جەكسەنبى, 5 ءساۋىر 2020
COVID-19 قازاقستاندا. جۇقتىرعاندار — 531. جازىلعاندار — 36. قايتىس بولعاندار — 5
ءبىزدىڭ شەنەۋنىك 4035 0 پىكىر 15 مامىر, 2015 ساعات 09:51

21 مىڭ تەڭگەمەن ءبىر اي كۇنەلتىپ كورىڭىزشى، تامارا حانىم!

ەلىمىزدە ەڭ تومەنگى ءومىر ءسۇرۋ دەڭگەيى 21 مىڭ تەڭگە 364 تيىن. حالىقتىڭ الەۋمەتتىك احۋالىن شوتقا سالىپ وتىرعان بيلىكتىڭ بەكىتىپ بەرگەنى – وسى. قازاقستان – جالپى ينفلياتسيادان كوز اشپاي كەلە جاتقان ەل. بيۋدجەتتىك مەكەمەلەردە ىستەيتىن قىزمەتكەرلەر مەن زەينەتكەرلەردىڭ ءاميانىنا بىرەر تيىن ارتىق تۇسسە ءبىتتى، ازىق-تۇلىكتىڭ، كوممۋنالدىق قىزمەتتىڭ، ت.ب. باعاسى شارىقتاپ شىعا كەلەدى. الداعى شىلدە ايىنان باستاپ، مىسالى، كوممۋنالدىق تاريفتىڭ تاعى كوتەرىلەتىنى ايتىلىپ جاتىر. سەبەبى، سۋ قۇبىرلارى ەسكىرىپ كەتىپتى، ونىڭ ءبارىن قايتا جاڭالاۋ كەرەك. سول ءۇشىن تاريفتى كوتەرىپ، حالىقتان اقشا جيناۋعا تۋرا كەلىپ تۇر.

ەربولات دوساەۆ: "شەتەلدىكتەر ىركىندى سۋعا جۋنادى".

ء«بىزدىڭ ءبارىمىزدىڭ جەكە ەسەپ شوتىمىز بار. وسى ەسەپ شوت ارقىلى جارىققا، كوگىلدىر وتىنعا اقى تولەيمىز. سۋعا تولەيتىن اقشامىز جارىق پەن كوگىلدىر وتىننىڭ قاسىندا تۇك تە ەمەس. سۋعا تولەنەتىن قاراجاتقا دۇرىس قاراۋىمىز قاجەت. شەتەلدىكتەر سۋ قۇبىرىنىڭ بۇرانداسىن جايدان-جاي اشا سالمايدى، ويتكەنى ول – اقشا. سوندىقتان دا ولار ىركىندى سۋعا شومىلادى»، - دەيدى ۇلتتىق ەكونوميكا ءمينيسترى ەربولات دوساەۆ. بۇندايدى كىم ەستىگەن؟ ۇنەمشىل ەۋروپا جۇرتىنىڭ جينالىپ قالعان سۋعا جۋىنىپ جۇرگەنىن قانشا جەردەن ۇنەمشىل بولسا دا ەستىمەگەن ەكەنبىز. الايدا، ءمينيسترىمىز ايتىپ وتىرعان سوڭ سەنبەسكە امال كەم. سونىمەن، 21 مىڭ تەڭگە 364 تيىن... بۇنىمەن ءبىر اي ءومىر ءسۇرۋ قانشالىقتى مۇمكىن. قوعام بەلسەندىسى، ساياساتتانۋشى راسۋل جۇمالى حالىقتى الەۋمەتتىك قورعاۋ ءمينيسترى تامارا دۇيسەنوۆاعا الەۋەمتتىك جەلى ارقىلى توسىن ساۋال تاستايدى:   

-         ءسىزدىڭ ۇيعارۋىڭىزبەن قازاقستاندا ەڭ تومەن ءومىر ءسۇرۋ دەڭگەيى 21364 تەڭگە بولىپ بەكىتىلگەنى ءمالىم. قامقورلىعىڭىزعا كوپ راحمەت. الايدا ءدال وسى 21 مىڭ تەڭگەگە ءوزىڭىز اي بويى كۇنەلتە الاسىز با؟ شەشىم قابىلداعان ءسىز، دەمەك، ونىڭ نەگىزدى ەكەنىنە سىزدەن باسقا كىم جاۋاپتى؟ دالەلدەڭىز حالقىڭىزعا بۇل ساننىڭ ايدان الىنباعانىن. ال ەندى اشتىق سىناعىنان امان-ساۋ شىقساڭىز, ءسىزدى ءارى ءسىز باستاعان مينيسترلىكتى سىناماۋعا ءوز باسىم ءسوز بەرەمىن.

Abai.kz

0 پىكىر