كەشە الماتى قالاسىنداعى ۇلتتىق كىتاپحانادا  ابەن ء(ابدىالى) الدابەرگەنۇلى نۇرمانوۆتىڭ 100 تومدىق كىتابىنىڭ تۇساۋكەسەرى ءوتتى. سالتاناتتى جيىن باستالار تۇستا 100 تومدىقتىڭ اۆتورى ابەن الدابەرگەنۇلى ءوزىن: "الدارىڭىزدا الەمنىڭ ءۇشىنشى ۇستازى تۇر", - دەپ مالىمدەدى. ال، زالدا ينە شانشارعا ورىن بولمادى.

كوپشىلىك ەسىم سويىن بىلە بەرمەيتىن   ابەن ء(ابدىالى) الدابەرگەنۇلى نۇرمانوۆ كىم؟ ول: بۇۇ ادام قۇقىعى جونىندەگى كوميتەتىنىڭ كەڭەسشىسى، قازاقستان ءبىلىم بەرۋ ءىسىنىڭ قۇرمەتتى قىزمەتكەرى، قازاقستان جازۋشىلار وداعىنىڭ مۇشەسى، اقىن، جازۋشى، ەكونوميكا عىلىمىنىڭ دوكتورى ابەن الدابەرگەنۇلى قىتاي، رەسەي، قىرعىزستان، ءازىربايجان  مەملەكەتتەرىنىڭ 8 جوعارى وقۋ ورنىنىڭ قۇرمەتتى پروفەسسورى. ا.ەينشتەين اتىنداعى حالىقارالىق ەنەرگەتيكا اكادەمياسىنىڭ، م.نوسترادامۋس اتىنداعى حالىقارالىق تىلسىم سىرلار اكادەمياسىنىڭ، رەسەي پەداگوگيكا  اكادەمياسىنىڭ اكادەميگى، رەسەي پسيحولوگيا اكادەمياسىنىڭ مۇشە-كوررەسپوندەنتى. ب. مومىشۇلى اتىنداعى  «وتان قورعاۋشىعا» قۇرمەت بەلگىسىنىڭ جانە  رەسەيدىڭ عىلىم سالاسىنداعى «م.لومونوسوۆ»  وردەنىنىڭ، اعارتۋ سالاسىنداعى «گوگول»  مەدالىنىڭ، دەنساۋلىق ساقتاۋ سالاسىنداعى «ۆ.بەحتەرەۆ» مەدالىنىڭ يەگەرى، ءازىربايجاننىڭ «گەيدار اليەۆ» التىن مەدالىنىڭ، انگليانىڭ «قىزىل كرەست» قايىرىمدىلىق وردەنىنىڭ، چەحيانىڭ  «كورول البەرت ۆالحشتەين» وردەنىنىڭ، يتاليانىڭ «لەوناردو ۆينچي» وردەنىنىڭ، قىرعىزستاننىڭ «ماناس جاڭعىرىعى» تەلەراديوكومپانياسىنىڭ «عاسىر ادامى» اتاعىنىڭ، حالىقارالىق «مۇستافا كەمال اتاتۇرىك» سىيلىعىنىڭ لاۋرەاتى جانە التىن مەدالىنىڭ، «ورتالىق ازيانىڭ ۇزدىك رەكتورى» اتاعىنىڭ يەگەرى.  «تالانتتار اكادەمياسى» وقۋ-كەڭەس ورتالىعىنىڭ قۇرىلتايشىسى، الماتى قالاسى گۋمانيتارلىق-كوممەرتسيالىق كوللەدجىنىڭ پرەزيدەنتى، «مامىر» حالىقارالىق وقۋ-كەڭەس ورتالىعىنىڭ پرەزيدەنت-رەكتورى، سونداياق حالىقارالىق يننوۆاتسيالىق تەحنولوگيالار ۋنيۆەرسيتەتىنىڭ رەكتورى.

ءبىزدىڭ ورتامىزدا مىنە، وسىنداي كوپتەگەن اتاق پەن لاۋازىمنىڭ يەسى اتانعان "الەمنىڭ ءۇشىنشى ۇستازى" بار. بىلە جۇرگەنىمىز ءجون شىعار...

Abai.kz