- تاڭەرتەڭگى [جەكسەنبى كۇنگى – رەد.] ساعات 9:30 كەزىندەگى مالىمەت بويىنشا "اق-تىلەك" وتكىزۋ بەكەتىندە 410 جۇك اۆتوكولىگى كەزەكتە تۇر. بىراق كەشە كەشكى ساعات التىدان باستاپ قازاقستان جاعى ولاردى وتكىزۋدى تەزدەتكەن. تاڭعا دەيىن 225 جۇك كولىگىن وتكىزگەن. بۇعان دەيىن ساعاتىنا جەتى-سەگىز عانا كولىك وتسە، قازىر ون بەس-جيىرمادان ءوتىپ جاتىر، - دەيدى سالقىن ابدىكاريەۆا.

ونىڭ ايتۋىنشا، قىرعىزستاننىڭ تالاس وبلىسىنداعى "چوڭ-كاپكا" وتكىزۋ بەكەتىندە كەزەكتە تۇرىپ قالعان 70-كە جۋىق جۇك كولىگىنىڭ بارلىعى قازاقستانعا وتكەن.

جەلتوقساننىڭ 2-ءى كۇنى استانادا قازاقستان مەن قىرعىزستان ۇكىمەتتەرىنىڭ وكىلدەرى كەلىسسوز وتكىزىپ، ونىڭ قورىتىندىسى بويىنشا ەكىجاقتى ەكونوميكالىق ارىپتەستىك ماسەلەلەرى بويىنشا "جول كارتاسىنا" قول قويعان. قۇجاتتا شەكارالىق، كولىك، فيتوسانيتارلىق جانە ۆەتەرينارلىق باقىلاۋ، كەدەندىك جانە سالىق سالالارى ءتارىزدى ەكىجاقتى ارىپتەستىكتىڭ وزەكتى ماسەلەلەرىن كەشەندى تۇردە شەشۋدى كوزدەيتىن 50 شارا قامتىلعان. ونىڭ ىشىندە جەدەل سيپاتتاعى 16 شارا، سونىمەن بىرگە 5 قىسقا مەرزىمدى جانە 29 جۇيەلى شارالار ەنگىزىلگەن.

قازاقستان قىرعىزستانمەن شەكاراداعى باقىلاۋدى قازاننىڭ 10-ىنان باستاپ كۇشەيتىلگەن رەجيمگە كوشىرگەننەن كەيىن كورشى ەلدەن قازاقستان اۋماعىنا ءوتۋ قيىنداپ كەتكەن ەدى. استانا شەكارادا تەكسەرۋدىڭ كۇشەيتىلگەنىن كونتراباندامەن كۇرەس شاراسى دەپ تۇسىندىرگەن. بىشكەك قازاقستان جاعى شەكارادا "قولدان كەدەرگى جاساپ وتىر" دەپ مالىمدەگەن.

كەي ساراپشىلار استانانىڭ مۇنداي شاراعا بارۋىن سول كەزدەگى قىرعىزستان پرەزيدەنتى المازبەك اتامباەۆتىڭ "قىرعىزستاننىڭ ىشكى ىسىنە ارالاسىپ وتىر" دەپ قازاقستان باسشىلىعىن سىناعان مالىمدەمەسىمەن بايلانىستىرعان.

Abai.kz