بىزدەگى ءماجىلىس پەن سەناتتاعى 155 دەپۋتاتتىڭ ء45–ى زەينەت جاسىنان اسىپ، جەلكەلەرىن قاسىپ، ايلىقتارى مەن زەينەتاقىلارىن جامباستارىنا باسىپ، ءبىر–بىرىن يىقتارىمەن قاعىسىپ، كرەسلو شىركىنگە اش كەنەدەي جابىسىپ، تالتىرەكتەسە دە تابەتتەرى تاۋداي بولىپ ءجۇر ەكەن.
مەنىڭ كوز الدىما سەنات پەن ماجىلىستەگى جيىندار بىلاي ەلەستەيدى:
تىنىشتىق. ءبىر كەزدە سەكسەندەگى سەناتور كۇرك–كۇرك جوتەلىپ، ءبىلىم مينيسترىنە ساۋال تاستادى:
ء–اي شىراعىم، اتىڭ كىم ەدى؟
ء–بىلىمباي مەكتەپباەۆ.
–كوزىم ونشا كورمەي تۇر، سەن باسقارعان مينيسترلىك مەكتەپتەرگە ونشا كوڭىل بولمەي تۇر. شوبەرەمنىڭ سومكەسىندەگى كىتاپتار ون كيلادان اسىپ كەتتى، سومكەسىن كوتەرە بەرىپ، جۇرە الماي، وتىرىپ قالا بەرگەنىنە ميىم اشىپ كەتتى. سونى رەتتەۋگە بولا ما، وسى سۇراعىم ميىڭا قونا ما؟ –دەدى. دەدى دە، الدىنداعى بوتقادان ءبىر قاسىق جەدى.
توقسانداعى دەپۋتات سويلەي الماي، اۋىزىن كەمسەڭدەتتى دە، جىلاپ الدى، وزگەلەردىڭ كوڭىلدەرى بوساپ، كوزدەرىن كوز جاستارىمەن شىلاپ الدى... ال، ءجۇز ونداعى دەپۋتاتتىڭ بىردەڭە ايتقىسى كەلدى، كەشكى بەس بولماي، ۇيىنە قايتقىسى كەلدى:
–مەنىڭ ايتايى... اايتاي. ايت، ااا... –دەدى دە، سول وتىرعان كۇيى قايتىس بولىپ كەتتى. دەپۋتاتتار قول شاپالاقتادى. ويتكەنى، ونىڭ ورنىنا جاستار ەمەس، ءجۇز ەلۋدەگى قاريا دەپۋتات بولىپ سايلاناتىن بولدى، ونىڭ دا قۋارىپ قالعان مۇرتى مايلاناتىن بولدى. 150 جاستاعى دەپۋتاتتى قول ارباسىمەن كوتەرىپ كەلۋ كۇن تارتىبىنە قويىلدى. ءبىر كەزدە جاسى جەتپىستى القىمداعان ءماجىلىس توراعاسى داۋىستادى:
–قالتاڭباي سەلكىلدەگەنۇلى، ءسىز نە ىستەپ وتىرسىز؟ –دەپ سۇرادى.
–نا... ناسىباي اتىپ...
–جان–جاعىڭىزعا تۇكىرە بەرمەسەڭىزشى؟
–مەنىڭ بەتىمە تۇكىرىپ سالدى، –دەپ جىلاپ قالدى جانىندا وتىرعان 99 جاستاعى اجە دەپۋتات. جەتپىستەگى «جىگىتتەي» زەينەتكەر دەپۋتات پىرىلداپ ۇيىقتاپ جاتتى. تاعى ءبىر شال دەپۋتات كەشە ەت جەگەن ەكەن، سونى جۇتا الماي، ءالى شايناپ وتىر، بىراق كوزدەرى جاساۋراپ، قۋىعى قايناپ وتىر. تاعى ءبىر قارتىمىز ساقالىن تاراپ وتىر، ونىڭ جانىنداعى اجە دەپۋتات ەسىنەپ قويىپ، جان–جاعىنا ماناۋراي قاراپ وتىر.
كەشىرىڭىزدەر، قيالىم مەنىڭ وسىنداي، قابىل الىڭىزدار، پارلامەنتتەگى اجەلەر مەن اتالاردى شوشىنباي! ەرتەڭ ءبارىن شايعا شاقىرماسام با؟

مۇحتار شەرىمنىڭ facebook پاراقشاسىنان

Abai.kz