سارسەنبى, 27 مامىر 2020
COVID-19 قازاقستاندا. جۇقتىرعاندار — 9304. جازىلعاندار — 4746. قايتىس بولعاندار — 37
بەتبۇرىس 5736 343 پىكىر 15 ءساۋىر, 2017 ساعات 19:32

اماندىق باتالوۆ: ەلباسى ماقالاسى جاڭا مىندەتتەر جۇكتەدى

ەلباسىمىز نۇرسۇلتان ءابىشۇلى نازارباەۆتىڭ «ەگەمەن قازاقستان» گازەتىندە جارىق كورگەن «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنا وراي بۇگىن تالدىقورعاندا الماتى وبلىسىنىڭ اكىمى اماندىق باتالوۆتىڭ توراعالىعىمەن اكتيۆ جيىنى ءوتتى، دەپ حابارلايدى الماتى وبلىسى اكىمىنىڭ ءباسپاسوز قىزمەتى.

جيىندى اشقان وبلىس باسشىسى ا. باتالوۆ ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى سوڭعى كۇندەردە ەل ومىرىندەگى قوعامدىق-ساياسي ماڭىزى زور وقيعانىڭ ءبىرى بولعانىن اتاپ ءوتتى. وندا ەلباسى ەكونوميكالىق جانە ساياسي جەتىستىكتەرىمىزدى دامىتۋدىڭ رۋحاني باعدارلاماسىن ۇسىنىپ وتىرعانىنا توقتالدى.

- بۇل باعدارلاما ۇلتىمىز ءۇشىن ماڭىزى تەرەڭ، اۋقىمى زور، ونەگەسى مول، حالقىمىزعا رۋحاني ازىق بولاتىن ايتۋلى دۇنيە. بۇل ماقالادا وتكەن تاريحي كەزەڭدەرگە سىندارلى باعا بەرىلىپ، وي ەلەگىنەن وتكىزىلىپ، رۋحاني دامۋ باعىتىمىز ايقىندالعان. ەل پرەزيدەنتى قوعامنىڭ رۋحاني جاڭعىرۋىنا حالىقتىڭ ءداستۇرى مەن ۇلتتىق مادەنيەتى نەگىز بولۋى ءتيىس ەكەنىن ايتتى. مۇنداي باعىتتى ۇستانۋ كەشەگى كۇن مەن بۇگىندى، بۇگىن مەن ەرتەڭدى جالعاستىرادى. سوندىقتان ءبىزدىڭ مىندەتىمىز مەملەكەت باسشىسىنىڭ تاپسىرماسىن ورىنداي وتىرىپ، ماقالادا كورسەتىلگەن جوبالارعا باستى نازار اۋدارۋ، - دەپ اتاپ ءوتتى ا. باتالوۆ.

جيىندا وبلىس اكىمىنىڭ ورىنباسارى جاقسىلىق ومار بايانداما جاسادى. بايانداماشىنىڭ ايتۋىنشا، وبلىس باسقارمالارى ءوز جوسپارلارىنا باعدارلامالىق ماقالانىڭ مىندەت-ماقساتتارىن نەگىزگە الا وتىرىپ، تولىقتىرۋلار جاسايتىن بولادى. ماسەلەن، وبلىستىق ىشكى ساياسات جانە جاستار ساياساتى، مادەنيەت، تىلدەردى دامىتۋ جانە ءدىن ىستەرى جونىندەگى باسقارمالارعا ءساۋىر ايىنىڭ اياعىنا دەيىن باعدارلامالىق ماقالادا ايتىلعان تىرەكتەردى قامتيتىن ۇسىنىستار ەنگىزىپ، ءىس-شارالار جوسپارىن ازىرلەۋ تاپسىرىلدى. بۇل جۇمىسقا وبلىستىق قازاقستان حالقى اسسامبلەياسى مەن جەرگىلىكتى بۇقارالىق اقپارات قۇرالدارى دا بەلسەنە قاتىسۋى ءتيىس.

