بۇگىن «جاس وتان» جاستار قاناتى سەزىنىڭ ەكىنشى جۇمىس كۇنى اياسىندا «ەكسپو-2017» حالىقارالىق كورمەسىنىڭ كونگرەسس-ورتالىعىندا «جاڭا الەمگە جول سالامىز» اتتى گالا-فورۋم ءوتتى. وندا بويىندا كۇش-قۋاتى تاسىعان، ەل ەرتەڭىنە بەي-جاي قارامايتىن جالىندى جاستار باس قوسىپ، اۋقىمدى ماسەلەلەردى تالقىلادى.

ەلباسىنىڭ قۇتتىقتاۋ ءسوزىن مەملەكەتتىك حاتشى گۇلشارا ابدىقالىقوۆا وقىپ بەردى.

– «جاس وتان» ەلىن، جەرىن سۇيەتىن، ءوز بولاشاعىن قازاقستاننىڭ كەمەل كەلەشەگىمەن بايلانىستىراتىن، مىڭداعان ءبىلىمدى دە بەلسەندى جاستاردىڭ باستارىن بىرىكتىرەتىن، مەنىڭ بارلىق باستامالارىم مەن ستراتەگيالىق جوسپارلارىمنىڭ سەنىمدى تىرەگى بولىپ كەلە جاتقان بەدەلدى ۇيىم. تاۋەلسىزدىكتىڭ العاشقى كۇندەرىنەن باستاپ جاستار ماسەلەسى مەنىڭ دە، مەملەكەتتىڭ دە ەڭ باستى نازارىندا بولىپ، بۇل سالادا كوپتەگەن باعدارلامالار جۇزەگە اسىرىلدى. مەن وسىناۋ مەملەكەتتىڭ جەڭىسى مەن قامقورلىقتىڭ جىلۋىن جاستارىمىز جاقسى بىلەتىنىنە كامىل سەنەمىن، – دەلىنگەن ەلباسىنىڭ قۇتتىقتاۋ سوزىندە.

ودان بولەك، مەملەكەت باسشىسى بۇگىندە بۇكىل الەم اۋقىمدى وزگەرىستەردى باستان وتكەرىپ، تورتكۇل دۇنيە ءتورتىنشى ونەركاسىپتىك رەۆوليۋتسيا داۋىرىنە قادام باسقانىنا نازار اۋدارعان. سونداي-اق، ەلباسىنىڭ قۇتتىقتاۋ حاتىندا:

– مەن سەندەردى بەلسەندى تۇردە جان-جاقتى دامۋعا، سپورتپەن، ونەرمەن اينالىسۋعا، شەت تىلدەرىن ۇيرەنۋگە، وتاندىق جانە الەمدىك ادەبيەتتىڭ تەرەڭ مۇرالارىن تانىپ بىلۋگە، ەڭ باستىسى ارقايسىڭدى ءوز سالالارىڭدا الەمنىڭ ەڭ وزىق ماماندارىمەن يىق تىرەستىرىپ، قاتار تۇرا الاتىنداي دەڭگەيگە كوتەرىلۋگە شاقىرامىن. سەندەر، اتا-بابالارىمىزعا ارمان بولعان، ءبىزدىڭ بۋىن نەگىزىن قالاعان تاۋەلسىزدىكتى باياندى ەتىپ، ءبىزدىڭ جەڭىستى جولىمىز بەن جاسامپاز ءداستۇرىمىزدى لايىقتى جالعاستىرۋعا تيىسسىڭدەر! «جاڭا الەمگە جول سالامىز» دەگەن سەزدىڭ اتاۋى دا جاستارىمىزدىڭ جاڭاشىلدىققا ۇمتىلىسىن اڭعارتىپ، كوڭىلگە قۋانىش ۇيالاتادى. مەن سەندەردىڭ تىڭ باستامالارىڭدى ارقاشان قولدايمىن! ەندەشە جاڭا الەمگە سالعان جولدارىڭىز ءاردايىم اشىق ءارى داڭعىل بولسىن!، – دەلىنگەن.

مەملەكەت باسشىسىنىڭ ۇنەمى جاستارعا قولداۋ كورسەتىپ، بىلىكتى مامان بولىپ قالىپتاسۋىنا بارلىق جاعدايدى جاساپ كەلە جاتقانىن ايتقان «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ەكى كۇنگە جالعاسقان سەزدىڭ ءماندى دە مازمۇندى وتكەنىنە نازار اۋداردى.

– سەزد كەزىندە ۇتىمدى ويلار مەن وزەكتى پىكىرلەر ايتىلدى. جاستارىمىز بەلسەندىلىك تانىتىپ، ءتۇرلى ۇسىنىستارمەن شىقتى. ەڭ باستىسى، ءبىز كرەاتيۆتى، زاماناۋي، ەل جاستارىنىڭ باعىت-باعدارىن ايقىنداعان ناتيجەلى سەزد وتكىزدىك دەپ ايتۋعا تولىق نەگىز بار. ءبىز جۇدىرىقتاي جۇمىلىپ، وسىنداي اياسى كەڭ جيىندى جاڭا فورماتتا، تىڭ باعىتتا وتكىزۋگە بولاتىنىن كورسەتتىك. سول ارقىلا جاسوتاندىقتار اشىقتىقتىڭ وزىق ۇلگىسىن تانىتتى. سوندىقتان بۇل سەزدى «جاس وتان» جاستار قاناتىنىڭ جاڭعىرۋىنىڭ جارقىن كورىنىسى رەتىندە قاراستىرۋعا ابدەن بولادى، – دەدى ماۋلەن اشىمباەۆ.

گالا-فورۋم بارىسىندا ءار سالادا بەلگىلى ءبىر بيىكتەردى باعىندىرعان، قوعامنىڭ دامۋىنا وزىندىك ۇلەسىن قوسىپ كەلە جاتقان بەلسەندى جاس قازاقستاندىقتار ءسوز الىپ، ارىپتەستەرىنە جەتىستىككە جەتۋدىڭ قىر-سىرىن ايتىپ بەردى.

ودان بولەك، سەزد كەزىندە جاسوتاندىقتاردىڭ ۇيىمنىڭ دامۋى مەن ەلىمىزدەگى جاڭعىرۋ ۇدەرىستەرىنە قاتىسۋى جونىندەگى ستراتەگيالىق مىندەتتەر كورسەتىلگەن «جاڭا الەمگە جول سالامىز» اتتى قۇجات قابىلداندى.

بيىلعى سەزدىڭ تاعى ءبىر باستى ەرەكشەلىگى رەتىندە ونىڭ VR, ياعني ۆيرتۋالدى شىنايىلىق فورماتىندا ۇيىمداستىرىلۋىن اتاپ وتكەن ءجون. سونىڭ ناتيجەسىندە سەزد جۇمىسىن قاتىسۋشىلارمەن بىرگە الەمنىڭ بارلىق ينتەرنەت قولدانۋشىسى 360 گرادۋستا ونلاين كورۋگە مۇمكىندىك الىپ وتىر.

Abai.kz