سەنبى, 26 قىركۇيەك 2020
COVID-19 قازاقستاندا. جۇقتىرعاندار — 107659. جازىلعاندار — 102360. قايتىس بولعاندار — 1699
دەپ جاتىر 2266 10 پىكىر 31 قازان, 2018 ساعات 11:09

مىرزان قايعى - مەمسىيلىققا لايىق

وركەنيەتتى ەلدەردە مەملەكەتتىك سىيلىقتى مايدان قىل سۋىرعانداي  ەتىپ ءومىر باقي شىعارماشىلىقپەن اينالىسىپ، سول سالانىڭ شىڭىنا شىققان  جۇزدەن  جۇيرىك، مىڭنان تۇلپار اتانعان اقىن نەمەسە جازۋشىعا الىپ بەرەدى. ال، ءبىزدىڭ  ەلدە  ءبارى كەرىسىنشە... كىمدە-كىم  مىقتى جاعىمپازدانسا، بيلىكتىڭ  شىنايى كەلبەتىن  جاسىرىپ، ءوز ازاماتتىق  كوزقاراسىن بىلدىرە  الماسا، شەنەۋنىكتەر  ءۇشىن  سولار ءتيىمدى. 

تاۋەلسىزدىك  العان جيىرما جەتى جىل اياسىندا  قانشاما  اقىن-جازۋشىلار مەملەكەتتىك  سىيلىق  الىپ  ۇلگەردى. مەملەكەتتىك  سىيلىقتى  الماقشى  بولىپ  دوداعا  تۇسكەندەردىڭ  سۇرقيا  سۇمدىقتارعا  باراتىنىن بىلايعى  جۇرت  بىلمەۋى  مۇمكىن. اراسىندا جۇرگەندىكتەن قاراپايىم  پەندەشىلىكتەن باستاپ، ادام  ايتسا  نانعىسىز  جاعدايلار  بولىپ جاتاتىنىنان ءبىز حاباردارمىز. ولار مەملەكەتتىك سىيلىقتى الىپ  العان سوڭ دا، قوعامداعى  قوردالانعان  ماسەلەلەرگە قاتىستى  جۇمعان  اۋزىن  اشپايدى. ياعني، «ەسەك لايدان  ءوتتى، قۋ  كەتتى» دەگەنگە  سايادى. مەملەكەتتىك  سىيلىققا تاعايىنداعان  50 000 اقش دوللاردى  قالتاعا سالسا بولدى، ءىس  ءبىتتى.

وسىنىڭ سالدارىنان قازاق  قوعامىنداعى  اششى  پروبلەمالاردى قوزعاپ، قازاق  تىلىنەن باستاپ، ءدىنى، سالت-ءداستۇرى، تاريحى، مادەنيەتى، ساياساتى تۋرالى  قارا  قىلدى  قاق  جارىپ جازىپ  جۇرگەن  قوعام   قايراتكەرى،  اقىن مىرزان كەنجەباي سياقتىلار تاسادا  قالىپ  قويا   بەرەدى. ويتكەنى، ءبىزدىڭ  بيلىككە شىڭعىرعان  شىندىق  كەرەك  ەمەس.

كەيبىرەۋلەر "مىرزان قايعى" دەپ  كەلەكەلەپ  مىقتى اقىندى ۇناتا  قويمايدى، ويتكەنى  "اقيقاتتى  ايتىپ نەمەسە  جازىپ قويادى" دەپ ويلايدى. اقىندىعى مەملەكەتتتىك سىيلىق  يەگەرلەرىنەن ارتىق  بولماسا  كەم  ەمەس. ونى كوكىرەك  كوزى  اشىق  زيالى  قاۋىم  وكىلدەرى  باياعىدا  مويىنداعان. سوندىقتان كىم  كورىنگەن  الىپ  جاتقان مەملەكەتتىك  سىيلىقتىڭ  قادىرىن كەتىرمەۋدى ويلاعان ءجون بولار ەدى.

جۇمامۇرات  ءشامشى

Abai.kz

 

10 پىكىر