Tomsk.ru سايتىنىڭ مالىمەتىنە قاراعاندا، تەرگەۋ باسقارماسىنا جابىرلەنۋشىنىڭ ايەلىنەن ارىز تۇسكەن.

ايەلدىڭ ءوزى رەسەي ازاماتى ەكەن، ال كۇيەۋى تاجىكستاندىق. كۇيەۋى جاقىندا عانا يك-3 اباقتىسىنان بوساتىلىپ، ەندى وتانىنا دەپورتاتسيالاۋدى كۇتىپ وتىر ەكەن. شاعىمدانۋشىنىڭ سوزىنە قاراعاندا، 13 ساۋىردە ومون وكىلدەرى كۇيەۋىن جانە وزگە ميگرانتتاردى ۇرىپ-سوققان.

وبلىستىق ومبۋدسمەن ەلەنا كارتاشوۆا ورتالىققا بارىپ، ونداعى ازاماتتاردىڭ راسىندا ءارتۇرلى جاراقات العانىن راستاعان. بىرەۋىنىڭ قابىرعاسى سىنعان. ەندى ءبىرى اۋرۋحانادا جاتىر.

«بىرنەشە شەتەلدىك ازاماتتار 12 ساۋىردە "ماسكا كيگەن ادامدار" وزدەرىن قولدارىمەن، اياقتارىمەن ۇرىپ، تەپكىلەگەنىن، بارلىعىن ەدەنگە جاتقىزىپ، ۇستەرىنەن جۇرگەنىن ايتتى»، - دەلىنگەن ومبۋدسمەن جاريالاعان مالىمدەمەدە.

روسگۆارديا ومون-نىڭ شىن مانىندە قوعامدىق ءتارتىپتى قامتاماسىز ەتۋ ءۇشىن، ورتالىققا بارعانىن، بىراق ولاردىڭ ەشكىمگە كۇش كورسەتپەگەنىن ايتادى.

تومسكىدەگى تاجىك دياسپوراسىنىڭ وكىلى سايفۋللو يسماتۋللوەۆ 17 ساۋىردە شەتەلدىك ميگرانتتار جاتقان ورتالىققا بارىپ، باسشىلارىمەن كەزدەسكەن. ونىڭ سوزىنشە، قازىر ورتالىقتا ءۇش تاجىك ازاماتى بار. ولاردىڭ ءبارى تۇزەۋ مەكەمەسىنەن بوساتىلعاننان كەيىن وسى ورتالىققا جىبەرىلگەن. «ورتالىق باسشىلارى ءجابىر كورگەن تاجىك ازاماتتارى بار ما دەگەن مەنىڭ ساۋالىما جاۋاپ بەرمەدى. بىراق اڭگىمەلەسۋ بارىسىندا ومون قىزمەتكەرلەرى تاراپىنان ازاپ كورگەندەردىڭ دەنى وزبەكستان ازاماتتارى ەكەنى بەلگىلى بولدى»،- دەيدى تاجىك دياسپوراسىنىڭ باسشىسى.

Abai.kz