تۇركيادا سوققىعا جىعىلعان قىرعىز ايەلىن ەلىنە قايتارۋ ماسەلەسى قارالىپ جاتىر
تۇركيادا ەكى پوليتسەيدىڭ قىرعىز ازاماتىن سوققىعا جىققانىنا بايلانىستى قىرعىزستاننىڭ سىرتقى ىستەر مينيسترلىگى پىكىر ءبىلدىردى.
«قازىرگى ۋاقىتتا ەكى تۇرىك پوليتسەيى تەرگەۋ ءىسى اياسىندا قىزمەتتەرىنەن ۋاقىتشا شەتتەلدى»، - دەلىنگەن سىرتقى ىستەر مينيسترلىگىنىڭ ءباسپاسوز قىزمەتى تاراتقان مالىمدەمەدە.
5 قازاندا تۇركياداعى قىرعىز ەلشىلىگى الانيانىڭ قاۋىپسىزدىك باسقارماسىنا حابارلاسقان. ونداعى قىزمەتكەر كونسۋلعا بولعان وقيعانى راستاعان.
جابىرلەنۋشى قازىرگى ۋاقىتتا مەديتسينالىق جانە پسيحولوگيالىق كومەك الىپ جاتىر ەكەن. تەرگەۋ ءىسى اياقتالعاننان كەيىن، جابىرلەنۋشىنى وتانىنا جىبەرۋ تۋرالى شەشىم قارالادى.
تۇركيانىڭ الانيا قالاسىندا ەكى پوليتسەي قىرعىز ايەلىن سوققىعا جىققان. ونى جەرگىلىكتى تۇرعىندار ۆيدەوعا ءتۇسىرىپ العان. ال جەرگىلىكتى پوليتسيا باسشىسى باق-قا بەرگەن سۇحباتىندا 40 جاستاعى قىرعىز ايەلىنىڭ پسيحيكالىق اۋىتقۋشىلىعى بار دەگەن.
Abai.kz
