سەنبى, 6 ناۋرىز 2021
مايەكتى 4860 0 پىكىر 3 قازان, 2016 ساعات 12:38

ونەر جۇلدىزدارى اراسىندا سالافيتتەر بار ما؟

قازاقستاننىڭ تانىمال ونەر جۇلدىزدارى، شوۋ-بيزنەس وكىلدەرى اراسىندا دىنگە جاقىن، بەس ۋاقىت نامازىن وقىپ، شاريعاتتى ۇستاناتىن تۇلعالار از ەمەس. وسى ورايدا سول اتاقتى ادامداردىڭ اراسىندا سالافيزم اعىمىن ۇستاناتىندار بار ما دەگەن زاڭدى ساۋال تۋىندايدى. “جۇلدىزدار قۇپياسى” پورتالى ەلىمىزدىڭ تانىمال تۇلعالارىنىڭ دىني ومىرىنە ساراپتاما جۇرگىزىپ كوردى.

ارينە، بىرەۋدى حانافي مازھابىندا، ەندى بىرەۋدى تەرىس اعىمدا دەپ ءبولىپ جارۋدان اۋلاقپىز. دەگەنمەن، وتاندىق جۇلدىزداردىڭ ىشىندە دىنگە وتە جاقىندارىن اتاپ ءوتۋدى ءجون سانادىق.

ەڭ الدىمەن تانىمال ادامداردىڭ دىنگە بەرىكتىگى ءسوز بولعاندا ويىمىزعا قر پارلامەنت ءماجىلىسىنىڭ دەپۋتاتى بەكبولات تىلەۋحان ورالادى. ۇدايى ساقال قويىپ جۇرەتىن بەكبولات مىرزانىڭ ءدىن تۋرالى تولعامدارى ينتەرنەتتە كوپتەپ كەزدەسەدى. اسىرەسە، بەكبولات تىلەۋحاننىڭ دارىن مۋباروۆپەن داستارحانداس بولىپ وتىرعان ۆيدەوسى جەلىدە قىزۋ تالقىلانعان ءبىر كەزدەرى. ەسكە سالا كەتەيىك، بۇعان دەيىن وتاندىق باق دارىن مۋباروۆتى سالافيزم اعىمىن ۇستانۋشى دەپ ايىپتاعان بولاتىن. اق-قاراسىن بىلمەگەسىن ارتىق ايتۋدان اۋلاقپىز، سىزدەردىڭ نازارلارىڭىزعا تەك سول ۆيدەونى ۇسىنۋدى ءجون سانادىق.

ەندىگى كەزەكتە تانىمال ايتىسكەر اقىن بالعىنبەك يماشەۆ.

ايتىس دەسە ىشكەن اسىن جەرگە قوياتىن قازاق بالعىنبەكتى دە ەرەكشە جاقسى كورەتىن سەكىلدى. ينتەرنەتتە بالعىنبەكتىڭ جاس ايتىسكەر اقىن جانداربەك بۇلعاقوۆپەن وتكەن ءدىني ايتىسى ەسىمىزگە تۇسەدى وسى ورايدا. بەكبولات اعاسى سەكىلدى ۇدايى ساقال قويىپ جۇرەتىن بالعىنبەك تە يسلام ءدىنىن بەرىك ۇستاناتىن ونەر جۇلدىزدارىنىڭ قاتارىنان.

تاعى ءبىر تانىمال تۇلعا ول – التىناي جوراباەۆا. حيدجاپ كيىپ فوتوعا تۇسكەن ساتتەن-اق التىنايدىڭ دىنگە بەرىكتىگى بايقالدى. ەسكە سالا كەتەيىك، 2011 جىلى جوراباەۆا جۇرەك قالاۋىمەن ناماز وقي باستاعانىن حالىققا مالىمدەگەن بولاتىن. التىنايدىڭ ونەردەگى ءسىڭلىسى ايگەرىم قالاۋباەۆا دا شاريعاتتى ۇستاناتىن ءانشى.

KZ توبىنىڭ ەكس-ءسوليسى، جاس ءانشى بەيبىت كوشقاليەۆ شىعارماشىلىعىن شىڭداۋمەن قاتار، مۇسىلماندىق پارىزىن وتەپ، ناماز وقيدى. بەيبىتتىڭ شوۋ-بيزنەستەگى اعالارى مەيرامبەك بەسپاەۆ پەن قىدىرالى بولمان دا مۇسىلماندىق پارىزى تۋرالى ەش ۇمىتپايتىن سەكىلدى.

جۋىردا الەۋمەتتىك جەلىدەگى جەكە پاراقشاسىندا بەسپاەۆتىڭ قايرات جولدىبايۇلىنىڭ كىتابىن وقىپ وتىرىپ تۇسكەن سۋرەتى، ءانشىنىڭ تۋرا جولدا ەكەنىن ايعاقتايدى دەيدى ءدىنتانۋشىلار. سونداي-اق، جۋىردا الماتىداعى مەشىتتەردىڭ بىرىندە ازان شاقىرعان “جىگىتتەر” كۆارتەتىنىڭ ءسوليسى ەردوس قاناەۆتى دە وسى تىزىمگە قوسسا بولادى.

اتاپ ايتا بەرەتىن بولساق، ەلىمىزدىڭ تانىمال تۇلعالارى مۇسىلماندىق پارىزدارىن ۇدايى وتەيتىنى ءسوزسىز. ءبىز سولاردىڭ كەيبىرىنە عانا توقتالدىق. الايدا، ولاردىڭ اراسىندا تەرىس ءدىني اعىمدى ۇستاناتىندار بار ما، جوق پا، ول جاعىن ءدوپ باسىپ ايتا المايمىز. ولاردىڭ اراسىندا سالافيزم سەكىلدى اعىم وكىلدەرى بار بولسا، حالىق ءوزى ەسىمدەرىن ايتا جاتار دەپ سەنەمىز.

جوعارىدا ءوزىمىز اتاپ وتكەن ونەر جۇلدىزدارىنا شىعارماشىلىق تابىس پەن بەس ۋاقىت نامازدارى ۇدايى قابىل بولسىن دەپ تىلەيمىز.

juldizdar.kz

0 پىكىر