تۇركىستانداعى «ازىرەت سۇلتان» مەملەكەتتىك تاريحي-مادەني قورىق-مۇراجايىندا «تورعايدىڭ وزاعاسى» كورمەسى بولىپ ءوتتى. كورمەنى قوستاناي وبلىسى ارقالىق اۋدانىنىڭ «دالا ولكەسى تاريحى» مۋزەيى حالقىمىزدىڭ سالت-ءداستۇرىنىڭ بىلگىرى، ەلىمىزدەگى مۇراجاي ءىسىنىڭ دامۋىندا وزىندىك قولتاڭباسىن قالدىرعان مەملەكەت جانە قوعام قايراتكەرى، عالىم-ەتنوگراف وزبەكالى جانىبەكوۆتىڭ تۋعانىنا 85 جىل تولۋىنا بايلانىستى ۇيىمداستىردى.

جيىندى «ازىرەت سۇلتان» قورىق-مۇراجايىنىڭ ديرەكتورى ج.اۋباكىر اشىپ، ءو.جانىبەكوۆتىڭ ەلىمىزدىڭ مادەني-رۋحاني دامۋىنا قوسقان ۇلەسىنە توقتالدى. سونداي-اق ارقالىق اۋدانىنىڭ «دالا ولكەسى تاريحى» مۋزەيىنىڭ ديرەكتورى گ.ەلتاەۆا ءسوز الىپ كورمەنى تاماشالاۋعا كەلگەن قالا اكىمشىلىگىن، وقۋ ورىندارىن قالىڭ كوپشىلىككە تانىستىردى. تۇركىستان قالاسى اكىمىنىڭ كەڭەسشىسى ج.يبراگيموۆ «دالا ولكەسى تاريحى» مۋزەيىنىڭ ديرەكتورى گ.ەلتاەۆانى ارنايى العىس حاتپەن ماراپاتتادى.

كورمەگە وزبەكالى جانىبەكوۆتىڭ تىكەلەي جەتەكشىلىگىمەن قايتا قالپىنا كەلتىرىلگەن قۇندى جادىگەرلەر - ۇلتتىق كيىمدەر، ۇلتتىق باس كيىم ۇلگىلەرى، تۇسكيىزدەر مەن تۇسكەستەلەر قويىلعان. ءاربىر جادىگەر وزىندىك قۇندىلىقتارعا تولى، تەرەڭ تاريحتان سىر شەرتەدى. جيىن سوڭى جينالعان كوپشىلىك وزبەكالى الەمىنەن رۋحاني بايىپ تارقاستى.

تۇركىستان قالاسى اكىمىنىڭ ءباسپاسوز قىزمەتى 

Abai.kz