وتكەن اپتادا قر پرەزيدەنت اكىمشىلىگى جەتەكشىسىنىڭ ورىنباسارى قىزمەتىنەن بوساتىلعان باعلان مايلىباەۆتىڭ تۇتقىندالعانى تۋرالى بۇگىن رەسمي اقپارات شىقتى.

ۇلتتىق قاۋىپسىزدىك كوميتەتىنىڭ دەرەكتەرىنە سۇيەنسەك، باعىلان مايلىباەۆ مەملەكەتتىڭ ماڭىزدى ءام قۇپيا قۇجاتتارىن زاڭسىز جاريا ەتىپ جىبەرىپتى. اتا زاڭدا بۇل – وتانعا وپاسىزدىق، ساتقىندىق دەگەن ايىپ.

باعلان مايلىباەۆ قىزمەتىنەن بوساتىلعاندا – ورىس ءتىلدى بۇقارالىق اقپارات قۇرالدارى ءتۇرلى بولجامدار جاسادى. بىراق ول بولجامداردىڭ ءبىرى دە تۋرا وندىققا تيگەن جوق.  جالپى، قوعامدىق ورتادا ءوزى تۋرالى جاعىمسىز پىكىر قالىپتاستىرعان مايلىباەۆتىڭ تاعدىرىن ەندى قۇزىرلى ورگاندار شەشەتىن بولدى. بۇل جولعى قۇرباندىققا قۇلاققا ءسىڭىستى بولعان «پالەنشە سوما جىمقىرعان» دەگەن ايىپ ەمەس، "مەملەكەتتىڭ قۇپياسىن جاريالاۋ" دەگەن ءنان ايىپ تاعىلىپ وتىر.

باعلان مايلىباەۆتىڭ وتاندىق تەلەارنالار باسشىلىعىنا بوتەن ەلدىڭ ازاماتتارىن تاعايىنداعانى بەلگىلى.

بۇدان بولەك، باعلان مايلىباەۆ ەستە قالارلىق نە تىندىردى؟

مايلىباەۆتىڭ تۇتقىندالۋىنا قاتىستى ساراپشىلار مەن زيالى قاۋىم نە ايتادى؟

ايدوس سارىم، ساياساتتانۋشى:

- باعلان مايلىباەۆتىڭ تۇتقىندالۋى كەزدەيسوق جاعداي ەمەس. وتكەن جۇمادا ۇستالعان ەكى ازاماتپەن دە مەن جاقسى تانىسپىن. ۇلتتىق قاۋىپسىزدىك كوميتەتىنىڭ ءوزى كۇنى كەشە عانا ۇلكەن لاۋازىمدى قىزمەتتە بولعان ازاماتتارعا «وتانعا وپاسىزدىق جاساۋ» دەگەن ايىپ تاعىپ وتىرسا، بەكەر ەمەس بولعانى.

مايلىباەۆتىڭ پرەزيدەنت اكىمشىلىگىندە اتقارعان شارۋاسى اسا ءبىر جوعارى دەپ ايتۋعا كەلمەيدى. سەبەبى، ۇيىمداستىرۋ جۇمىستارى مەن باسقارۋ مەحانيزمدەرىن دۇرىس جۇرگىزە الماعانىن، وتكەن جىلعى  جەر ميتينگىلەرىنەن-اق كورۋگە بولادى. اقپاراتتىق ناسيحاتتى ۇيىمداستىرا الماعانى تاعى راس. ونىڭ ۇستىنە، مايلىباەۆتىڭ تۇسىندا، وتاندىق /بارلىق دەسەك تە بولادى/ تەلاارنالاردىڭ باسشىلىعىنا نەمەسە ورىنباسارلىعىنا رەسەي، يا بولماسا بوتەن ەلدىڭ ازاماتتارى تاعايىندالدى.

