اقتوبەدە تاعى دا اتىس بولدى. قاڭتاردىڭ 12-ءسى كۇنى تۇندە پوليتسيا قىزمەتكەرلەرىنە بەلگىسىز بىرەۋ  وق جاۋدىرعان،- دەپ حابارلايدى «nur.kz» پورتالى.

وقيعا اقتوبە قالاسىنىڭ بوگوسلوۆكا اۋىلىنا اپاراتىن ۇلكەن جولدا بولعان. پوليتسيا قىزمەتكەرلەرى كۇدىكتى مىنگەن كولىكتى توقتاتۋ كەزىندە قارسىلىق كورسەتىپ، وق جاۋدىرىپتى. اتىس كەزىندە كولىك ىشىندەگى ءبىر ادام كوز جۇمعان. ازىرگە ناقتى قانشا ادامنىڭ ۇستالعاندىعى تۋرالى رەسمي اقپارات تاراعان جوق دەگەنمەن، ۇستالعان ازاماتتاردىڭ ءداستۇرلى ەمەس ءدىني اعىم وكىلدەرى ەكەندىگى تۋرالى سىبىس تارادى.

ەستەرىڭىزگە سالا كەتەيىك، كۇنى كەشە عانا اقتوبەدەگى سودىرلاردىڭ سويقانى كەزىندە سىبايلاستىق تانىتقان ازاماتتارعا راقىمشىلىق جاسالاتىنى حابارلانعان ەدى. اقتوبە وبلىستىق سوتىنىڭ ءباسپاسوز حاتشىسى يليادا دوسوۆانىڭ مالىمدەۋىنشە، جازداعى لاڭكەستىك وقيعا كەزىندە قۇرىقتالعان 9 سودىر مەن ولاردىڭ 19 سىبايلاسى سوت ۇكىمىمەن كەلىسپەگەن. تاۋەلسىزدىكتىڭ 25 جىلدىعىنا وراي مەملەكەت باسشىسىنىڭ بۇيرىعىمەن راقىمشىلىق جاساۋ تۋرالى شەشىمگە سۇيەنگەن سودىرلاردىڭ سىبايلاستارىنا راقىمشىلىق جاسالاتىن كورىنەدى.

يليادا حانىمنىڭ ايتۋىنشا، ولار تۇرمەدەن تولىق بوساتىلماعانىمەن، جازا مەرزىمى ەداۋىر قىسقارتىلعان. ايتسە دە، سوت القاسى ءبىر اپتا بويى ەلدى دۇرلىكتىرگەندەردى كەشىرگەن جوق. ياعني سول كەزدە ءتىرى قالعان سودىرلاردىڭ 7-ءى ءومىر بويى تۇرمەدە وتىرادى. قالعان ەكەۋى 20 جانە 22 جىلدى ارقالاعان بولاتىن. ولاردىڭ جازاسى دا وزگەرىسسىز قالدى. ال قىلمىستى حابارلاماعانى ءۇشىن 4-5 جىلدان جازا ارقالاعان 19 سوتتالۋشى راقىمشىلىققا ىلىنگەن.

وي تۇرتكى: سوندا ەل ءىشىن دۇرلىكتەرگەن لاڭكەستەرگە بولىسقاندار دا (كورە تۇرا ءتيىستى ورگاندارعا حابارلاماعاندار مەن سودىرلاردىڭ جالداپ تۇرۋىنا پاتەرىن بەرگەندەر تۋرالى ايتىپ وتىرمىز) راقىمشىلىققا ىلىكپەك پە؟ ەلباسى راقىمشىلىق جاساۋ تۋرالى شەشىم شىعارعاندا، تەرروريزممەن بايلانىستى ەشبىر قىلمىسكەرگە راقىمشىلىق جاسالمايدى دەگەن ەدى.

ال كۇنى بۇگىن كۇللى قازاقستاندى دۇربەلەڭگە تۇسىرگەن مىندەتتى ۋاقىتشا تىركەۋ تۋرالى زاڭ دا ءدال وسى جات اعىمداعىلاردىڭ جولىن كەسۋ ءۇشىن قابىلدانبادى ما؟ دالىرەك ايتساق، ىشكى ىستەر مينيسترلىگى ەرسى زاڭدى ەلگە وسىلاي دەپ تۇسىندىرگەن ەدى. پارادوكس.

Abai.kz