استانا. 20 قىرقۇيەك.قازتاگ – ەقىۇ-نىڭ ءىس باسىنداعى توراعاسى – قازاقستان رەسپۋبليكاسىنىڭ مەملەكەتتىك حاتشىسى - سىرتقى ىستەر ءمينيسترى قانات ساۋداباەۆ جەكسەنبى كۇنى نيۋ-يوركتە بۇۇ-نىڭ باس حاتشىسى پان گي مۋنمەن كەزدەسۋدە ونى ەقىۇ-نىڭ استانادا وتەتىن سامميتىنە قاتىسۋعا شاقىردى.

ءسىم حابارلاماسىندا ايتىلعانداي. «قانات ساۋداباەۆ اڭگىمەلەسۋشى تاراپتى الداعى جەلتوقسان ايىندا استانادا وتەتىن ەقىۇ سامميتىنە دايىندىق بارىسىمەن تانىستىرا وتىرىپ، وعان پرەزيدەنت نۇرسۇلتان نازارباەۆتىڭ اتىنان وسى فورۋمدا عالامدىق حالىقارالىق ۇيىمنىڭ باسشىسى رەتىندە قاتىسۋعا شاقىرۋىن تابىس ەتتى».

كەزدەسۋ بارىسىندا اڭگىمەلەسۋشى تاراپتار ورتالىق ازيا ايماعىنداعى، اتاپ ايتقاندا، قىرعىزستان مەن اۋعانستانداعى جاعدايدى تالقىعا سالدى.«بۇۇ باس حاتشىسى ءبىزدىڭ ەقىۇ توراعاسى رەتىندە قىرعىزستانداعى جاعدايدى رەتتەۋدە جانە اۋعانستانداعى سوعىستان كەيىنگى ەكونوميكالىق جانە گۋمانيتارلىق احۋالدى قايتا قالپىنا كەلتىرۋدە جۇمساپ وتىرعان كۇش-جىگەرىمىزگە جوعارى باعا بەردى».

قازاقستاننىڭ ەڭ باستى حالىقارالىق ۇيىممەن ىنتىماقتاستىعى جونىندە ءسوز قوزعاي وتىرىپ، پان گي مۋن استانا باستاماسىمەن العاش رەت بۇۇ شەڭبەرىندە يادرولىق قارۋدان بوس حالىقارالىق كۇننىڭ ءوتۋىنىڭ ماڭىزدىلىعىن جەتكىزىپ، اتالعان شارادا ءوزىنىڭ جەكە قاتىسقاندىعىن حاباردار ەتتى، دەلىنگەن حابارلامادا.