جەلىدە مادەنيەت جانە سپورت ءمينيسترى ارىستانبەك مۇحامەديۇلىنا قاتىستى تاعى دا شۋلى اڭگىمە تارالا باستادى. جۇرگەنوۆ اتىنداعى ونەر اكادەمياسىنىڭ ستۋدەنتى ەڭلىك سىدىقوۆا جەلى پاراقشاسىنا ۆيدەو جاريالاپ، وندا مۇحامەديۇلىن "ارسىز ۇسىنىستار جاساپ، پارا سۇرادى" دەپ ايىپتاپتاعان. بۇگىن سول سىنعا ءمينيستردىڭ ءوزى جاۋاپ بەردى، - دەپ حابارلايدى NUR.KZ.

مادەنيەت جانە سپورت ءمينيسترى ارىستانبەك مۇحامەديۇلىنىڭ جەلىدەگى شۋعا ايتار ءوز ءۋاجى بار ەكەن.

"مەن بۇل ماسەلەگە پىكىر بىلدىرمەسەم دە بولاتىن ەدى. الايدا، ەلگە تانىمال تۇلعا، ونىڭ ىشىندە، مادەنيەت ءمينيسترى بولعان سوڭ بۇل ماسەلەنى اينالىپ وتۋگە حاقىم جوق. بۇل ۆيدەو حابارلامانىڭ ءدال سول ۋاقىتتا ەمەس، بىرنەشە جىلدان كەيىن جارىق كورگەنى كۇدىك ۇيالاتادى. شاماسى، بىرەۋلەرگە مەنىڭ قىزمەتىمدى قارالاعان كەرەك سياقتى", - دەيدى مۇحامەديۇلى.

مينيستر ەڭلىك سىدىقوۆانىڭ مالىمدەمەسىن جالا جابۋ دەپ تانىپ، ءوز قۇقىعىن زاڭدى جولمەن قورعايتىنىن جەتكىزدى.

"مەنىڭشە، ۆيدەو حابارلامانى جازعان قىز ادۆوكاتتارمەن جۇمىس ىستەۋ كەرەكتىگىن بىلمەيتىن سەكىلدى. مەن ماماندارعا ۆيدەونى جاقسىلاپ زەرتتەۋدى تاپسىردىم. ەندى بارلىعىن زاڭ تالاپتارىنا ساي زەرتتەيتىن بولامىن", - دەيدى مينيستر.

مۇحامەديۇلىنىڭ ايتۋىنشا، بۇل وزىنە قارسى ادەيى ۇيىمداستىرىلعان ءىس بولۋى مۇمكىن.

"ۆيدەو سوڭىندا ول بولات اتاباەۆتىڭ توبىندا وقىعانىن ايتىپ، ءوزىن ۇستاپ بەردى. ارينە، ءبارى تۇسىنىكتى. مۇمكىن بۇل قىزعا اقشا تولەگەن شىعار، مۇمكىن ول جاي عانا ءوزىن جارنامالاعىسى كەلگەن شىعار", - دەيدى مينيستر.

اباي-اقپارات