دۇيسەنبى, 6 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
46 - ءسوز 4942 2 پىكىر 5 قازان, 2017 ساعات 08:59

قويىڭىزشى، اعاي...

سەگىزىنشى قاباتتاعى پاتەرىمنىڭ بالكونىندا تەمەكى شەگىپ تۇرعانمىن. جوعارى قاباتقا قاراي سالىپ ەدىم، ءبىر بويجەتكەن بالكوننان اسىلىپ، "سۋيسيد" جاساعالى جاتىر! تاڭ اتپاي! دەنەم تۇرشىگىپ كەتتى! ويباي، قۇلاپ كەتتى! دەرەۋ ەكى قولىمدى توسىپ، تالدىرماش قىزدى قاعىپ الدىم.

– وي اعاي، مۇنىڭىز نە؟ – دەپ وكپەلەدى قىز.

– كەشىرىڭىز، ەسىمىڭىز؟

– ايشا...

– نەگە سەكىرىپ كەتتىڭىز؟ ءجايشا؟

– جىگىتىم الداپ كەتتى. باسقا قىزبەن روماندى باستاپ كەتتى...

– سوعان بولا؟ نەعىپ ەپوپەيا باستاپ كەتپەيدى؟

– قويىڭىزشى، اعاي... – دەگەن ول جۇگىرە باسىپ، مەنىڭ پاتەرىم ارقىلى كەتىپ قالدى. ۇيدە ەشكىم جوق بولاتىن. ايەلىم «جەدەل جاردەمدە»، تۇنگى كەزەكشىلىكتەن قازىر كەلىپ قالۋى مۇمكىن. تەمەكىمدى ەندى تۇتاتا بەرىپ، جوعارى قاراپ ەدىم. الگى قىز تاعى سەكىرەيىن دەپ جاتىر. وپپا، سەكىرىپ تە كەتتى! قولىمدى توسا قويىپ، قاعىپ الدىم.

– تۋ، اعاي... – دەدى ول بۇلقىنىپ. قۇشاقتاپ تۇرمىن. جىبەرە سالسام، سەكىرىپ كەتە مە دەپ... سەكەڭدەپ قالعان قانداي قىز ءوزى؟ بۇل جاستارعا نە بولعان ءوزى؟ جازدا قول ۇستاسىپ، سەكىرىپ كەتكەن قىزدار تۋرالى ەستىپ، ەسەڭگىرەپ قالىپ ەدىم.

– اتىڭىز كىم؟ – دەپپىن ساسقانىمنان.

– ايشا.

– سەكىردىڭ بە، ءجايشا؟

– تۋ. قويىڭىزشى اعاي! – دەگەن ول بۇلقىنعان سوڭ، جىبەرە سالدىم. ادەمى قىز ەكەن. ءمۇسىنى قانداي؟ بالتىرى قانداي... ءدىر-ءدىر ەتكەن ءتوسى قانداي... وسىنداي سۇلۋلىقتى قۇربان ەتپەك پە؟ ويىم ونعا ءبولىنىپ، جوعارى قاراسام، الگى قىز...

– جىندىسىڭ با؟ – دەپ ايقايلادىم.

– ارى تۇرىڭىزشى، اعاي!

– ۇيىڭدە ەشكىم جوق پا؟

– كۆارتيرانتپىن!
ول سەكىرىپ كەتتى، مەن قاعىپ الدىم. قۇشاقتاپ تۇرمىن. دەنەسى ءدىر-ءدىر ەتەدى. نە دەگەن سۇلۋ قىز ەدى؟ كوز جانارىمىز ءتۇيىسىپ قالدى. مەن ونىڭ ساماي شاشىن ساۋساعىممەن ءىلىپ الىپ، كەرى قايىردىم.

– اتىڭىز كىم، قارىنداس؟

– ايشا.

– سەكىردىڭىز بە، جايشا؟

– تۋ، قويىڭىزشى اعاي...

– سىزدەي سۇلۋدى رەنجىتكەن قانداي توپاس؟

– ءبىر دوكەيدىڭ توپاسى! مەنى الداپ...

– ۇمىت ونى! وعان عاشىق بولعانشا، ومىرگە عاشىق بول!

– مەن ونى سۇيەمىن...

– سۇيسەڭ ءتىرى بول! ىنجىق بولماي، ءىرى بول!

– تۋ، قويىڭىزشى اعاي! اعاي دەيىم...

– اۋ؟

– مەنى نەگە قۇشاقتاااپ تۇرسىز؟

– وي، كەشىرىڭىز، كىم ەدى ەسىمىڭىز؟

– دۋراك!

– جەپ قويايىن با، ءوزىڭدى تۋراپ-تۋراپ؟

– ە؟

– سۇلۋ ەكەنسىز...

– قويىڭىزشى اعاي...

– ءاي، ودان دا، مەنى تۋراپ جەمەيسىڭ بە؟ – دەگەن داۋىسقا جالت قاراسام، ايەلىم تۇر "سۆەتوفور" بولىپ. ال، ەندى قۇتىلىپ كور، ال ەندى ءتۇسىندىرىپ كور؟ ال ەندى قۇتىلىپ كور! قۇشاعىمدا قىز، كوڭىلىمدە مۇز، ال ايەلىمنىڭ سوزدەرىندە تۇز...

مۇحتار شەرىم

Facebook-تەگى پاراقشاسىنان

 

2 پىكىر