- قازىر ءبىز العا قويىلعان مىندەتتەردى نەگىزگە الا وتىرىپ، جەدەل تۇردە ساراپتامالىق جۇمىس جۇرگىزۋىمىز قاجەت جانە الماتى وبلىسىنىڭ رۋحاني دامۋىنىڭ، مادەنيەتى مەن تاريحىنىڭ، ءتۋريزمىنىڭ اۋقىمدى مۇمكىندىكتەرىن اشىپ كورسەتە ءبىلۋىمىز كەرەك. ەكى اپتانىڭ ىشىندە باعدارلامالىق قۇجاتتى جۇزەگە اسىرۋدىڭ وڭىرلىك جوسپارىن وبلىس باسشىسىنىڭ قاراۋىنا ۇسىنا الامىز دەپ ويلايمىن،- دەدى ج. ومار. بۇل ورايدا وبلىس اكىمى ا. باتالوۆتان وسى مىندەتتەردىڭ ورىندالۋىنا ىقپال ەتەتىن قۇرامىنا زيالى قاۋىم، عالىمدار، جاستار، ەتنومادەني ورتالىقتار مەن قوعامدىق ۇيىمدار وكىلدەرى ەنگىزىلەتىن جۇمىس توبىن قۇرۋعا قولداۋ كورسەتۋدى سۇرادى.

جارىسسوزگە فيلوسوفيا عىلىمدارىنىڭ دوكتورى، پروفەسسور، «ماڭگىلىك ەل» عىلىمي-ءبىلىم بەرۋ ورتالىعىنىڭ جەتەكشى عىلىمي قىزمەتكەرى امانجول قاسابەك، «الماتى وبلىستىق سلاۆيان قوزعالىسى» قوعامدىق بىرلەستىگىنىڭ مۇشەسى ناتاليا بەليك، وبلىستىق «جەتىسۋ» جانە «وگني الاتاۋ» گازەتتەرىنىڭ باس رەداكتورلارى امىرە ءارىن مەن اتساليم يديگوۆ، وڭىرلىك كوممۋنيكاتسيالار قىزمەتىنىڭ جۋرناليست-مودەراتورى گالينا ميتكوۆسكيح شىعىپ، ءوز وي-پىكىرلەرىن ءبىلدىردى.

جيىن سوڭىندا وبلىس اكىمى ا. باتالوۆ:

- قوعامدىق سانانى جاڭعىرۋ جونىندەگى ەلباسى نۇرسۇلتان ءابىشۇلى نازارباەۆتىڭ يدەياسى - ەلىمىزدەگى كونستيتۋتتسيالىق، ەكونوميكالىق رەفورمالاردىڭ زاڭدى جالعاسى. ماقالادا جاڭا زامان كوشىنە ىلەسىپ، وركەنيەتتى ەل بولۋ ءۇشىن ۇلتتىق سانانى ساقتاۋ مەن ورىستەتۋدىڭ ناقتى جولدارى ۇسىنىلعان. وسى باعدارلامالىق قۇجاتقا سايكەس جەتىسۋ وڭىرىندە بىرلىك پەن تاتۋلىقتى، رۋحاني كەلىسىمدى، ەكونوميكالىق دامۋ ۇردىستەرىن ساقتاۋ ماقساتىندا اتقارىلاتىن ناقتى جۇمىستار 1 مامىرعا دەيىن ايقىندالۋى ءتيىس، - دەپ، ءتيىستى قۇرىلىمدارعا ناقتى مىندەتتەر جۇكتەدى.

مۇنان كەيىن وبلىس باسشىسى ءاربىر اۋدان، قالالارداعى تاريحي، مادەني ەسكەرتكىشتەردىڭ ءتىزىمىن جاڭارتۋدى، جاستاردى ەلجاندىلىققا تاربيەلەۋ ءىسىن كۇشەيتۋدى، حالىقتىڭ رۋحاني جانە مورالدىق قۇندىلىقتارىن نىعايتۋ باعىتىنداعى جۇمىستاردى شيراتۋدى تاپسىردى.

Abai.kz

343 پىكىر