ۇلتتىق قاۋىپسىزدىك كوميتەتى قىزمەتكەرلەرى ونىڭ ءۇيىن ءتىنتۋ كەزىندە بۇلتارتپاس دالەلدەر تاۋىپتى. مەملەكەتتىك قۇپيا قۇجاتتاردى جاريالاۋ دەگەنىڭىز – وتانعا وپاسىزدىق جاساۋ دەگەنمەن پارا-پار. مۇنىڭ ءوزى قوعامنىڭ تەرىس پىكىرىن تۋدىرىپ وتىر. مەن تەلەارنالارعا وزگە ەلدىڭ ازاماتتارىن باسشى ەتىپ تاعايىنداعان باعلان مايلىباەۆقا بىرنەشە مارتە سىن ايتقان ەدىم. ال ەندى مايلىباەۆتىڭ ورنىنا مارات ءتاجىن سەكىلدى ازاماتتىڭ كەلۋى، اقورداداعى كادرلىق داعدارىستىڭ جانە ساياسي رەفورمانىڭ باستالۋىن سەزدىرسە كەرەك.

مارالتاي رايىمبەكۇلى، اقىن:

- بۇل تۋرالى نە ايتۋعا بولادى؟ ول ەندى سول ساياسي الاڭدا جۇرگەن جىگىت. مەن تانيتىن مايلىباەۆ مەملەكەتشىل ازامات. ەلباسىنىڭ ساياساتىن قولدايتىن. ءتىپتى جانىن سالىپ قورعايتىن ازامات. مەن تانيتىن مايلىباەۆ وسىنداي ازامات. بۇدان ارتىق نە ايتا الامىن؟!

باعلان اساۋبايۇلى 2003-جىلدىڭ قىركۇيەك ايىنان 2004-جىلدىڭ جەلتوقسان ايىنا دەيىن «زاڭ» اكتسيونەرلىك كومپانياسىنىڭ پرەزيدەنتى بولعانى ەدى. سوندىقتان ءبىز مايلىباەۆتىڭ قاسىندا قىزمەتتە بولعان امانحان ءالىمۇلىنا حابارلاستىق.

- «رەنجىمەڭدەرشى، مايلىباەۆتىڭ ۇستالعانى تۋرالى رەسمي اقپارات شىقسىن. اناۋ-مىناۋ دەپ ايتا بەرۋگە دە بولمايدى. بۇل بىرىنشىدەن ەتيكاعا دا جات. سوندىقتان، مەن پىكىر بەرمەي-اق، قويايىن»، - دەدى امانحان اعا.

مايلىباەۆتىڭ تۇتقىندالۋىنا قاتىستى ساياساتكەر بەرىك ابدىعالي مىرزاعا دا حابارلاسقان ەدىك. «مەنەن باسقالارىنان سۇراڭدارشى. مەن ونىمەن بىرگە جۇمىس ىستەگەن جوقپىن» دەدى.

ال مۇرات ابەنوۆ مىرزا «مەن بۇل تۋرالى پىكىر ايتا المايمىن» دەپ قىسقا قايىردى.

ەستەرىڭىزگە سالا كەتەيىك، وسىعان دەيىن ۇلتتىق قاۋىپسىزدىك كوميتەتى «مەملەكەتتىك قۇپيانى اشكەرەلەدى» دەگەن ايىپپەن نارتاي دۇتباەۆ پەن تاعى ەكى شەنەۋنىك – نۇرلان حاسەن مەن ەرلان نۇرتاەۆتى تۇتقىنداعان بولاتىن. ودان ءتىنتۋ كەزىندە زاتتاي ايعاقتار تابىلىپ، 2 ايعا قامالعان ەدى. ەندى ءدال وسى باپ بويىنشا باعلان مايلىباەۆ تۇتقىندالىپ، 2 ايعا قامالدى. بۇل نەنى بىلدىرەدى؟

ساياسي توپتار اراسىندا اشىق ايقاس باستالعانى ما؟ بۇل تۋرالى ساياساتكەرلەر مەن ساياساتتانۋشىلاردىڭ پىكىرلەرىن  «Abai.kz» اقپاراتتىق پورتالىندا جاريالايتىن بولامىز.

نۇرگەلدى ابدىعانيۇلى

Abai.kz