسىندا  بىزدىڭ گازەتىمىزدى  تىلگە تيەك ەتە وتىرىپ، جاڭساق ايتىپ، ادىلەتتەن اتتاپ وتەتىنى جانە  ءوز ويىنا ءوزى قارسى شىعاتىنى» دەگەن سوزگە اشعىن ايتساق «ءبىز دە تاڭ قالدىق». ءبىز ءوز ماقالامىزدا قوستاناي وبلىسىن تورعاي وبلىسىنا اينالدىرۋعا ۇسىنىس بىلدىرگەن حاتتى وبلىس تۇرعىندارى نەگە استانانىڭ تورىندە اكىمىز ارحيمەدتىڭ اۋزىان ەستيدى، ونى نەگە وسى وبلىستاعى «قوستاناي تاڭىنا» باسىلىپ، قالىڭ جۇرتشىلىق ونىڭ مازمۇنىمەن نەگە تانىسپايدى دەگەن ماسەلە كوتەرگەنبىز.

وعان باس رەداكتور مىرزا «ول حات بىزگە دە كەلگەن. الايدا وندا اۆتورلارىنىڭ قولى جوق بولعاندىقتان باسا المادىق» دەيدى.

وسىلاي دەيدى دە ىلە-شالا ول حاتتىڭ ارحيمەدتىڭ استاناداعى ءباپاسوز ءماسليحاتىنان  بۇرىن رەسپۋبليكالىق «قازاق»، «ايقىن» جانە «تۇركىستان» گازەتتەرىندە جارىق كورگەندىگىن ايتادى. اۋ، ەگەر بۇل حات سول گازەتتەردە جارىق كورسە، ول نەگە سولارعا سىلتەمە جاساي وتىرىپ، ءوزىمىزدىڭ «قوستاناي تاڭى» نەگە باسپاسقا؟ ونىڭ ۇستىنە ارحيمەدتىڭ ءوزى سول ءماسليحاتتا الگى حاتتىڭ وزىنە كەلگەندىگىن راستادى ەمەس پە؟ ەندەشە بۇل حاتتان جەرگىلىكتى گازەت وقىرمانداردى حاباردار ەتۋىنە تولىق قۇقىعى بار ەمەس پە؟ حاتتى باسپاۋ ارقىلى «قوستاناي تاڭىنىڭ» وقىرماندارىن وسىناۋ وزەكتى ماسەلەدەن حابار ەتۋدىڭ جولى كەسىلىپ وتىرعاندىعى ايدان-انىق دۇنيە.

تاعى ءبىر قيسىنسىزدىق جايلى. مەن ءوز ماقالامدا «ارحيمەدتىڭ ءوزى قۇرىلتايشى بولىپ تابىلاتىن «قوستاناي تاڭىنىڭ» ەسىگىن دە اشقان ەمەس» دەگەن سوزىمىزگە  باس رەداكتور مىرزا «اكىم مەنىمەن ۇنەمى كەزدەسىپ، جاعدايلارىمىزدى ءبىلىپ وتىرادى» دەگەن ءۋاج ايتادى. ءبىز اكىمنىڭ وزىنە باعىنىشتى ادامدارمەن كەزدەسىپ تۇراتىندىعىنا ەش كۇمانىمىز جوق. الايدا اكىمنىڭ رەداكتورمەن كەزدەسۋى مەن رەداكتسياعا ارنايى كەلىپ قاتارداعى جۋرناليستەرمەن سۇحباتتاسىپ، ولاردىڭ جاي-كۇيىن، جۋرناليستەردى نە تولعاندىراتىندىعىن ءوز اۋىزدارىنا ەستۋى مۇلدەم باسقا دۇنيە ەكەندىگىن باس رەداكتورعا ۇعىندىرىپ جاتۋدىڭ ءوزى تىم ۇيات دۇنيە سەكىلدى.

ءبىزدى تاعى ءبىر تاڭ قالدىرعانى، مەنىڭ ءوز ماقالامداعى «شىندىعىندا دا قوستاناي دا ەجەلگى تورعاي سەكىلدى تاريحي اتاۋ، قاسيەتتى ولكە، قازاقتىڭ دا تاعى ءبىر كيەلى جەرى. ءبىر قازاقى اتتى ەكىنشىسىمەن اۋىستىرعاندا نە ۇتامىز؟» دەگەن ءسوزىمدى رەداكتور مىرزا مۇلدە بۇرمالاپ: «جوق  جەردەن ماسەلە ويلاپ تاۋىپ، ونبەيتىن داۋ تۋدىرىپ، سۇتتەي ۇيىپ وتىرعان اعايىنداردىڭ اراسىنا جىك سالۋدىڭ قانداي  قاجەتى بار؟» دەپ مەنىڭ ويىما كەلمەگەن دۇنيەنى ايتادى.

وۋ، مەن قايتا «ءبىر اتاۋدى ەكەنشىسىمەن اۋىستىرىپ قايتەمىز» دەپ وسىنداعى اعايىنداردى قايتا سول ونبەس داۋدى قۋدالاماسىن دەپ وتىرعان جوقپىن با؟ ال مەن ەگەر: «حات جازعاندار دۇرىس ماسەلە كوتەرىپ وتىر. قوستانايدىڭ اتى تورعاي بولىپ وزگەرگەنى دۇرىس» دەسەم، بۇرىنعى تورعاي وبلىسى مەن قازىرگى قوستاناي وبلىسى تۇرعىندارىنىڭ اراسىندا دۇردارازدىق باستالىپ كەتەرى انىق ەدى عوي. قيسىن قايدا، رەداكتور مىرزا؟

ايتپاقشى، جالپى، وسىنداي ماسەلەلەرگە اكىمگە تىكەلەي باعىنىشتى جاننان گورى وبلىستىق اكىمدىكتەگى ىشكى ساسات باسقارماسىنىڭ نەمەسە اكىمنىڭ ءباسپاسوز حاتشىسىنىڭ تولىمدى دا مازمۇندى جاۋاپ قايتارۋى الدەقايدا دۇىس بولار ەدى دەگەن وي وزىنەن-ءوزى سۇرانىپ تۇر. ويتكەنى بۇل ولاردىڭ تىكەلەي قىزمەتتىك مىندەتتەرىنە جاتارى ءسوزسىز.

جايبەرگەن بولاتوۆ

قوستاناي

Abai.kz