31 ناۋرىزدا قازاقستاننىڭ مينسكتەگى ەلشىلىگىندە گرودنو وبلىسى ۆولكوۆىسك قالاسىنىڭ جاستار پارلامەنتىنىڭ 25 ادامنان قۇرالعان دەلەگاتسياسى بولدى. كەزدەسۋ بارىسىندا قر توتەنشە جانە وكىلەتتى ەلشىسى ەرعالي بولەگەنوۆ قوناقتارعا تۇڭعىش پرەزيدەنت – ەلباسى نۇرسۇلتان ءابىشۇلى نازارباەۆتىڭ باسشىلىعىمەن تاۋەلسىزدىكتىڭ 25 جىلدىق جولىنداعى قازاقستان رەسپۋبليكاسىنىڭ دامۋى، مەملەكەتتىك بيلىك تارماقتارى اراسىندا وكىلەتتىكتەردى قايتا ءبولۋ جونىندەگى كونستيتۋتسيالىق رەفورمالار، ەلباسىنىڭ قازاقستان حالقىنا جولداعان “قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىك” جولداۋى تۋرالى ەگجەي-تەگجەيلى ايتىپ ءوتتى.

قر ەلشىسى ەلشىلىك پەن ۆولكوۆىسك قالاسىنىڭ باسشىلىعى ا كوپتەگەن جىلدار بويى تىعىز دوستىق قارىم-قاتىناستا ەكەندىگىن اتاپ ءوتتى. ە.بولەگەنوۆ ۆولكوۆىسك قالاسىن بوساتۋ كەزىندە ەرلىكپەن قازا تاپقان كەڭەس وداعىنىڭ باتىرى - قازاقستاندىق  قازبەك نۇرجانوۆتىڭ ەرلىگىن ۇمىتپاي قاستەرلەپ جۇرگەندەرى ءۇشىن ۆولكوۆىسك قالاسىنىڭ باسشىلىعى مەن تۇرعىندارىنا، سونىمەن بىرگە وقۋشىلارىنا ۇلكەن العىسىن ءبىلدىردى.

ءمالىم بولعانداي، ۆولكوۆىسك جانىنداعى باۋىرلاستار زياراتىندا باتىر ق.نۇرجانوۆقا ارناپ ەسكەرتكىش ورناتىلعان، سول قالانىڭ يۋجنىي مولتەكاۋدانىنداعى كوشەلەردىڭ بىرىنە قازبەك نۇرجانوۆتىڭ ەسىمى بەرىلگەن.

جىل سايىن، 1978 جىلدان بەرى، وتان قورعاۋ كۇنى قارساڭىندا وليمپيادالىق رەزەرۆتەگى № 1 مامانداندىرىلعان بالالار-جاسوسپىرىمدەر مەكتەبىندە كەڭەس وداعىنىڭ باتىرى ق.ب.نۇرجانوۆتىڭ كۋبوگىنە جەڭىل اتلەتيكادان وبلىستىق جارىستار وتكىزىلىپ تۇرادى.

ەلشى ە.ب.بولەگەنوۆتىڭ باسشىلىعىمەن قازاقستان ەلشىلىگى  جىل سايىن اتالعان شاراعا قاتىسىپ، ۇيىمداستىرۋشىلار مەن قاتىسۋشىلارعا ءبىر-بىرىنە بەرىلىپ وتىراتىن كۋبوكتاردى، باعالى سىيلىقتار مەن جۇلدەلەردى تاپسىرىپ وتىرادى.

جاستار پارلامەنتىنىڭ مۇشەلەرىنە قازاقستان ەلشىلىگىنىڭ اتىنان قابىلداۋ ۇيىمداستىرىلىپ، سۋۆەنيرلەر بەرىلدى.

قر-دىڭ بر-داعى ەلشىلىگى

Abai.kz